Қарақаштики кәнт секретари: «әрләр қамақта, аяллирини ақсуға пахта тәргили йолға салдуқ»

Мухбиримиз шөһрәт һошур
2017-10-06
Елхәт
Пикир
Share
Принт
Ақту наһийә пилал йеза тазилиқ кәнтидин «икки йүзлимичи диний зат» дегән қалпақ билән тартип чиқирилип, амма алдида сазайи қилиниватқан әбәйдулла ясин һаҗим. 2017-Йил 3-июл, ақту пилал йезиси.
Ақту наһийә пилал йеза тазилиқ кәнтидин «икки йүзлимичи диний зат» дегән қалпақ билән тартип чиқирилип, амма алдида сазайи қилиниватқан әбәйдулла ясин һаҗим. 2017-Йил 3-июл, ақту пилал йезиси.
xjakt.gov.cn

Ашкарилинишичә, уйғур аптоном райониниң җәнубидики бәзи җайларда әр әмгәк күчлириниң көпинчиси «йепиқ тәрбийиләш мәркизи» дә болғачқа аһалиләрниң күндилик тирикчилики еғир дәриҗидә қийинлашқан. Өйлиридә әр әмгәк күчлири қалмиған кәнтләрдә анилар вә балилар қонақ оруш, қонақ соқуш қатарлиқ еғир әмгәкләрни қилиш арқилиқ йиллиқ ашлиқ ишләпчиқиришини давамлаштурған болсиму, әмма аилиниң күндилик хираҗитини қамдашта амалсиз қалған. Қарақаш наһийисиниң ақасарай йезисидики даириләр қамақтикиләрниң аилә-тавабатлирини йәни аялларни ақсуға пахта теришқа йолға селиш арқилиқ бу мәсилини һәл қилишқа урунуп баққан.

«Йепиқ тәрбийиләш мәркизи» һәққидики ениқлашлиримиз давамида, бу һәрикәтниң аһалиләрниң һаятиға көрсәткән тәсирлири һәққидә мәлумат соридуқ. Мәлум болушичә, бу һәрикәтниң аһалиләргә нисбәтән роһий, җисманий вә иҗтимаий дәхли-тәрүзлиридин башқа, иқтисадий зийиниму еғир болған. Әмгәк күчидин айрилип қалған аилиләрдә анилар вә өсмүр балилар, пахта териш қатарлиқ җапалиқ әмгәкләргә селинған. Зор бир түркүм тутқун аилә тавабиатлирини ақсуға ишләмчиликкә йолға салған қарақаш наһийисиниң ақасарай йезисидики йәрлик даириләр, улардин 10 кишини бир-биригә четиш вә назарәтчи қоюш арқилиқ уларға қаритаму тәқибләшни давамлаштурған.

Сақчи хадимлири сөзлишишимизни тәвсийә қилған аһалиләрниң баян қилишичә, мәһәллиләрдә әр әмгәк күчлириниң «йепиқ тәрбийиләш мәркизи» гә әвәтилиши мәһәллиниң деһқанчилиқ ишлирини аялларниң үстигә йүклигән. Мәһәллидики яшанған анилар, һәтта еғир-аяқ аялларму, қонақ оруш, қонақ соқуш, әнҗүр топлаш, буғдай тошуш қатарлиқ еғир җисманий әмгәкләрни қилишқа мәҗбур болған. 

Мәлум болушичә, хотәнниң көп қисим җайлирида давам қиливатқан 40 пирсәнт аһалини «йепиқ тәрбийиләш» уқтуруши аһалиләрниң һәр җәһәттики турмушини, җүмлидин сода-тиҗарәтлирини көзгә көрүнәрлик зиянға учратқан.

Пикирләр (0)
Share
Толуқ бәт