Qaraqashning yawa yézisida ige-chaqisiz qalghan bir qisim balilar mektep we yesliler teripidin "Béqiwélin'ghan"

Muxbirimiz shöhret hoshur
2017-10-13
Élxet
Pikir
Share
Print
Aqtu nahiye pilal yéza taziliq kentidiki "Ammini agahlandurush yighini". 2017-Yil 3-iyul, aqtu pilal yézisi.
Aqtu nahiye pilal yéza taziliq kentidiki "Ammini agahlandurush yighini". 2017-Yil 3-iyul, aqtu pilal yézisi.
xjakt.gov.cn

Melum bolushiche, Uyghur aptonom rayonida keng kölemde échilghan yépiq "Terbiyilesh merkezliri" jem'iyette zor bir türküm kichik balilarning ige-chaqisiz qélish hadisisini keltürüp chiqarghan. Muxbirimizning éniqlashliridin melum bolushiche, qaraqash nahiyisining yawa yézisida ige-chaqisiz qalghan bir türküm balilarning beziliri yéziliq merkizi bashlan'ghuch mektep, yene beziliri yesliler teripidin béqiwélin'ghan.

Uyghur aptonom rayonida dawam qiliwatqan keng kölemlik tutqun jeryanda bezi a'ililerdin er-ayal, beziliridin qérindash we ata-aniliri qétilip a'ile boyiche tutqun qilin'ghanliqi üchün ularning nareside bala-chaqilirining aqiwiti radi'o anglighuchilirimizning diqqitini tartti we endishisini qozghidi.

Biz anglighuchilirimizning inkasigha asasen, tutqundin kéyin ige-chaqisiz qalghan balilarning aqiwiti heqqide melumat igelliduq. 

Qaraqash nahiyilik j x idarisi bu heqte melumat bérishni qet'iy ret qildi. Biz, ötken yili qaraqash nahiyilik partkom binasigha mashiniliq hujum qilghan, hujumchilarning yézisi bolghan yawa yézisigha téléfon qilduq. Yéziliq saqchi xadimi zor bir türküm balilarning yépiq "Terbiyilesh merkezliri" seweblik ige-chaqisiz qélish hadisisini inkar qilmidi, emma bu heqte sanliq melumat bérishni ret qildi.

Jüme-bazar kentining saqchisi, terbiyileshke er-ayal we qérindashliri bilen ketken a'ililerning baliliridin bezilirining ikki tughqanlirigha béqishqa bérilgenlikini, pütünley ige-chaqisiz bir türküm balilarning yéziliq merkizi bashlan'ghuch mektep teripidin béqiliwatqanliqini pash qildi.

Biz arqidin yawa yézisidiki bir türküm kent sékrétarlirigha téléfon qilduq. Qoday kentining amanliq mudiri, öz kentidin 7 neper ige-chaqisiz balining yeslide béqiliwatqanliqini pash qildi. Béqiliwatqan balilarning 2 yashtin 4 yash arisida ikenlikini bayan qilghan bu sékrétar, ziyaret qobul qilmasliq heqqide uqturush barliqini eskertip, ilgirilep sorighan so'allirimizgha, jümlidin ikki yashtin kichik, yeni quchaqtiki bowaqlarning aqiwiti heqqidiki so'allirimizgha jawab bérishni ret qildi. 

Mezkur kentte 7 kichik balining ige-chaqisiz qalghanliqi, bu balilarning ata-anisila emes, bowa-momisi we tagha-hammiliriningmu qamaq yaki türmide ikenlik éhtimalliqini ashkarilimaqta. Melum bolushiche, yawa yézisida 22 kent, 30 mingche nopus bar iken.

Toluq bet