Аталмиш «террорға қарши авангарт» ваң гаңниң иш-излириниң чинлиқи гуман қозғиди (1)

Мухбиримиз шөһрәт һошур
2016-11-08
Елхәт
Пикир
Share
Принт
Хитай даирилири бай көмүркан һуҗумчилирини бир тәрәп қилишта өзлири үчүн хизмәт көрсәткән хитай қораллиқ қисим әтрәт башлиқи ваң гаң һәққидә қилған тәшвиқати. 2016-Йили 3-ноябир.
Хитай даирилири бай көмүркан һуҗумчилирини бир тәрәп қилишта өзлири үчүн хизмәт көрсәткән хитай қораллиқ қисим әтрәт башлиқи ваң гаң һәққидә қилған тәшвиқати. 2016-Йили 3-ноябир.
Photo: RFA

Хитай даирилири бай көмүркан һуҗумчилирини бир тәрәп қилишта өзлири үчүн хизмәт көрсәткән хитай қораллиқ қисим әтрәт башлиқи ваң гаң һәққидә өткән һәптә кәң көләмдә тәшвиқат паалийити елип барди.

Шинхуа тори вә с с т в қатарлиқ хитайниң ғоллуқ ахбаратлирида елан қилинған ваң гаң һәққидики тәпсилий хәвәрдә униңға «террорға қарши авангарт» дәп нам берилгән вә униң 56 күн давам қилған қоғлаш вә йоқитиш оператсийәсидә көрсәткән аталмиш батурлуқи вә пидакарлиқиға мәдһийә, апиринлар оқулған. Әмма инкаслардин мәлум болушичә, мақалиләрдә тилға елинған ваң гаңниң иш-излириниң чинлиқи оқурмән вә аңлиғучиларда гуман қозғиған.

Хәвәрләрдә ваң гаңниң 56 күн өйгә қайтмиғанлиқи пидакарлиқ сүпитидә тилға елинған, әмма оқурмәнләрдин бири, уйғур районида өйгә қайтмай вәзипә өтәшниң адәттики әһвал икәнликини тилға алған вә йезиларға чүшкән кадирларниң йил бойи өйигә қайтмайватқанлиқини пакит қилип көрситип, ваң гаңниң 56 күн өйигә қайтмаслиқиниң пидакарлиқ билән алақиси йоқлуқини оттуриға ойған, у йәнә бу нуқтида хитай қораллиқ қисимлириниң юқири мааш тәминати барлиқини әскәрткән. Хәвәр арисидики бир мавзуда ваң гаң қоманданлиқ қиливатқанда қулақ түвидин оқлар учуп турғанлиқи тилға елинған, хәвәрдики йәнә бир тәпсилатта гумандарлар аптоматик қораллар билән қаршилиқ көрситиватқан болғачқа, әскәр вә офитсерларниң өңкүр еғизиға йеқинлишалмиғанлиқи тәсвирләнгән, әмма хәвәрниң йәнә бир бөликидә, өңкүргә қаритип отчачар қоллинилғандин кейин өңкүр еғизидин гумандарларниң пичақ вә хәнҗәр көтүрүп етилип чиққанлиқи тәсвирләнгән. Мақалидики бу зитлиқтин хиҗиллиқ һес қилған бир оқурмән, мәзкур зитлиқни тилға елип хитай тәшвиқат васитилирини мәнтиқлиқ гәп қилишқа үндигән вә мақалидики икки тәпсилаттин бириниң чоқум ойдурма яки көптүрмә икәнликини баян қилған. Вәтәнпәрвәр тәхәллуслуқ йәнә бир оқурмән болса, гумандарларниң қолида улар өлтүргән терәк базар сақчилири, алаһидә сақчи башлиқи вә хадими, шундақла сақчи башлиқи мәмәт тохтинияздин тартивалған қораллар барлиқини тилға елип, гумандарларниң аптоматик қораллирида оқ түгигәндин кейин, пичақ билән етилип чиққанлиқ еһтималлиқини илгири сүргән; әмма йәнә бир оқурмән болса мақалидә бу нуқтиларниң айдиңлаштурулуши керәкликини, ахбаратниң оқурмәнләрни садда чағлимаслиқини вә даириләрниң хәлқни өз тәшвиқатиға зорлап ишәндүрүш методин ваз кечишини тәвсийә қилған.

Мәзкур мақалидә дейилишичә, ваң гаң бир күни йолда ғәмкин кетиватқан 9 яшлиқ бир қизни учратқан вә уни чақирип һал-әһвалини сориған, қиз дадиси дохтурханида ағриқ болғачқа, мәктәпни давамлаштуралмиғанлиқини баян қилған; шуниң билән ваң гаң дохтурханиға берип қизниң дадисиға иқтисадий җәһәттин ярдәм қилған вә бу қизниң мәктәпни давамлаштуруш арзусини әмәлийләштүрүп бәргән. Мақалидә ваң гаң ярдәм қилди дейилгән бу қизниң исми айгүл дейилгән, әмма униң қайси наһийә, қайси йезида олтурушлуқ аилидин икәнлики вә ваң гаң йоқлап барған дохтурханиниң қайси дохтурхана икәнлики тилға елинмиған. Һәммигә мәлумки, хәвәрдә орунниң айдиң болуши ахбараттики әң әқәллий 6 тәләптин бири. ярдәм қилди дейилгән 9 яшлиқ айгүлниң орун тәвәликиниң йезилмаслиқиму бир қисим оқурмәнләрдә гуман қозғиған. Биз бу нуқтиниң чинлиқини ениқлаш үчүн ақсу байдики алақидар орунларға телефон қилдуқ. Ақсуда вәзипә өтәватқан бир сақчи хадими, ваң гаңниң юқириқидәк иш-излиридин хәвәрсизликини ейтти. Хитай ахбаратлиридин мәлум болушичә, ваң гаң буниңдин 6 ай бурунму бир қетим мукапатланған вә иш-излири уйғур районида кәң-көләмдә тәшвиқ қилинған, һәтта сақчиларниң күндилик сиясий өгиниш паалийәтлиридә ваң гаң һәққидики язма материяллар өгитилгән, әмма телефон зияритимиз давамида, бәзи сақчилар ваң гаңниң иш-изила әмәс, кимликидинму хәвәрсизликини ейтти.

Мәлум болушичә, ваң гаңниң нам-шәрипи уйғур сақчи-хадимлириғиму қараңғу, уйғур сақчилардин бири, ваң гаң һәққидики соаллиримизға мәлуматсизлиқи сәвәбидин җаваб берәлмиди.

Алтә ай бурун һәққидә тәшвиқатлар башланған, бир һәптә аввал йәнә хитай миқясида иш-излири хәвәр қилинған аталмиш «террорға қарши авангарт» ваң гаңниң кимлики вә иш-излириниң уйғур районидики сақчи хадимлири тәрипидинму әслинәлмәслики, ваң гаңниң иш-излириниң чинлиқи һәққидики гуманниң нисбәтән омумийлиқидин вә униң тәсиридин ишарәт бәрмәктә.

Пикирләр (0)
Share
Толуқ бәт