Rabiye qadir xanim shiwétsiyediki teshkilatlar we Uyghur jama'iti bilen körüshti

D u q re'isi rabiye qadir xanim shiwétsiye parlaménttiki guwahliq bérish yighinidin kéyin, shiwétsiyediki Uyghur teshkilat mes'ulliri we Uyghur jama'etliri bilen körüshti. 2014-Yili 22-mart, sitokholm.

D u q re'isi rabiye qadir xanim shiwétsiye parlaménttiki guwahliq bérish yighinidin kéyin, shiwétsiyediki Uyghur teshkilat mes'ulliri we Uyghur jama'etliri bilen körüshti. 2014-Yili 22-mart, sitokholm.

Dunya Uyghur qurultiyining re'isi rabiye qadir xanim shiwétsiye parlaménttiki guwahliq bérish yighinigha qatnishish üchün sitokholmgha yitip kelgen bolup, u shiwétsiyediki pa'aliyetlirining küntertipi boyiche shiwétsiyede pa'aliyet qiliwatqan teshkilat mes'ulliri we Uyghur jama'etliri bilen körüshti.

3-Ayning 22-küni chüshtin kéyin rabiye qadir xanim dunya Uyghur qurultiyining bayanatchisi dilshat rishit, Uyghur komitétning mes'uli abdushükür samsaq hemrahliqida shiwétsiye Uyghur ma'arip uyushmisini ziyaret qildi.

Uyghur ma'arip uyushmisining mes'uli nijat turghun bashliq idare hey'et ezaliri, Uyghur ma'arip uyushmisining merkizide ularni kütüwaldi.

Bu uchrishishta rabiye qadir xanim shiwétsiyediki “ Ereb xewer merkizi ”ning muxbirining ziyaritini qobul qildi.

Muxbirning ziyaritidin kéyin Uyghur ma'arip uyushmisining re'isi nijat turghun uyushmining xizmet pa'aliyetliridin melumat berdi. Arqidin rabiye qadir xanim dunya Uyghur qurultiyining xizmetlirini anglatti.

Rabiye qadir xanim shiwétsiyede pa'aliyet qiliwatqan teshkilat mes'ulliridin birlikte, hemkarliq asasida xizmet élip bérishni telep qildi.

Rabiye qadir xanim ziyaritimizni qobul qilip, bügünki pa'aliyiti heqqide toxtaldi.

Shiwétsiyede pa'aliyet qiliwatqan Uyghur komitétning orunlashturushi bilen 23-küni chüshtin kéyin sitokholmgha qarashliq wenlinyi ammiwi pa'aliyet zalida rabiye qadir xanimni qarshi élish we noruz bayrimini tebriklesh pa'aliyiti ötküzüldi. Pa'aliyetke shiwétsiyede yashawatqan Uyghur jama'etliridin köp sanda kishi qatnashti.

Pa'aliyette rabiye qadir xanim dunya Uyghur qurultiyining xizmetliri heqqide jama'etke melumat berdi. Pa'aliyet dawamida rabiye qadir xanim riyasetchilikide Uyghur komitétning ishxana élishi üchün i'ane toplash pa'aliyiti élip bérildi, Uyghur jama'iti birdek bes-beste pul i'ane qilishti.

Pa'aliyet axirida köpchilik noruzni tebriklesh üchün sélin'ghan mol noruzluq dastixan'gha daxil boldi, Uyghur jama'iti birdek rabiye qadir xanimgha we dunya Uyghur qurultiyining bundin kéyinki xizmetlirige utuq tilidi.

Rabiye qadir xanim pa'aliyet axirida ziyaritimizni qobul qilip, bügünki pa'aliyetni xulasilidi.