Shöhret ghéni: lagérgha solan'ghan ata-anamning gunahi amérika wizisi alghanliqi

Muxbirimiz méhriban
2019-07-11
Élxet
Pikir
Share
Print
"Qayta terbiyelesh" namidiki "Yighiwélish lagéri" ning temidiki sim tiken soruq we közitish nuqtisi. 2018-Yili 4-séntebir, dawanching.
"Qayta terbiyelesh" namidiki "Yighiwélish lagéri" ning temidiki sim tiken soruq we közitish nuqtisi. 2018-Yili 4-séntebir, dawanching.
REUTERS

Ürümchidiki tijaretchi ghéni hoshur ependi we ayali reyhansem abla xanimlar 2017-yili 5-ayda béyjinggha bérip, amérikida magistirliqta oquwatqan oghli shöhretning oqush püttürüsh murasimigha qatnishish üchün wiza alghan. Emma bu ata-anilarning amérikida oquwatqan oghlining mektep püttürüsh murasimigha qatnishish üchün amérika elchixanisidin alghan wizisi ularning shu yili 9-ayda ürümchidiki "Qayta terbiyelesh" namidiki "Yighiwélish lagéri" gha qamilishidiki jinayi pakitqa aylan'ghan. Ikki yildin buyan xitay hökümitige ümid baghlap, ata-anisining lagérdin qoyup bérilishini zariqip kütken shöhret ghéni hoshur ependi, 2019-yili 5-ayda sükütni buzghan. U ata-anisining iz-dérikini qilishqa, amérika taratqulirida lagérgha qamalghan ata anisining ehwalini anglitishqa bashlighan. Shöhret ghéni hoshur ependi bügün radiyomiz Uyghur bölümining ziyaritini qobul qilip, "Lagérgha solan'ghan ata-anisining birdin-bir gunahi amérika wizisi alghanliqi, xitayche oqughan aliy melumatliq ata-anisining atalmish'qayta terbiyelesh' ke éhtiyaji yoq" liqini bildürdi. Diqqitinglar muxbirimiz méhribanning shöhret ghéni hoshur ependi bilen ötküzgen söhbitide bolsun.

Nöwette amérikining chikago shehiride turuwatqan shöhret ghéni hoshur ependi radiyomiz ziyaritini qobul qilip, özining oqush püttürüsh murasimigha qatnishish üchün, 2017-yili amérikigha wiza alghan ata-anisining xitayning lagérigha qamalghanliqi heqqidiki ehwalni ikki yildin kéyin ashkarilash qararigha kelgenliki we ata-anisining erkinlikke chiqishi üchün öz qolidin kélidighan barliq tirishchanliqlarni körsitiwatqanliqini bildürdi.

Shöhret ghéni ependining bildürüshiche, u 2015-yili amérikining chikago shehiridiki illinoy tebi'iy penler uniwérsitétigha toluq kurs 3-yilliqidin bashlap bakalawrliq oqushi üchün kelgen. Netijisi alahide yaxshi bolghini üchün bir yildin kéyin bakalawrliq oqushini tamamlap, ashu mektepning özide magistirliq üchün oqushqa qobul qilin'ghan. Emma shöhret ghéni, özining oqush püttürüsh murasimigha gha qatnishish üchün amérikigha kélishke teklip qilghan ata-anisi lagérgha qamalghanliqi üchün, u 2018-yili 5-aydiki magistirliq oqushini püttürüsh murasimini ata-anisining tebrikisiz yalghuz ötküzidu.

Shöhret ghéni ependining bildürüshiche, u 2017-yili magistirliq oqushini püttürüsh murasimidin bir yil ilgirila ata-anisigha teklip qeghizi ewetkenliki üchün, ata-anisi shu yili 5-ayda amérikigha kélish wizisini alidu. Emma ular shu waqitta téxi amérikigha kelmigen bolup, shöhret ghéni 2017-yili 9-ayning 20-küni anisining tughulghan künini tebriklesh üchün téléfon qilghanda, ata-anisi bilen sözlishelmigendin kéyin, sürüshtürüsh arqiliq ularning lagérgha qamalghanliqidin xewer tapidu.

Shöhret ghéni ependining qarishiche, aliy mektep terbiyesi körgen yuqiri melumatliq ata-anisining atalmish "Qayta terbiyelinish" ke héchqandaq éhtiyaji yoq. Bolupmu xitayche oqughan dadisi xitaylar bilen hemkarliship tijaret qilidighan kishi. Ilgiri awstraliye, jenubiy koréye qatarliq döletlerde birqanche qétim ziyarette bolghan ata-anisini da'irilerning "Qayta terbiyelesh" dégendek namlarda lagérgha qamishi emeliyette héchqandaq kishini qayil qilalmaydighan orunsiz bahane. Uning éytishiche, shunga da'irilerning uning ata-anisini lagérgha qamilishigha ularning amérikida oquwatqan oghlini yoqlash üchün wiza alghanliqi "Atalmish gunahi" bolghan bolushi mumkin.

Shöhret ghéni ependi yene özining bu yil 5-ay mezgilide ikki yilliq sükütni buzup, ürümchidiki saqchi da'iriliridin ata-anisini sürüshtürgende xitay saqchilirining aldash we tehditlirige uchrighanliqi, amérikining "Dewr" zhurnili qatarliq taratqulirining ziyaritini qobul qilip, ata-anisining ehwalini anglatqanliqi, shundaqla ata-anisining ehwalini sürüshtürüshte yardimi bolidu dep qarighan ijtima'iy teshkilatlar we birleshken döletler teshkilati qarmiqidiki munasiwetlik ishxanilargha xet yézip, ata-anisining mesilisini dawamliq anglitiwatqanliqini bildürdi.

Yuqiriqi awaz ulinishidin söhbetning tepsilatini anglaysiler.

Toluq bet