Коммунизм идеологийиси тәшвиқатиниң қурбанлири(4)

Ихтиярий мухбиримиз әзиз
henipe-alimaxun.jpg Хитай һөкүмәт таратқулири алтай вилайитидики һәнипә алимахунни “милләтләр иттипақлиқидики әң ярқин үлгә” дегән намдики тәшвиқатлириниң бири.
people.cn


“җуңголуқларниң аниси” -  һәнипә алимахун (2)

Алтай вилайитигә қарашлиқ чиңгил наһийисидики һәнипә алимахунниң инсаний муһәббәтни чиқиш қилған һалда һәрқайси милләтләрдин болған йитим балиларни беқивалғанлиқ вәқәсиниң хитайдики һәрқайси таратқуларда “милләтләр иттипақлиқиниң үлгиси” дегән намда кәң тәшвиқ қилиниши һәққидә бир қисим уйғур анилири вә зиялийлири пикир баян қилди. Улар бирдәк буниң хитайдики сиясий тәшвиқатниң еһтияҗи түпәйлидин оттуриға чиққан сүний һадисә икәнликини тәкитләп, өзигә хас қарашларни оттуриға қойди.

Зиярәт җәрянида германийидики гүлнар ханим бу һәқтә сөз қилип, һәнипә алимахунниң бир аддий аял вә ана болуш сүпити билән ташливетилгән бовақларни беқивалғанлиқини униң шәхсий кәчүрмиши билән бивастә мунасивәтлик, дәп қарайдиғанлиқини ейтти. У хитайлар билән уйғурларниң миллий характерида маһийәтлик пәрқләрниң мәвҗутлуқини, хитайлар һәйран қалидиған әхлақ мәсилилириниң көпинчә уйғурлар үчүн сават характерлик билим һесаблинидиғанлиқини алаһидә тәкитлиди. Униң қаришичә, уйғурлар дияридики йәрлик уйғурлар көчмән хитайларниң миллий характерини вә маһийитини чоңқур тонуп йәткәнсери даириләр мушундақ сүни үлгиләргә техиму муһтаҗ болидикән.

Бу һәқтә германийидики раһилә ханим зияритимизни қобул қилип, 2009 - йилидики 5-июл вәқәсидин кейин уйғурлар диярида йәрлик милләт болған уйғурлар билән көчмән хитай аммиси оттурисидики миллий сүркилишниң техиму чоңқурлиған миллий өчмәнликкә айлинип кәткәнликини, хитай һакимийитиниң болса мушу хилдики реаллиқни ташқи дунядин йошуруш үчүн һәнипә ханимдин “үлгилик тип” сүпитидә пайдиланған болуши мумкинликини оттуриға қойди.

Уйғурларда йитим балиларни беқивелишниң һәммила юртларда мәвҗут икәнликини тәкитлигән уйғур маарипчиси абдувәли аюп бу хилдики гүзәл хисләттә һечқандақ бир ғәрәзниң болмайдиғанлиқини  әскәртти. У милләтләр арисидики инақлиқниң сиясий тәшвиқат арқилиқ әмәс, бәлки баравәрлик асасида болуши керәкликини алаһидә тәкитләп өтти.

Бу һәқтә пикир баян қилған сөһбәтдашлиримиздин раһилә ханим хитайниң мушу хилдики тәшвиқат оюнлириниң һазир аллиқачан вақти өткән нәрсигә айлинип қалғанлиқини, униң һечқачан көзлигән мәқситигә йетәлмәйдиғанлиқини тилға алди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.