Ситокһолмдики уйғур яшлирини тәрбийәләш курси нәтиҗилик ахирлашти

Ихтиярий мухбиримиз әкрәм
2017-10-16
Елхәт
Пикир
Share
Принт
Ситокһолмдики уйғур яшлирини тәрбийәләш курсидин көрүнүш. 2017-Йили 15-өктәбир, шиветсийә.
Ситокһолмдики уйғур яшлирини тәрбийәләш курсидин көрүнүш. 2017-Йили 15-өктәбир, шиветсийә.
RFA/Ekrem

Уйғур яшлирини демократийә, кишилик һоқуқ, қануний билимләр билән тәрбийәләш курси 15-өктәбир ахирлашти.

13-Өктәбир шиветсийә пайтәхти ситокһолмда башланған уйғур яшлирини демократийә, кишилик һоқуқ вә қануний билимләр билән тәрбийәләш курси рәсмий башланған иди. Курсниң 2-күнидин башлап, курисқа қатнашқан уйғур яшлириға муһаҗирәттики уйғур сиясий һәрикитиниң өтмүши вә бүгүни, америка вә явропадики дипломатик паалийәтләрниң тәрәққият әһваллири, уйғур тәшкилатлириниң вәзийити қатарлиқлар тонуштурулди. Америкадин кәлгән өмәр қанат, нурй түркәл әпәндиләр бу һәқтә мәхсус лексийә сөзлиди.

14-Өктәбир күнидики курста, вакаләтсиз милләтләр тәшкилатиниң хадими лусия ханим, д у қ программа йетәкчиси питер ирвен вә қурултай хадими райин әпәндиләр уйғур дәвасини явропа парламенти, б д т вә явропадики демократик дөләтләрдә хәлқара сәвийәдә елип беришниң йоллири вә буниң уйғур дәвасиға көрситидиған тәсирлири һәққидә лексийә сөзлиди. Буниң билән курсқа қатнашқан яшлар уйғур дәвасиниң хәлқарадики әң йеңи йүзлиниши һәққидә көплигән билимләргә игә болди.

Бирқанчә күнлүк курста сөзләнгән дәрсләр уйғур яшлириниң зор қизиқишини қозғиди. Дәрс җәрянида соал-җаваплар болуп, муһаҗирәттики уйғур сиясий һәрикитидин йетәрлик савати болмиған, уйғур дәвасиниң хәлқарадики сәвийиси һәққидә билмәйдиған яшлар көп нәрсиләрни биливалди. Бу дәрсләр җәрянида йәнә уйғур мәсилисини иҗтимаий таратқулардин пайдилинип тәрәққий қилдурушниң илмий йолири, дипломатик күрәш вә алақиларниң тактикилириму тәпсилий өгитилди.

Курс давамида бәзи яшлар бу курсқа болған инкаслирини билдүрди. Шиветсийәдики университетта оқуйдиған бир уйғур қизи өз тәсиратлирини билдүрүп өтти. Йәнә бир уйғур йигитиму бу курсқа болған қарашлирини билдүрди. Финландийәдин келип бу курсқа қатнашқан бир қиз болса, қайтип барғандин кейин уйғур сиясий паалийәтлирини өз дөлитидә қанат яйдуридиғанлиқини баян қилди.

Д у қ яшлар комитетиниң мудири ғәюр қурбан әпәнди бу һәқтә тохталғанда, бу қетимқи курсниң нәтиҗилик болғанлиқини муәййәнләштүрди.

Бу йәрдә курс әһлиниң диққитини җәлп қилған дәрсләрдин бири, хәлқара кәчүрүм ташкилати хадими фокис ханимниң нутқи вә алақә һәққидә өткән дәрси болди. Бу дәрс әмәлий тәҗрибә билән бирләштүрүлүп өтүлгән болғач, күлкә-чахчақ, қизиқиш вә һаяҗан ичидә давам қилди. Сәһнигә тәклип қилинған тартинчақ яшлар өзидики қорунушни тәрк етишкә мәҗбурлинип, кишиләр билән болған алақидә, нутуқ җәһәттә дадил, үнүмлүк болушниң йоллирини өгәнди.

15-Өктәбир чүштин кейин 3 күнлүк бу курс ахирлашти. Йепилиш мурасимида д у қ рәиси рабийә ханим нутуқ сөзләп, яшлардин күтидиған үмид-истәклирини билдүрди. Бу курсқа саһибханилиқ қилған шиветсийә уйғур маарип уюшмиси шәрқий түркистанниң ай-юлтузлуқ көкбайрақи вә гербиниң сүрити чүшүрүлгән шарпини д у қ рәһбәрлиригә мукапат сүпитидә тәқдим қилди. Ахирида курсантларға гуваһнамә тарқитип берилди.

13-Нөвәтлик уйғур яшлирини демократийә, кишилик һоқуқ вә қануний билимләр билән тәрбийәләш курсини д у қ, вакаләтсиз милләтләр тәшкилати, шиветсийә уйғур маарип уюшмиси бирликтә уюштурған вә америкадики демократийини илгири сүрүш фонди (NED) маддий җәһәттин қоллиған иди.

Пикирләр (0)
Share
Толуқ бәт