Rustemning hékayisi: “Magistirliq oqush tarixim bar, taksi heydimekchimen!”

Yéqindin buyan Uyghur aptonom rayonidiki herqaysi uchur menbeliride pütün aptonom rayon miqyasida yerlik ahalining yüzminglap ishqa orunlishiwatqanliqi we bu yil öktebir éyida ishsizliq nisbitining 4% ke chüshkenliki arqa - arqidin xewer qilinmaqta. Halbuki, herqaysi sheherlerdiki uchur torlirida közge chéliqiwatqan Uyghur yashlirining xizmet izdesh élanliridiki bezi binormal mezmunlar kishilerning diqqitini tartmaqta.

Tor arqiliq xizmet izdesh hazir Uyghur aptonom rayonida birqeder omumlashqan hadise bolsimu, xizmet izdigüchi hemmila kishining bu yerdin öz könglidikidek xizmet tépip kételishi natayin. Biz ziyaret qilghan rustem ene shundaq Uyghur yashlirining biri. U aspirantliq oqush tarixigha ige Uyghur yashlirining biri bolush süpiti bilen bir mezgil aqsuda ishligen. Emma ayalining xizmet ornining ürümchide bolup qélishi sewebidin er - ayal ikkiylen birnechche yil mabeynide ikki jayda ayrilip yashashqa mejbur bolup qalghan.

Tereqqiyattiki rayonlar ara zor perqning mewjut bolushi tüpeylidin rustem ayalini Uyghur aptonom rayonining siyasiy, iqtisadiy we medeniyet merkizi bolghan ürümchidin aqsugha yötkep kélishni xalimighan, yene kélip ayalining ürümchidiki xizmiti nahayiti yaxshi bolup, aqsugha kelgen halettimu undaq yaxshi xizmetni tapalishigha zadila közi yetmigen. Shuning bilen rustem a'ile ezalirining ikki jayda ayrilip sersan bolush halitige xatime bérish üchün özining aqsudiki kadirliq xizmitidin istipa bérip, a'ilisi bilen jem bolghan halda ürümchide yashash meqsitide ürümchige yénip chiqqan. Emma rustemning magistir aspirantliq oqush tarixigha tayinish arqiliq ürümchidin yaman emes birer xizmet tépiwélish ümidi birer yilche uyaq - buyaqqa chépishtin kéyin axiri köpükke aylan'ghan. Ürümchide héchqandaq jaydin tüzükrek xizmet tapalmighan rustem axiri xizmet telipi anche yuqiri bolmighan, shundaqla kishiler “Pul tépish bir az asan” dep qarighan taksichiliq kespi bilen shughullinish qararigha kelgen. Shundaq bolsimu biz ziyaret qilghan waqitqa qeder özige téxi birer jaydin xewer kelmigenlikini tilgha aldi.

Emma rustem dostliridin we bashqilardin anglighanliri boyiche “Taksichiliq qilghanlar ongayla köp pul tapalaydu” dégen gepning hazir anche bek asasi yoqluqini eskertti. Shundaqla yéngidin oqush püttürüp chiqqan aliy mektep oqughuchilirining hazirqi ehwalda ongayliqche xizmet tapalmaydighanliqini tilgha aldi. Biz uning ürümchide xizmet tapalmasliqigha uning xitay tili sewiyisining qandaq tesiri boluwatqanliqini sorighinimizda, u özining xitay tili jehette xitaylar bilen oxshash sewiyide ikenlikini, xitay tilining özi üchün héchqandaq mesile emeslikini éytip ötti.

Biz rustemning xizmet izdesh sepirige utuq tilep, ziyaritimizni axirlashturghinimizda Uyghur diyaridiki metbu'atlarda zor küch bilen teshwiq qiliniwatqan “Muhebbet üchün shinjangda eng peziletlik yéza oqutquchisi” serlewhilik maqale yadimizgha keldi.

Uningda bayan qilinishiche, ju lina sherqiy shimalda tughulghan xitay qiz bolup, toluq otturini püttürgendin kéyin aliy mektepke ötelmigen. U, 1998 - yili éri nesrullagha egiship atush shehri üstün atush bazirining qayraq kentige köchüp kelgen. Bashlan'ghuch mektepke qosh til oqutquchisi bolup ishqa chüshken. 2014 - Yili oqutquchilar bayrimi harpisida u “Memliket boyiche eng peziletlik yéza oqutquchisi” dégen namgha érishken.

Biz yuqirida körüp ötken bu ikki xil ré'alliq heqqide chet'ellerdiki Uyghurlarning qandaq pikirde ikenlikini bilip béqish üchün amérikida yashawatqan weziyet analizchisi ilshat hesen ependini ziyaret qilduq.

U Uyghur yashlirining xizmet we ishqa orunlishishida köp uchraydighan bu xil hadisining ashkara shekildiki milliy kemsitish siyasitining netijisi ikenlikini, buningdiki asasliq meqset xitay köchmenlirini Uyghurlar diyarigha téximu köplep köchüp kélishke righbetlendürüshtin bashqa nerse emeslikini tekitlidi.