Шиветсарийәдә хитайға қарши намайиш өткүзүлгән вә топланған имзалар парламентқа тапшурулған

Ихтиярий мухбиримиз әкрәм
2020-09-08
Елхәт
Пикир
Share
Принт
Хитайға қарши өткүзүлгән намайиштин кейин топланған 23 миң имза парламентқа тапшурулған көрүнүш. 2020-Йили 7-сентәбир, берн, шиветсарийә.
Хитайға қарши өткүзүлгән намайиштин кейин топланған 23 миң имза парламентқа тапшурулған көрүнүш. 2020-Йили 7-сентәбир, берн, шиветсарийә.
Photo: RFA

Шиветсарийә пайтәхти бернда хитайға қарши намайиш өткүзүлгән вә топланған 23 миң имза парламентқа тапшурулған.

«Шиветсарийә уйғур җәмийити» тәминлигән учурларға асасланғанда, 9-айниң 7-күни шиветсарийә пайтәхти берин шәһиридики парламент бинаси алдида «хәтәр астидики хәлқләрни қоғдаш тәшкилати», «кампах» намлиқ тәшкилат вә «шиветсарийә уйғур җәмийити» ниң бирликтә уюштуруши билән хитайға қарши намайиш өткүзүлгән һәмдә бу тәшкилатлар айлардин буян йолға қойған имза топлаш паалийитини хуласиләп, топланған 23 миң имзани шиветсарийә парламентиға тапшурған. «Шветсарийә уйғур җәмийити» ниң рәиси андили әпәндиниң билдүрүшичә, улар бу йил 3-айдин буян шветсарийә һөкүмитиниң хитай билән болған әркин сода келишимини қайтидин көздин көчүрүшини тәләп қилип имза топлаш паалийитини йолға қойған. Униң әскәртишичә, шветсарийә федерал һөкүмитидики бир қисим парламент әзалири бу имза топлаш паалийитини қоллиған вә топланған 23 миң имзани парламентта оттуриға қоюп, иҗабий бир қарар елиниши үчүн тиришчанлиқ көрситидиғанлиқини билдүрүшкән.

Мәзкур имза паалийитиниң кириш сөзигә: «3 милйонға йеқин уйғур хитайниң мәҗбури әмгәк лагерлириға қамалди. Шветсарийә хитайниң бу җинайәтлиригә шерик болуп қалмаслиқи керәк. Шветсарийә һөкүмити хитай билән болған әркин сода келишимини қайтидин көздин көчүрүши лазим» дегәнләр йезилған.

Шиветсарийәдики уйғур зиялийси һибибулла әпәнди бу һәқтә зияритимизни қобул қилғанда бу намайишниң бирқисим ахбарат органлириниң диққитини тартқанлиқини тилға алди.

Хәвәрләрдин мәлум болушичә, шветсарийә һөкүмити 60 тин артуқ дөләт билән» җинайәтчиләрни өткүзүп бериш келишими «имзалиған болуп, буниң ичидә хитайму бар икән. Бу йил хитай билән болған мәзкур келишимни узартишқа тоғра кәлгән. Бу мәсилә шиветсарийәдики бирқисим парламент әзалири вә кишилик һоқуқ органлириниң күчлүк қаршилиқиға учриған. Улар « кишилик һоқуқ вәзийити күнсери начарлишиватқан хитай билән бундақ бир келишимни имзалаш түптин хата» дегән. Болупму, шиветсарийәгә сиясий панаһлиқ тиләп кәлгән һәрқандақ бир уйғур яки тибәтликни хитайға өткүзүп беришкә болмайдиғанлиқини илгири сүргән. Шветсарийә көчмәнләр идариси болса һазирға қәдәр бирму уйғур яки тибәтликниң хитайға қайтуруп берилмигәнликини билдүргән.

Пикирләр (0)
Share
Толуқ бәт