Yawropa parlaméntidiki 5 partiye jaza lagérliri toghrisidiki so'algha imza qoydi

Ixtiyariy muxbirimiz ekrem
2018-09-10
Élxet
Pikir
Share
Print
D u q ning re'isi dolqun eysa ependi yillardin buyan Uyghurlar mesilisining yawropa parlaméntida küntertipke kélishi üchün küch chiqiriwatqan yawropa parlaméntining muhim ezaliridin tirimosa balchélis ependi bilen. 2018-Yili 5-séntebir, biryussél.
D u q ning re'isi dolqun eysa ependi yillardin buyan Uyghurlar mesilisining yawropa parlaméntida küntertipke kélishi üchün küch chiqiriwatqan yawropa parlaméntining muhim ezaliridin tirimosa balchélis ependi bilen. 2018-Yili 5-séntebir, biryussél.
RFA/Ekrem

3-Séntebir yawropa parlaméntidiki 5 chong partiye Uyghur diyaridiki jaza lagérlirigha munasiwetlik so'allargha imza qoyup, yawropa komissiyoni we tashqi ishlar ministirliqigha yollighan.

3-Séntebirdin bashlap yawropa parlaméntida Uyghur diyaridiki jaza lagérlirini taqash heqqide mujadile qiliwatqan dunya Uyghur qurultiyining re'isi dolqun eysa ependi yawropa parlaméntidiki 5 chong partiyening bügün Uyghur diyaridiki jaza lagérlirigha munasiwetlik so'allargha qol qoyghanliqini we bu so'allarni komissiyonining mu'awin re'isige, tashqi ishlar ministirliqigha sun'ghanliqini bildürdi.

Dolqun eysa ependi bu xushxewerni bügün bélgiye paytexti biryusséldin dölet xadimliri bilen bolghan muhim bir uchrishish pilanigha bina'en gérmaniye paytexti bérlin'gha qarap yolgha chiqishtin ilgiri ashkarilidi.

D u q rehberlirining bildürüshiche, qurultay xadimliri bu yil 27-aprél biryussélda ötküzülgen "5 Ming kishilik namayish" ning aldi-keynidin bashlapla yawropa parlaméntidiki pa'aliyetlirini zor küch bilen janlandurghan. Ular muhajirettiki Uyghurlar teminligen 700 ge yéqin kishining a'ile-tawabi'atlirining jaza lagérlirigha qamalghanliqigha a'it imzalarni parlaméntqa, yawropa kéngishige we yawropa parlaméntining tashqi ishlar komitétigha tapshurghan. Shuninggha ulapla bu yil 5- we 6- aylarda jaza lagérliri toghrisida yawropa parlaméntida "Uyghur dostluq guruppisi" ning sahibxaniliqida arqa- arqidin guwahliq bérish yighinliri uyushturghan hemde parlaméntning köpligen ezaliri bilen biwasite uchriship, Uyghur diyaridiki jaza lagérlirini taqash toghrisida parlaméntning ünüm béreleydighan jiddiy qararlarni qobul qilishini iltimas qilghan.

Bir heptidin buyan bélgiye paytexti biryusséldiki yawropa parlaméntida ziyarette boluwatqan d u q ning re'isi dolqun eysa ependining bildürüshiche, yawropa parlaméntidiki 5 chong partiye bügün imza qoyghan bu so'allarni "Uyghur dostluq guruppisi" ezalirini öz ichige alghan parlaménttiki bir bölün parlamént ezaliri tüzüp chiqqan. Yawropa parlaméntidiki bu layihige imza qoyghan partiyeler "Yawropa xelq partiyesi", "Yawropa yéshillar partiyesi", "Yawropa erkin démokratlar partiyesi", "Yawropa konsérwatiplar partiyesi" we "Yawropa xristi'an démokratlar partiyesi" qatarliqlardin ibaret iken.

D u q ning biryusséldiki xizmetchi xadimi ré'in ependi bu munasiwet bilen ziyaritimizni qobul qilghanda, yawropa parlaménti xadimlirining Uyghur diyaridiki jaza lagérliri mesilisidin xewersiz emeslikini, d u q ning ötken yili apréldin bashlapla Uyghur diyaridiki jaza lagérliri mesilisini tonutup kéliwatqanliqini, emma yawropadiki 28 döletning, yüzligen partiye- guruhlarning wekilliri toplashqan yawropa parlaméntida qoyuq iqtisadiy we diplomatik munasiwiti bolghan xitayning insan heqliri depsendichilikige uchrawatqan bir millet heqqide, yeni "Xitay özining zémin pütünlüki hem dölet bixeterlikige tehdit sanawatqan" Uyghurlar toghrisida qarar qobul qilishining asan'gha toxtimaydighanliqini tilgha aldi. U mundaq dédi: "D u q bashchiliqida wakaletsiz milletler teshkilati we bashqa hökümetsiz teshkilatlarning izchil tirishchanliqi netijiside sherqiy türkistandiki jaza lagérliri mesilisi yawropa parlaméntida alliqachan tonush mesilige aylinip boldi."

Ré'in ependi sözide yene yawropa parlaméntidiki 5 partiyening bu so'allargha imza qoyghanliqining zor ilgirilesh sanilidighanliqini, mubada yawropa kéngishi bu so'allarni testiqlisa we yawropa parlaméntida qarargha baghlashqa sunsa, buning xitaygha nisbeten zor bésim peyda qilidighanliqini eskertti. U mundaq dédi: "Yawropa parlaméntining ish pirinsipi boyiche, qarar qobul qilishtin ilgiri so'al tapshurulidu. Bu choqum bésip ötüshke tégishlik bir qedem basquch. Yawropa kéngishi bu so'allargha asasen xitaydin jawab telep qilidu we xitayni jawab bérishke mejburlaydu. 5 Dölet imza qoyghan bu so'al yawropa kéngishining mu'awin re'isige we tashqi ishlar ministirliqigha yollandi. Yawropa ittipaqining kishilik hoquq prinsiplirigha bina'en ularning choqum jawab bérish mejburiyiti bar. Uningdin kéyin, parlaméntning qarargha baghlishigha sunulidu. Biz buningdin bir ijabiy netije hasil bolushini köp ümid qilimiz."

D u q ning re'isi dolqun eysa ependi sözining axirida yawropa parlaméntining Uyghur diyaridiki jaza lagérliri mesilisige jiddiy köngül bölüwatqanliqini, pat arida bu heqte ijabiy bir jawabqa na'il bolushni arzu qilidighanliqini eskertti.

D u q re'isining biryusséldiki pa'aliyetlirini jiddiy axirlashturup gérmaniye paytexti bérlin'gha kélishige hökümet xadimliri bilen bolghan bezi muhim ichki uchrishishlar seweb bolghan. U bügün chüshtin burun bu söhbetlerni axirlashturghan. Chüshtin kéyin u bérlindiki kishilik hoquq teshkilatlirining pa'aliyitige daxil bolidiken hemde ete yene gérmaniye tashqi ishlar ministirliqida jaza lagérlirigha munasiwetlik muhim uchrishishlarni ötküzidiken.

Igilishimizche, dunya Uyghur qurultiyining re'isi dolqun eysa bügün, yeni 10-séntebir küni amérikigha yétip kélip, amérika hökümitining munasiwetlik emeldarliri bilen Uyghur diyaridiki yighiwélish lagérliri mesilisi boyiche muhim uchrishishta bolghan. D u q re'isi dolqun eysaning amérikigha qilghan tuyuqsiz ziyariti we uning tepsilati heqqide kéyinki programmilirimizda dawamliq melumat bérimiz.

Toluq bet