Ili pédagogika aliy téxnikomining oqutquchisi shawket abdullagha 4 xil "Jinayet" artilip, 25 yilliq késilgenliki delilendi

Muxbirimiz shöhret hoshur
2021-06-28
Share
Ili pédagogika aliy téxnikomining oqutquchisi shawket abdullagha 4 xil Ili pédagogika aliy téxnikomining bi'ologiye oqutquchisi shawket abdulla ependi. (Waqti we orni éniq emes)
Perhet Abdulla teminligen

Ili pédagogika aliy téxnikomining bi'ologiye oqutquchisi shawket abdullaning 25 yilliq késiwétilgenliki buningdin ikki yilche burun uning norwégyediki inisi perhat abdulla arqiliq xelq'aragha ashkarilan'ghan we bu uchur norwégeyediki "Uyghur edliye arxipi" din orun alghan idi. Muxbirimizning ikki yilgha yéqin élip barghan éniqlashliri dawamida, mezkur uchurning toghriliqi ghulja shehiridiki alaqidar xadimlar teripidin delillendi. Melum bolushiche, shawket abdullagha 4 xil atalmish "Jinayet" artilip, 25 yilliq késiwétilgen

"Uyghur edliye arxipi" da xatirilishiche, shawket abdulla 1988‏-yili shinjang pédagogika oniwérsitétining bi'ologiye fakultitigha qobul qilin'ghan. U 1993‏-yili oqushini püttürüp, ili pédagogika aliy téxnikomida oqutquchi bolup xizmet qilghan. 25 Yilliq xizmet hayatida oqutquchiliqtin bashqa mektep oqughuchilar bashqarmisining mudiri qatarliq bir qatar qoshumche wezipelernimu utuqluq ötep kelgen. Mektep rehberliki teripidin teqdirlinip kéliwatqan shawket abdulla 2018 ‏-yili yazliq tetilde birdinla "Jinayet gumandari" gha aylan'ghan we atalmi'ish "Öginish" ke élip kétilgen. Öyidin kéchide béshigha qara xalta kiydürlüp tutup kétilgen shawket abdullaning nede "Terbiye" liniwatqanliqini ghuljadiki alaqidar organlardin bilelmigen a'ile tawabi'atliri taki ürümchige qeder bérip sürüshte qilip baqqan bolsimu, lékin uchur alalmighan. Peqet 2019‏-yilning awghust éyigha kelgende, uning norwégiyediki inisi perhat abdulla xitay ülkiliride yashwatqan tonush-bilishliri arqiliq akisigha birqanche türlük atalmish "Jinayet" artilip, 25 yilliq késiwétilgenliki heqqide éghizakiy uchur alghan.

Ili oblastliq ma'arip idarisining bir xadimi shawket abdulla heqqide melumat bérelmidi.

Yéqinda ghulja wezi'iyitidin xewerdar kishilerdin birining radiyomizgha inkas qilishiche, shawket abdulla ma'arip sahesidiki kespiy netijiliri bilenla emes, belki ijtima'iy pa'aliyetlerdiki aktipchanliqi, bolupmu teshkilatchi mijez-xaraktéri bilenmu jemiyette keng tonulghan؛ uning yurt ehlini söyündürgen bu alahidiliki eyni chaghda xitay da'iriliri teripidinmu étirap qilinip, bir mezgil sheherlik ma'arip idarisda memuriy xadim süpitide xizmetke teyinlen'gen. Emma uning ma'arip xizmitidiki milletler mesilisige bekrek köngül bölüshi alaqidar xitay rehber we xizmetdashlirining ditigha yaqmighan we bu orundin mektipidiki oqutquchiliq xizmitige qayturulghan.

Ghulja sheherlik ma'arip idarisining bir xadimidin ilgiri bu idaride xizmet qilghan shawket abdulla isimlik birining bar-yoqliqini sorighinimizda, u bu ishxanida pütünley xitay xadimlar ishleydighanliqini tilgha aldi.

