D u q re'isining yawropa parlaméntidiki ziyaritining asasliq témisi: "Jaza lagérliri" mesilisi

Ixtiyariy muxbirimiz ekrem
2018-09-04
Élxet
Pikir
Share
Print
Yawropa parlaménti ezasi we "Uyghur dostluq guruppisi" ning qosh re'isi chsaba sogar ependi. 2018-Yili 4-séntebir, biryussél.
Yawropa parlaménti ezasi we "Uyghur dostluq guruppisi" ning qosh re'isi chsaba sogar ependi. 2018-Yili 4-séntebir, biryussél.
RFA/Ekrem

D u q re'isi dolqun eysa jaza lagérliri mesilisini küntertipke kötürüsh üchün yawropa parlaméntidiki bir heptilik ziyaritini bashlidi.

3-Séntebir bélgiye paytexti biryusséldiki yawropa parlaméntida élip baridighan bir heptilik ziyaritini bashlighan d u q re'isi dolqun eysa ependi, bu qétimqi ziyaretning asasliq meqsitining xelq'arada qiziq téma boluwatqan Uyghur diyaridiki "Jaza lagérliri" mesilisi ikenlikini bildürdi.

Bügün 4-séntebir küni yawropa parlaméntidin téléfon ziyaritimizni qobul qilghan dolqun eysa ependi, bu qétimqi ziyaritide yawropa parlaméntida 2017-yili 19-öktebir qurulghan "Uyghur dostluq guruppisi" ezaliri bilen jaza lagérliri mesilisi toghrisida jiddiy söhbetler élip baridighanliqini, yawropa ittipaqigha eza bir qisim gherb démokratik döletlirining yawropa parlaméntidiki elchiliri, yawropa ittipaqi tashqi ishlar ministirliki xadimliri bilen hemde biryusséldiki nopuzluq kishilik hoquq teshkilatlirining mes'ulliri bilen ayrim-ayrim söhbetler ötküzüp, yawropa parlaméntining Uyghur diyaridiki jaza lagérliri mesilisi heqqide qarar qobul qilip, xitaygha ünümlük rewishte bésim ishlitishini qolgha keltürüshke tirishidighanliqini bildürdi.

Dolqun eysa ependi bu qétimqi ziyariti jeryanida yene, bélgiye hökümet xadimliri bilenmu mexsus uchrishishlar ötküzüp, bu yil 11-ayda b d t da ötküzülidighan xitayning kishilik hoquq weziyitini közdin köchürüsh yighinida Uyghur diyaridiki jaza lagérlirini taqash toghriliq bélgiye da'irilirining aktip heriket qilishini telep qilidiken.

D u q diniy ishlar komitétining mudiri, yawropa sherqiy türkistan birliki teshkilatining re'isi we sherqiy türkistan ölimalar birlikining ezasi bolghan turghunjan alawudin ependi bu heqte toxtalghanda, amérika we b d t da jaza lagérliri mesilisi küntertipke kelgen bundaq bir weziyette, yawropa ittipaqiningmu pa'al heriket qilishini ümid qilidighanliqini, d u q re'isining bu qétimqi ziyaritining tüp meqsitining yawropa parlaméntida ünümlük qarar chiqirishqa türtke bolush ikenlikini tilgha aldi.

D u q re'isi dolqun eysa ependi bügün yawropa parlaméntida yawropa komissiyoni tashqi ishlar komitéti teripidin tüzülgen "Dunyadiki diniy étiqad erkinlikliri" doklatining élan qilinish murasimigha qatnashqan. Doklatta Uyghur diyari weziyiti we diniy étiqadi tehditke uchrighan Uyghurlar mesilisimu tilgha élin'ghan.

Dolqun eysa ependining yawropa parlaméntida élip baridighan ziyariti 9-ayning 9-künige qeder dawamlishidighan bolup, bu jeryanda u bezi döletlerning yawropa ittipaqidiki wekilliri we bezi parlamént ezaliri bilen ichki uchrishishlar ötküzidiken.

Toluq bet