Аблимит әхмәттохти дамолла һаҗим: “қан билән киргән етиқад җан билән чиқиду!”

Мухбиримиз қутлан
2014.03.13
Ablimit-Exmettoxti-shi-jinping.jpg Хитай компартийисиниң баш секретари, дөләт рәиси шиҗинпиң икки йиғин мәзгилидә хотәндин кәлгән хәлқ вәкили аблимит әхмәттохти дамолла һаҗим билән көрүшмәктә. 2014-Йил март, бейҗиң.
chinanew.com diki mezkur maqalidin elinghan

Игилишимизчә,  әхмәттохти дамолла һаҗимниң бейҗиңда чақирилған икки йиғин мәзгилидә оттуриға қойған тәклип-пикирлири уйғур елидин кәлгән башқа вәкилләрниң тәклиплири билән рошән селиштурма һасил қилған.

Көзәткүчиләрниң қаришичә, униң хитай мәркизий һөкүмитигә сунған миллий вә диний мәсилиләр тоғрисидики тәклиплири хели зор дәриҗидә уйғур елидики йәрлик хәлқниң авазини әкс әттүргән.

11-Март күни аблимит  әхмәттохти дамолла һаҗим тәклип бойичә бейҗиңдики мәркизий хәлқ радио истансиси уйғур бөлүминиң “җуңгоға нәзәр” программисида өзиниң мәркәзгә сунған тәклип-пикирлирини тәпсилий шәрһлигән.

У сөзидә, хитай һөкүмити тәкитләватқан “муқимлиқ вә инақ җәмийәт” бәрпа қилиш үчүн алди билән аз санлиқ милләтләр районида йәрлик хәлқләрниң мәнпәитини капаләткә игә қилидиған миллий сиясәтниң болушини илгири сүргән.

Аблимит дамолла һаҗим ислам диниға етиқад қилидиған уйғур хәлқиниң әзәлдин илим өгиниш вә пәрзәнтлирини илимлик қилип тәрбийиләш роһиға игә икәнликини, уларниң пән-маарипни вә тинчлиқни сөйидиғанлиқини алаһидә тәкитлигән. Шуниң билән бир вақитта йәнә, дөләтниң қанун вә бәлгилимилири бойичә уйғур елидики йәрлик хәлқ пәрзәнтлириниң ишқа орунлишишини капаләткә игә қилишни тәләп қилған.

У уйғур елиниң һәрқайси шәһәрлиридә җиддий қурулуватқан аһалиләр олтурақ районлири һәққидә тохтилип, көп санни тәшкил қилидиған йәрлик хәлқниң диний паалийәт еһтияҗлири нәзәргә елинмиғанлиқини, йеңи мәсчит селишқа рухсәт қилинмиғанлиқини, етиқадчи амминиң нормал диний ибадәтлирини давамлаштурушқа амалсиз қалғанлиқини илгири сүргән. У сөзидә йәнә, хәлқниң йеңи олтурақ районларға өз етиқади билән биллә көчидиғанлиқини, етиқадниң қан билән кирип җан билән чиқидиғанлиқини, буниңға нисбәтән һөкүмәт орунлириниң еһтиятчанлиқ билән муамилә қилишиниң зөрүрлүкини тәкитлигән. У уйғур аптоном районидики айродромларда тамака чекидиғанлар үчүн мәхсус җай аҗритилған болсиму, лекин мусулман аммиси үчүн намаз оқуйдиған һечқандақ җайниң йоқлуқини тилға алған.

Аблимит дамолла һаҗим сөзиниң ахирида, уйғур елиниң җәнубий районлирида, болупму өзи яшаватқан хотән районида давалиниш үчүн дохтурханиға киргән мусулман бимарларниң дохтурханида намаз оқумаслиқ һәққидики келишимнамигә қол қоюшқа мәҗбур болуватқанлиқини тилға алған. У йәнә һәр дәриҗилик һөкүмәт орунлиридин қанун бойичә йәрлик хәлқниң диний вә миллий өрп-адәтлиригә һөрмәт қилишни шундақла динға етиқад қилидиған амминиң һессияти вә ғуруриға тәгмәсликни тәләп қилған.

Юқиридики аваз улинишидин бу һәқтики программимизниң давамини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.