Weziyettin xewerdar kishi inkasida shawket abdullaning ma'arip idarisida xizmet qilghan mezgilide, ma'arip xirajiti we eslihelirini teqsim qilish mesiliside Uyghur mekteplerning menpe'etni qoghdap birqanche qétim tenqidiy pikir bayan qilghanliqini, lagér tutquni bashlan'ghanda uning del ene qilmishi seweblik tutulghanliqini ilgiri sürgen.

Ghulja sheherlik ma'arip idarisining xadimi bu heqtiki so'alimizgha jawaben özlirining xizmetke yéngidin orunlashqan yashlar ikenliki, shawket abdullagha oxshash yashta chonglarning qilghan-etkenliridin xewiri yoqluqini bayan qildi. Biz uninggha shawket abdullaning ottura yash kishilerdin ikenlikini eskertip, ma'arip sahesidin tutqun qilin'ghanlar arisida shawket abdulla dep birsining bar-yoqluqini sorighinimizda, u bu so'alimizghimu jawap bérishtin özini qachurdi.

Inkas qilinishiche, xizmet jeryandiki milliy köz qarishi seweblik tutqun qilin'ghan shawket abdulla lagérgha solan'ghandin kéyin, 20 yil awwalqi atalmish "Xataliqliri" dinmu hésap bérishke mejbur bolghan. Netijide uning 1997‏-yili ghuljada dawam qilghan meshrep pa'aliyitide adettiki bir eza bolup orun élishi uning "Milliy bölgünchilik jinayiti" bolup xatirilen'gen. Ili pédagogika aliy téxnikomining bir xadimi shawket abdullaning délosining sezgür délolar qatarida ikenlikini we bu heqte melumat bérelmeydighanliqini bayan qilish arqiliq uning tutqunda ikenlikini wastiliq halda étirap qildi.

Inkasta yene déyilishiche, shawket abdullaning norwégiyediki inisi shawket abdullagha öy sétiwélishi üchün pul ewetishi atalmish térorchilargha yardem bérish" dep sanalghan. Bu atalmish "Jinayet" heqqide shawket abdullaning norwégiyediki inisi perhat abdulla bizge melumat berdi.

Inkasta bayan qilinishiche, lagérdiki barliq tutqunlargha oxshashla, shawket abdullagha qarita élip bérilghan soraqta uningdin mumkin qeder köp xataliq tépish, uninggha mumkin qeder éghir jinayet artish we uni mumkin qeder éghiz jazalash asasliq meqset qilin'ghan. Shunga uning norwégiyediki bir inisi bilen téléfondamelum bir kitap heqqide pikir almashturishimu "Bölgünchilik idiyesi" dep sanalghan. Ghulja shehiridiki bir dölet amanliq saqchisi, shawket abdullaning téléfondin atalmish "Chataq chiqqanliqi" ni bayan qilish arqiliq inkastiki mezkur uchurningmu toghriliqini delillidi.

Inkasta yene eskertilishiche, soraqchilar jazani éghirlitish üchün "Jinayetning yéngisi yenggillik qilip qalsa, konisini qétish" tedbiri qollinilghan. Netijide uning eyni chaghda iqtisadiy jazasini tölep bolghan atalmish "Pilanliq tughutqa xilapliq qilish" qilmishimu uning "Tötinchi türlük jinayiti" süpitide soraq deptirige yézilghan. Melum bolushiche, uning yuqiriqi atalmish 4 jinayitige jem'iy 25 yilliq qamaq jazasi bérilgen.

Téléfonimizni axirida qobul qilghan yene bir alaqidar xadim 25 yilliq késilgen shawket abdullaning qaysi mektepning oqutquchisi ikenliki heqqidiki so'alimizgha jawaben, uning ili pdagogika aliy téxnikomining oqutquchisi ikenlikini bayan qilish we "Shawket abdullaning 25 yilliq késilgenliki toghrimu?" dégen so'alimizgha jawaben: "Shundaq, toghra" dep jawap bérish arqiliq shawket abdulla heqqide "Uyghur edliye arxipi" da xatirilen'gen barliq uchurlarning toghriliqini delillidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet