D u q aliy rehberliri shiwétsiyede chaqirilghan yighinda yérim yilliq pa'aliyet pilanini békitti

Dunya Uyghur qurultiyi rehberlik hey'iti yighin chaqirip bu yil 7-aydin kéler yili 3-ayghiche bolghan xizmet pilani heqqide muzakire élip bérip pa'aliyet pilanini békitti.

6-Ayning 14-künidin 17-künigiche shiwétsiye Uyghur komitéti qurulghanliqining 10 yilliqini xatirilesh munasiwiti bilen uyushturulghan pa'aliyetke qatnashqan dunya Uyghur qurultiyi rehberliri bu pa'aliyet jeryanida bir yerge jem bolup, d u q ning xizmet pilanini közdin köchürdi. Stokholmda d u q re'isi rabiye qadir xanimning riyasetchilikide chaqirilghan bu yighin'gha d u q ning yuqiri derijilik rehberliridin séyit tümtürk, dolqun eysa, qehriman ghojamberdi, dilshat rishit, esqer jan, turghunjan alawuddin, esqer jan we nurmemet rozaxun qatarliqlar qatnashti. Yighinining échilish nutqini d u q re'isi rabiye qadir xanim qildi. Arqidin d u q ijra'iye komitéti mudiri dolqun eysa ependi yighinning kün tertipini otturigha qoyghandin kéyin yighinning küntertipni chöridigen halda muzakire élip bérilghan.

Yighinda nuqtiliq halda 5-iyul ürümchi weqesining 4-yilliqi munasiwiti bilen dunyaning herqaysi jaylirida élip bérilidighan pa'aliyetlerning teyyarliq xizmitining emeliylishish ehwali we élip bérilidighan konkrét pa'aliyetler heqqide muzakire élip bérilip békitilgen. Bu heqte téximu tepsiliy melumat élish üchün d u q ijra'iye komitéti mudiri dolqun eysa ependi bilen téléfon söhbiti élip barduq. U yighinda maqullan'ghan 7-aydin 2014-yili 3-ayghiche amérika, yawropa döletliri, kanada we bashqa döletlerde élip bérilidighan pa'aliyetler heqqidiki pilan heqqidimu melumat berdi.