Kanada sherqiy türkistan jem'iyiti quruldi

Muxbirimiz gülchéhre
2018-10-17
Élxet
Pikir
Share
Print
Kanada sherqiy türkistan jem'iyitining re'isi aktip siyasiy pa'aliyetchi tuyghun abduweli ependi.
Kanada sherqiy türkistan jem'iyitining re'isi aktip siyasiy pa'aliyetchi tuyghun abduweli ependi.
RFA/Ekrem

Kanada dunyadiki chong döletlerdin biri shundaqla Uyghurlar dawamliq köpiyiwatqan bir dölet. Nöwettiki Uyghur élining jiddiy weziyiti, chet'ellerdiki Uyghur dewasini yenimu küchlük anglitishqa bolghan teqezza, kanadadiki Uyghur jama'iti we kanadadiki Uyghur teshkilatlirini birlikke keltürüp, ortaq qollaydighan bir teshkilatini qurup chiqip, bir nishan, bir meqset astigha uyushushigha türtke bolmaqta. Ene shu nishan bilen 2018-yili 14-öktebir küni kanadaning toronto shehiride 200 din artuq Uyghurning qatnishishi bilen "Kanada sherqiy türkistan jem'iyiti" ning qurulush murasimi ötküzülgen.

Murasimda yene mezkur teshkilatning saylam netijisi élan qilin'ghan bolup, toronto, wankowér, montériyal, albérta, kalgari qatarliq 5 sheherdiki Uyghur jama'itining démokratik usulda élip barghan saylimi netijiside 184 awaz bilen 15 yil burun kanadagha yerleshken Uyghur sha'iri, aktip siyasiy pa'aliyetchi tuyghun abduweli mezkur teshkilat re'islikige saylan'ghan. U murasimda ay yultuzluq kök bayraqni söyüp turup, wezipe tapshuruwalghan.

Kanadagha eng burun yerleshken Uyghurlardin Uyghur ziyaliysi shawket ependi kanada sherqiy türkistan jem'iyitining qurulushining we tuyghun abduwelining re'is bolup saylinishining kanada jama'itining ortaq arzusi bilen wujudqa chiqqanliqini bildürdi. U bu yéngi jem'iyetning qurulushining kanadadiki Uyghur jama'itila emes, belki pütün Uyghur xelqige bir xeyrlik ish bolushidin ümidi zor ikenlikini tekitlidi. Shawket ependi yene "Yéngi qurulghan bu teshkilat kanada hökümiti bilen bolghan alaqini kücheytishni eng muhim xizmet süpitide tutushi kérek" dégen qarashlirini otturigha qoydi.

Ziyaritimizni qobul qilghan kanada sherqiy türkistan jem'iyitining re'isi tuyghun abduweli ependi saylamgha özini namzat körsitishke türtke bolghan tashqi küchning nöwette künsayin yamanlishiwatqan Uyghurlar weziyiti bolghan bolsa, ichki küchning izchil dawamlashturuwatqan qelem kürishidin bashqa, 15 yildin buyan özining muhajirettiki hayatida meyli kanadadiki Uyghur teshkilatlirida we yaki dunya Uyghur qurultiyida 8 yil katip bolup xizmetlerni atqurush jeryanida toplighan teshkilatchiliq hem tejribiliri ikenlikini bildürdi.

Tuyghun abduweli ependi gerche kanada sherqiy türkistan jem'iyiti emdila qurulghan yash teshkilat bolsimu, emma teshkilatning 1933-yili qurulghan sherqiy türkistan jumhuriyitining izini bésishni meqset qilghan, sabit damollamning idé'ologiyesini yétekchi idiye asasi qilghan bir Uyghur teshkilati bolush süpiti bilen Uyghurlar dewasini élip baridighanliqini dep bildürdi.

Teshkilat re'isi tuyghun abduweli ependi wezipe tapshuruwalghan künning etisidin bashlap özining 10 türlük xizmet pilani boyiche xizmetlirini bashlighan bolup, teshkilat özining pa'aliyetliri we Uyghurlar heqqide aldimizda ishqa kirishtürülidighan "Tangnuri" tor téléwiziyesi bilen teshwiqat xizmetlirinimu kücheytmekchi iken.

Toluq bet