D u q rehberliri yawropa parlaméntidiki ziyaritini dawam qilmaqta

Ixtiyariy muxbirimiz ekrem
2018-03-22
Élxet
Pikir
Share
Print
D u q re'isi dolqun eysa we ijra'iye komitéti re'isi ömer qanat ependiler yawropa parlaménti aldida. 2018-Yili 19-mart, biryussél bélgiye.
D u q re'isi dolqun eysa we ijra'iye komitéti re'isi ömer qanat ependiler yawropa parlaménti aldida. 2018-Yili 19-mart, biryussél bélgiye.
RFA/Ekrem

Dunya Uyghur qurultiyining rehberliri bélgiye paytexti biryusséldiki yawropa parlaméntida élip bériwatqan ziyaretlirini dawam qilmaqta.

Norwégiye paytexti oslodiki "Nobél erkinlik sariyi" da ötküzülgen ilmiy muhakime yighini hemde Uyghur yashlirini démokratiye, kishilik hoquq we qanuniy bilimler bilen terbiyelesh kursi qatarliq bir yürüsh pa'aliyetlirini 18-mart küni axirlashturghan d u q ning re'isi dolqun eysa we qurultay ijra'iye komitétining re'isi ömer qanat ependiler 19-mart küni bélgiye paytexti biryussélgha yétip kélip, yawropa parlaméntida élip baridighan 5 künlük ziyaritini resmiy bashlidi.

D u q ning re'isi dolqun eysa we qurultay ijra'iye komitétining re'isi ömer qanat ependilerning bügün biryusséldin bergen melumatigha asaslan'ghanda, ular 20-marttin bashlap yawropa parlaméntining bir qisim ezaliri bilen körüshken hemde yawropa parlaméntida 2017-yili 19 -öktebirde qurulghan "Uyghur dostluq guruppisi" ning ezaliri bilen söhbetler élip barghan. Ular bilen Uyghurlarning nöwettiki weziyiti heqqide sözlishishler ötküzgen.

D u q ijra'iye komitétining re'isi ömer qanat ependining bildürüshiche, ular parlamént ezaliri bilen uchrishish élip bérish bilen birge bélgiyediki Uyghur jama'iti bilenmu söhbetler ötküzüp, 4-ayning 27-küni yawropa ittipaqining merkizide élip baridighan 5 ming kishilik namayishning seperwerliki xizmetlirini qanat yaydurghan.

Dolqun eysa ependi, bu qétim yawropa parlaméntida élip bériwatqan ziyaretliri dawamida parlamént ezaliri bilen kélechekte qilmaqchi bolghan bezi xizmetlerning pilan-programmilirini tüzgenlikini eskertti.

Ömer qanat ependining bayan qilishiche, qurultay rehberliri ikki kündin buyan yawropa parlaméntidiki "Uyghur dostluq guruppisi" ning bashliqi ilxan küchük ependi qatarliq kishiler bilen ayrim-ayrim söhbetler ötküzüp, Uyghurlarning nöwettiki weziyitini anglatqan hemde 27-apréldiki namayish mesilisini ortaq muzakire qilghan.

Dolqun eysa ependining yawropa parlaméntida élip baridighan pa'aliyetliri yene 3 kün dawamlishidighan bolup, u aldimizdiki künlerde yawropa parlaméntining yene bir qisim ezaliri bilen uchrishishlar ötküzidiken. Melum bolghinidek, d u q ning re'isi dolqun eysa ependi öz nöwitide yene wekaletsiz milletler teshkilatining mu'awin re'isi bolup, 23- we 24-mart künliri u biryussélda chaqirilidighan wekaletsiz milletler teshkilati (UNPO) ning ijra'iye komitéti yighinigha qatnishidiken. Uningdin bashqa, 27-aprél ötküzülidighan biryusséldiki 5 ming kishilik namayishning teyyarliq xizmetliri bilen meshghul bolidiken.

Ömer qanat ependining eskertishiche, 4-ayning 26-küni yawropa parlaméntida Uyghur élidiki "Terbiyelesh merkizi" dep atalghan jaza lagérliri heqqide mexsus ilmiy muhakime yighini ötküzülidighan bolup, bu yighin'gha köp sandiki parlamént ezaliri ishtirak qilidiken.

D u q rehberliri yawropa parlaméntidiki ziyaretliri dawamida wakaletsiz milletler teshkilatining biryusséldiki bash shtabini ziyaret qilghan hemde nöwette yolgha qoyidighan pa'aliyetler toghrisida ular bilen muzakiriler élip barghan.

D u q rehberlirining bildürüshiche, aldimizdiki ayda bélgiye paytexti biryussélda d u q ijra'iye komitétining kéngeytilgen yighini, "3-Nöwetlik sherqiy türkistan istratégiye muhakime yighini", "Sherqiy türkistandiki yighiwélish lagérliri heqqide doklat bérish yighini" hemde 27-apréldiki 5 ming kishilik namayishtin ibaret 4 chong pa'aliyet ötküzülidiken. Ularning bu qétimqi biryussél ziyariti mushu 4 yighinning teyyarliq xizmetlirini toluq tamamlashnimu muhim bir meqset qilghan iken. Bolupmu 27-aprél yawropa parlaménti aldida ötküzülidighan Uyghurlarning 5 ming kishilik zor namayishigha aldin teyyarliq qilish ishi ularning bu qétimqi biryussél ziyaritining muhim küntertipliridin bir iken.

Toluq bet