Yekende ishsizlarning yighiwélinip "Siyasiy terbiye" uyushturulghanliqi ashkarilandi

Muxbirimiz shöhret hoshur
2018-02-05
Élxet
Pikir
Share
Print
"Yépiq terbiyelesh merkizi" aldida posta turghan saqchilar. 2017-Yil 2-noyabir, korla.
"Yépiq terbiyelesh merkizi" aldida posta turghan saqchilar. 2017-Yil 2-noyabir, korla.
AP Photo/Ng Han Guan

Muxbirimizning dölet shé'iri oqushqa mejburlan'ghanliqi üchün kélip chiqqan özini öltürüwélish weqesini éniqlishi dawamida yeken nahiyiside zor bir türküm kishilerning "Yépiq terbiyilesh merkezliri" de solinip yatqinidin bashqa, 16 yashtin 45 yash ariliqidiki ishsiz kishilerningmu her küni üch qétim yighiwélinip, "Siyasiy terbiye" élip bériliwatqanliqi ashkarilandi. Melum bolushiche, "Terbiyilesh kursi" dep nam bérilgen bu kurstiki atalmish kursantlar gerche öylirige qaytalisimu, emma ularmu oxshashla tenqid, haqaret we tehditlerge uchraydiken.

Melum bolushiche, Uyghur aptonom rayonining bezi jaylirida "Yépiq terbiyilesh merkezliri" din bashqa yene "Ochuq terbiyilesh kursiliri" ningmu barliqi, bu atalmish kursilarda 16 yash bilen 45 yash arisidiki ishsiz ahalilerning yighiwélinip, "Siyasiy terbiye" élip bériliwatqanliqi ashkarilandi.

Igilishimizche, yeken nahiyisining tom'östeng yézisi we yeken bazirining bagh hoyla ahaliler komitéti her küni 150‏-200 arisidiki kishini ahaliler komitétigha yighiwélip, xitay tili öginish we dölet shé'iri yadlashni mejburlimaqtiken.
Ahaliler etigen sa'et 9 din 11 giche, chüshtin kéyin sa'et 2 din 4 kéche we axshimi sa'et 7 din 9ghiche 3 jem'iy 3 qétim yighiwélinmaqtiken. Ulargha künde 6 sa'et etrapida "Siyasiy terbiye" élip bérilmaqtiken. Kent saqchisining bu bayanliridin, bu kurstiki ahaliler peqet 3 waq tamaq we zörür turmush meshghulati üchünla öylirige qaytiwatqan bolup, qalghan waqti asasen dégüdek "Terbiyilesh kursi" gha qatnishish we bayraq chiqirish qatarliq pa'aliyetler bilen ötidiken. Mahiyette ularning pütün kün terbiyiliniwatqanliqi melum boldi.

Ilgiriki éniqlashlirimizda bultur we ozaqi yilliri atush we aqsuning bir qisim jaylirida "Tuwaq échish" we "Mesile tapshurush" namida siyasiy yighinlar échilghanliqi, bu yighinlarda kishilerning özining yaki bashqilarning xataliqlirini pash qilishqa mejburliniwatqanliqi ashkarilan'ghan idi. U chaghdiki yighin peqet heptide bir qétim échilghan we ahaliler toluq qatnashturulghan bolsa, yekende ashkarilan'ghan bu siyasiy yighinlargha peqet 16 yash bilen 45 yash arisidiki ishsiz ahalilerla qatnashturulghan. 

Kent saqchiliri yene ishsiz ahalilerni yighiwélishtiki meqsetning ularning "Ish chiqirip qoyushining aldini élish" üchün ikenlikini yoshurmidi. 
Bu ishsizlar yighiliwélin'ghan atalmish "Kurs" lardimu xuddi jaza lagérliridikige oxshash yighiwélin'ghanlarning tenqid, til-haqaret we tehditke uchraydighanliqi delillendi. 

Ishsizlarni yighiwélip "Terbiyilesh" ning yeken nahiyisidin bashqa jaylardimu yolgha qoyulghan yaki qoyulmaywatqanliqi hazirche melum emes. Eger bu rayonda omumyüzlük yolgha qoyuluwatqan bolsa we Uyghur rayonidiki ishsizlarning mutleq köp qismining Uyghur ikenliki, yézilardiki Uyghurlarning déhqanchiliqning jiddiy pesilliridin bashqa waqitlirida ishsiz ikenliki közde tutulsa, nöwette "Siyasiy terbiyilesh" dégen nam astida jazaliniwatqan Uyghurlar sanining ilgiri otturigha qoyulghan 10 pirsenttin 40 pirsentkiche dégen nisbettinmu yuqiri bolushi texmin qilinmaqta.

Toluq bet