Германийәдики уйғурлар берлинда хитайға қарши наразилиқ намайиши өткүзди

Ихтиярий мухбиримиз әкрәм
2018-06-07
Share
germaniye-berlin-namayish1.jpg Д у қ ниң орунлаштуруши билән германийәдики уйғурлар йәрлик герман вә түрк тәшкилатлири вәкиллири билән бирликтә берлинда өткүзгән намайишидин көрүнүш. 2018-Йили июн.
RFA/Ekrem

Бүгүн дуня уйғур қурултийиниң орунлаштуруши билән мюнхен шәһиридин уйғур әркинлик карвини билән бирликтә йолға чиқип берлингә кәлгән уйғурлар йәрлик герман вә түрк тәшкилатлириниң вәкиллири билән бирликтә берлинниң сиясий мәркизи болған бранденбург дәрвазисида хитай һөкүмитиниң уйғур хәлқигә қаратқан қаттиқ бастурушлириға қарши намайиш елип барди.

Бу қетимқи намайиш тоғрисидики учурларни германийәдики ихтиярий мухбиримиз әкрәм нәқ мәйдандин хәвәр қилди. Дуня уйғур қурултийиниң рәиси долқун әйса вә қурултайниң башқа рәһбәрлири шундақла “хәтәр астидики хәлқләр тәшкилати” ниң вәкили билән “түрк очақлири” тәшкилатиниң вәкиллири радийомиз зияритини қобул қилип, айрим-айрим пикир баян қилди.

Дуня уйғур қурултийиниң рәиси долқун әйса әпәндиниң билдүрүшичә, улар берлинға намайиш үчүнла кәлмигән болуп, улар йәнә германийә һөкүмәт әмәлдарлири билән көрүшүп, уйғурларниң һазирқи җиддий вәзийити үстидә мәлумат бәрмәкчи икән. Қурултайниң башқа рәһбәрлири өзлириниң немә үчүн мюнхендин берлингә 600 километир йолни бесип намайишқа қатнишиш үчүн кәлгәнлики һәққидә чүшәнчә бәрди.

Улар өзлириниң хитай һөкүмитиниң уйғурларға қаратқан зиянкәшликиниң чидиғусиз һаләткә йәткәнлики үчүн бу узун йолни бесип кәлгәнликини вә уйғур хәлқиниң қолидин немә кәлсә шуни қилишниң муһимлиқини ипадилиди. “хәтәр астидики милләтләр тәшкилати” билән “түрк очақлири” тәшкилатиниң вәкиллири хитай һөкүмитиниң уйғурларға қаратқан мислий көрүлмигән зиянкәшликлирини қаттиқ әйибләп, ғәрб вә түрк дунясиниң бу ечинишлиқ вәзийәткә қарап турмаслиқини чақириқ қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт