Яшлар шивитсийәдики йиғинниң көргәзмә залида шәрқий түркистан мәсилисини аңлатти

Ихтиярий мухбиримиз иһсан
2014-04-24
Share
shwetsiye-yashlar-sherqiy-turkistan.jpg Шивитсийә өткүзүлгән мусулман яшлар йиғиниға тәклип билән қатнашқан уйғурлар
RFA/Ihsan


Шивитсийә өткүзүлгән мусулман яшлар йиғиниға тәклип билән қатнашқан уйғур маарип уюшмиси, йиғин көргәзмә залида уйғур яшлирини тәшкилләп шәрқий түркистан мәсилисини йүз туранә аңлитип яхши нәтиҗә һасил қилди.

Өткән һәптидә, шивитсийә ислам җәмийити, мусулман яшлар тәшкилати, ибни руш фонди қатарлиқ орунларниң бирлишип уюштуруши билән шивитсийә пайтәхти ситокһолимниң мәркизи йиғин залида өткүзүлгән йиғинға швитсийәдә яшаватқан уйғур яшлириму қатнашти һәмдә шәрқий түркистан мәсилисини аңлатти.

Йиғин давамида орунлаштурулған, шветсийәдики һәр қайси сиясий партийә, сақчи идариси, ислами аммиви тәшкилатлири, сода - карханичилар мәһсулатлирини елан қилидиған көргәзмә залида, уйғурларму икки үстәллик орун елип тәшвиқат қилди.

Уйғур яшлири шәрқий түркистанниң ай юлтузлуқ көк байриқи вә изники, уйғурларниң чимән допписи, уйғурчә китаблар, турғун алмасниң уйғурлар намлиқ китабиниң түркчә нәшри, дуня уйғур қурултийиниң рәиси рабийә қадир ханимниң “әҗдиһа билән елишқан аял” намлиқ швед тилдики китаби, шәрқий түркистанниң омумий әһвали тонуштурулған швитчә вә енглизчә рәсимлик тәшвиқат варақлири, 24 йилдин бери хитай түрмисидә йетиватқан сиясий мәһбус абдулкерим абдувелиниң чоңайтилған рәсими, уйғур елипбәси қатарлиқ буюмларни гөргәзмә қилиш арқилиқ шәрқий түркистан вә уйғурларниң тарихини, мәдәнийитини йиғинға кәлгән меһманларға тәшвиқ қилди.

Йиғин ахирида зияритимизни қобул қилған уйғур маарип уюшмисиниң баш катипи абдулла әһәд бу хилдики йиғинлардин яхши һасил қилғанлиқини мундақ ипадилиди: “биз, 2009 - йилдин башлап, абдусалам абдуғәнигә охшаш көзгә көрүнгән зиялийларни тәклип қилип, шивитсийә хәлқиғә шәрқий түркистан мәсилисини аңлитип келиватимиз.

Мәлумат беришимизму йилдин - йилға кеңийип барди, биз тәклип қилған меһманлар алди билән швитсийә парламентида гуваһлиқ берәтти, андин бу йиғинда мәлумат берәтти.

Бу йил аллаһқа шүкри, бизниң хизмәтлиримиздин хәвәр тепип турған түрк җәмийәтлириму абдусалам абдуғәни мәлумат беришкә тәклип қилди.”

Абдулла әһәд “силәр, көргәзмә җәрянида әрәбчә, енгилизчә тиллардики тәшвиқатиңлар арқилиқ қандақ нәтиҗиләр гә ериштиңлар” дегән соалимизға қарита мундақ җаваб бәрди:

“биз 5йилдин бери изчил һалда йиғин залиниң гөргәзмә бөлүмидин орун елип, шәрқий түркистан мәсилисигә аит тәшвиқатларни тарқитип кәлдуқ, бу қетим болса биз швитсийәдә үсүп йетиливатқан, швитчиси раван яшларни йүз туранә тәшвиқ елип беришқа тәшкиллидуқ. Йиғинда яшларниң роли наһайити чоң болди, чүнки буларниң тили раван, улар тәшвиқ қилиш йоллирини билиду, шу сәвәбдин тәшвиқ қилиш җәһәттә ғәлибә қилдуқ дәп қараймән.”

Йиғинда йүз туранә тәшвиқ елип барған уйғур яшлиридин дөләтҗан зияритимизни қобул қилип, өз тәсиратини мундақ ипадилиди: “мән тәшвиқат вариқини тарқитиш җәрянида кишләр гепимни қизиқип аңлиди. Мән алди билән тәшвиқат варақчисини бериштин бурун кишиләрдин “сиз бурун шәрқий түркистан дөлитини аңлап баққанму” дәп соридим, бизни билимән дегүчиләрдин “қайси тилни билсиз ?” дәп сорап тәшвиқат варақчисини бәрдим. Билмәймән дегүчиләргә болса “бу дөләт хитайлар тәрипидин бесивелинған бир дөләт икәнликини, у йәрдә болуватқан зүзлумларни қисқа шәклидә аңлаттим, қизиққучиларға техиму көп мәзмунларни сөзләп бәрдим.”

Бизниң “қизиққанлар сиздин қандақ соалларни сориди” дегән соалимизға қарита дөләтҗан мундақ деди: “аңлиғантим, силәрниң бу йәр аптоном районғу? силәр хитайму? силәр мусулманму? дегәнгә охшаш һәр хил әмма ғәйри соалларни сориди.” у йәнә мундақ деди: “мән 2013 - йилида ечилған йиғинға қатнашқан, у қетимқисида йиғин қатнашқучилириға уйғурларниң вәзийитини кәң төрдә тәшвиқ қилалмиған идуқ. Бу қетим болса техиму яхши болди дәп қараймән.”

Йоқирида, швитсийәдики йиғин давамида өткүзүлгән көргәзмидә уйғурларниң елип барған паалийәтлири һәққидики мәлуматимизни аңлидиңлар. Бу программини швитсийәдин иһсан аңлатти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт