Kommunizm idé'ologiyisi teshwiqatining qurbanliri(4)

“Junggoluqlarning anisi” -  henipe alimaxun (2)

Altay wilayitige qarashliq chinggil nahiyisidiki henipe alimaxunning insaniy muhebbetni chiqish qilghan halda herqaysi milletlerdin bolghan yitim balilarni béqiwalghanliq weqesining xitaydiki herqaysi taratqularda “Milletler ittipaqliqining ülgisi” dégen namda keng teshwiq qilinishi heqqide bir qisim Uyghur aniliri we ziyaliyliri pikir bayan qildi. Ular birdek buning xitaydiki siyasiy teshwiqatning éhtiyaji tüpeylidin otturigha chiqqan sün'iy hadise ikenlikini tekitlep, özige xas qarashlarni otturigha qoydi.

Ziyaret jeryanida gérmaniyidiki gülnar xanim bu heqte söz qilip, henipe alimaxunning bir addiy ayal we ana bolush süpiti bilen tashliwétilgen bowaqlarni béqiwalghanliqini uning shexsiy kechürmishi bilen biwaste munasiwetlik, dep qaraydighanliqini éytti. U xitaylar bilen Uyghurlarning milliy xaraktérida mahiyetlik perqlerning mewjutluqini, xitaylar heyran qalidighan exlaq mesililirining köpinche Uyghurlar üchün sawat xaraktérlik bilim hésablinidighanliqini alahide tekitlidi. Uning qarishiche, Uyghurlar diyaridiki yerlik Uyghurlar köchmen xitaylarning milliy xaraktérini we mahiyitini chongqur tonup yetkenséri da'iriler mushundaq sün'i ülgilerge téximu muhtaj bolidiken.

Bu heqte gérmaniyidiki rahile xanim ziyaritimizni qobul qilip, 2009 - yilidiki 5-iyul weqesidin kéyin Uyghurlar diyarida yerlik millet bolghan Uyghurlar bilen köchmen xitay ammisi otturisidiki milliy sürkilishning téximu chongqurlighan milliy öchmenlikke aylinip ketkenlikini, xitay hakimiyitining bolsa mushu xildiki ré'alliqni tashqi dunyadin yoshurush üchün henipe xanimdin “Ülgilik tip” süpitide paydilan'ghan bolushi mumkinlikini otturigha qoydi.

Uyghurlarda yitim balilarni béqiwélishning hemmila yurtlarda mewjut ikenlikini tekitligen Uyghur ma'aripchisi abduweli ayup bu xildiki güzel xislette héchqandaq bir gherezning bolmaydighanliqini  eskertti. U milletler arisidiki inaqliqning siyasiy teshwiqat arqiliq emes, belki barawerlik asasida bolushi kéreklikini alahide tekitlep ötti.

Bu heqte pikir bayan qilghan söhbetdashlirimizdin rahile xanim xitayning mushu xildiki teshwiqat oyunlirining hazir alliqachan waqti ötken nersige aylinip qalghanliqini, uning héchqachan közligen meqsitige yételmeydighanliqini tilgha aldi.