Д у қ рәисиниң явропа парламентидики зияритиниң асаслиқ темиси: «җаза лагерлири» мәсилиси

Ихтиярий мухбиримиз әкрәм
2018-09-04
Елхәт
Пикир
Share
Принт
явропа парламенти әзаси вә «уйғур достлуқ гурупписи» ниң қош рәиси чсаба согар әпәнди. 2018-Йили 4-сентәбир, бирюссел.
Явропа парламенти әзаси вә «уйғур достлуқ гурупписи» ниң қош рәиси чсаба согар әпәнди. 2018-Йили 4-сентәбир, бирюссел.
RFA/Ekrem

Д у қ рәиси долқун әйса җаза лагерлири мәсилисини күнтәртипкә көтүрүш үчүн явропа парламентидики бир һәптилик зияритини башлиди.

3-Сентәбир белгийә пайтәхти бирюсселдики явропа парламентида елип баридиған бир һәптилик зияритини башлиған д у қ рәиси долқун әйса әпәнди, бу қетимқи зиярәтниң асаслиқ мәқситиниң хәлқарада қизиқ тема болуватқан уйғур дияридики «җаза лагерлири» мәсилиси икәнликини билдүрди.

Бүгүн 4-сентәбир күни явропа парламентидин телефон зияритимизни қобул қилған долқун әйса әпәнди, бу қетимқи зияритидә явропа парламентида 2017-йили 19-өктәбир қурулған «уйғур достлуқ гурупписи» әзалири билән җаза лагерлири мәсилиси тоғрисида җиддий сөһбәтләр елип баридиғанлиқини, явропа иттипақиға әза бир қисим ғәрб демократик дөләтлириниң явропа парламентидики әлчилири, явропа иттипақи ташқи ишлар министирлики хадимлири билән һәмдә бирюсселдики нопузлуқ кишилик һоқуқ тәшкилатлириниң мәсуллири билән айрим-айрим сөһбәтләр өткүзүп, явропа парламентиниң уйғур дияридики җаза лагерлири мәсилиси һәққидә қарар қобул қилип, хитайға үнүмлүк рәвиштә бесим ишлитишини қолға кәлтүрүшкә тиришидиғанлиқини билдүрди.

Долқун әйса әпәнди бу қетимқи зиярити җәрянида йәнә, белгийә һөкүмәт хадимлири биләнму мәхсус учришишлар өткүзүп, бу йил 11-айда б д т да өткүзүлидиған хитайниң кишилик һоқуқ вәзийитини көздин көчүрүш йиғинида уйғур дияридики җаза лагерлирини тақаш тоғрилиқ белгийә даирилириниң актип һәрикәт қилишини тәләп қилидикән.

Д у қ диний ишлар комитетиниң мудири, явропа шәрқий түркистан бирлики тәшкилатиниң рәиси вә шәрқий түркистан өлималар бирликиниң әзаси болған турғунҗан алавудин әпәнди бу һәқтә тохталғанда, америка вә б д т да җаза лагерлири мәсилиси күнтәртипкә кәлгән бундақ бир вәзийәттә, явропа иттипақиниңму паал һәрикәт қилишини үмид қилидиғанлиқини, д у қ рәисиниң бу қетимқи зияритиниң түп мәқситиниң явропа парламентида үнүмлүк қарар чиқиришқа түрткә болуш икәнликини тилға алди.

Д у қ рәиси долқун әйса әпәнди бүгүн явропа парламентида явропа комиссийони ташқи ишлар комитети тәрипидин түзүлгән «дунядики диний етиқад әркинликлири» доклатиниң елан қилиниш мурасимиға қатнашқан. Доклатта уйғур дияри вәзийити вә диний етиқади тәһдиткә учриған уйғурлар мәсилисиму тилға елинған.

Долқун әйса әпәндиниң явропа парламентида елип баридиған зиярити 9-айниң 9-күнигә қәдәр давамлишидиған болуп, бу җәрянда у бәзи дөләтләрниң явропа иттипақидики вәкиллири вә бәзи парламент әзалири билән ички учришишлар өткүзидикән.

Пикирләр (0)
Share
Толуқ бәт