Turpan da'iriliri chet'elge sayahetke barghanlarni "Üch xil öginish" ke teshkilligen

Muxbirimiz qutlan
2017-05-04
Share
terror-qarshi-uch-xil-oginish-pash-qilish.jpg Uyghur élining melum rayonidiki öginishke yighiwélin'ghan Uyghurlar.
ts.cn

Turpan wilayetlik da'irilerning turpandiki ikki nahiye, bir sheherde chet'elge oqushqa chiqqan yaki sayahetke barghanlarni tizimlawatqanliqi hemde ularni bir jaygha toplap "Üch xil öginish" ke teshkillewatqanliqi melum bolmaqta.

Bu heqtiki éniqlashlirimiz jeryanida chet'elge oqushqa chiqqan Uyghur oqughuchilarni qayturup kélish ishining jenubiy Uyghur élidin bashqa yene, turpanni merkez qilghan sherqiy Uyghur diyaridimu jiddiy türde élip bériliwatqanliqi delillendi.

Turpan shehirining astana yéziliq saqchixanisidin téléfonimizni qobul qilghan mes'ul saqchi bu heqtiki so'allirimizni anglighan haman, aldi bilen kimlik nomurimizni déyishimizni hemde Uyghur aptonom rayonluq j x nazaritining ruxset xétini körsitishimizni telep qildi.

Biz arqidin turpan konasheher saqchixanisigha téléfon qilduq. Bu yerde nöwetchilikte turuwatqan bir neper Uyghur saqchi chet'elde oquwatqan Uyghur oqughuchilarni qayturup kélish xizmitini jiddiy ishlewatqanliqini bildürdi.

Biz uningdin chet'eldiki Uyghur oqughuchilarni qayturup kélish ishining tepsilatini sorighinimizda, mezkur Uyghur saqchi qéshidiki xitay bashliqidin bu heqte körsetme soridi. Xitay saqchi bashliqining neq meydanda bergen buyruqidin kéyin, mezkur Uyghur saqchi bu heqte yenimu ichkirilep gep qilsa bolmaydighanliqini bildürüp téléfonni qoyuwetti.

Biz axirida turpan wilayitige qarashliq nahiyelerdin ehwal igiliduq. Toqsun nahiye ilanliq yéziliq saqchixanidin téléfonimizni qobul qilghan bir neper nöwetchi saqchi munularni bildürdi: "Chet'elge oqushqa chiqip ketken oqughuchilarni qayturup kélish ishi toghriliq men tepsiliy bilmeymen. Men bu saqchixanigha ishqa chüshkili uzun bolmidi. Yéqinda yardemchi saqchiliqqa qobul qilin'ghan idim. Toqsun tewesidin chet'elge sayahetke chiqidighanlar yaki chet'eldiki sayahitini axirlashturup qaytip kelgenler alghuydiki terbiyelesh merkizige chaqirtilip, 'siyasiy terbiye' élip bériliwatidu."

Arqidin ilanliq saqchixanisining bashliqimu so'allirimizgha jawab bérip mundaq dédi: "Bizning ilanliq tewesidin chet'elge oqushqa chiqqanlar yoq déyerlik. Shunga bu heqte xizmet ishlishimizning hajiti yoq. Emma, bizde sayahetke barghanlar yaki sayahetke chiqip qaytip kelgenler köp boluwatidu. Nahiyemiz ularni toplap, alghuyda mexsus telim-terbiyege qatnashturuwatidu. Ular 'üch xil öginish' ke teshkillendi. 'üch xil öginish' déginimiz, 'döletning qanun-tüzümini öginish', 'qosh til öginish' we 'muqimliq heqqidiki belgilime we nizamlarni öginish' ni körsitidu. Hökümet teshkilligen kolléktip sayahet ömekliri bilen chet'elge chiqidighanlar aldi bilen 'üch xil öginish' ni tamamlishi kérek."

Ilanliq saqchixanisining bashliqi ashkarilighan mezkur uchurlar da'irilerning nöwette chet'elge sayahetke chiqmaqchi bolghanlargha qarita "Ménge yuyush" telim-terbiyesi élip bériwatqanliqini körsitip bermekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.