Kent sékrétari: ata-anisi terbiyeleshke ekétilgen balilar "Perishtiler mektipi" de oqumaqta

Muxbirimiz shöhret hoshur
2018-08-27
Élxet
Pikir
Share
Print
Yurtidiki uruq-tughqanliri we a'ilisining zulumigha uchrawatqinini ashkarilighan adil abduréhimning lagérgha ekétilgen ayali(yüzi tosuwétilgen), qizi bumeryem, ikki oghli muhemmet we ömer.
Yurtidiki uruq-tughqanliri we a'ilisining zulumigha uchrawatqinini ashkarilighan adil abduréhimning lagérgha ekétilgen ayali(yüzi tosuwétilgen), qizi bumeryem, ikki oghli muhemmet we ömer.
RFA/Arslan

Ashkarilinishiche, kériye nahiyeside ata-anisi tengla yighiwélish lagérgha ekétilgen balilar "Perishtiler mektipi" dep nam bérilgen yataqliq mektepke orunlashturulghan.

Xadimlardin birining melum qilishiche, atalmish perishtiler mektipidin kériye nahiyeside ikkisi bar bolup, buningda 4 yash bilen 18 yash arisidiki 3 mingche bala ata-ana méhri we terbiyesi؛ shundaqla a'ile muhitidin mehrum halette yétishtürülmekte.

Uyghur rayonida "Yighiwélish lagérliri" qurulghandin buyan, bir qisim jaylarda daril'étamlar qurulup yétim balilarning orunlashturulghanliqi ashkarilan'ghan bolsimu, emma ata-anisi tengla lagérgha ekétilgen balilar we ösmürlerning nege we qandaq orunlashturulghanliqi ta hazirghiche sir idi. Shunga biz lagérlar heqqidiki éniqlashlirimiz dawamida, alaqidar xadimlardin bu heqtimu melumat soriduq. Köpinche xadimlar bu heqte melumat bérishtin özlirini qachurdi.

Özining kompartiyege ezaliqqa yéngidin iltimas sun'ghanliqi we muqimliq jehette xizmet körsitishning koyida ikenlikini bayan qilghan, kériyediki bir kent sékrétari, ata-anisi tengla lagérgha ekétilgen balilarning "Perishtiler mektipi" namidiki ikki mektepke orunlashturghanliqini ashkarilidi. Uning bayan qilishiche, bu ikki mektepning biri bir yil burun, yeni, yighiwélish lagérliri resmiy heriketke ötüp yérim yildin kéyin qurulghan. Emma lagérlarning kéngiyishi we qarighuchisiz balilarning téz köpiyishi netijiside, buningdin 4 ay burun "Perishtiler mektipi" ning ikkinchisi berpa qilin'ghan. Melum bolushiche bu ikki mektep, yesli, bashlan'ghuch we ottura mektep sinipliridin teshkillen'gen. Mektepke 4 yash bilen 18 yash arisidiki az dégende 3 mingche bala orunlashturulghan. Bérilgen uchurlardin, bu mektepte nahiyediki qarighuchisiz balilarning yétip qopush we oqush ishining teng élip bériliwatqanliqi melum. Emma ularning bashqurulush tüzümliride we derslik mezmunlirida normal mekteplerdin perqliq mezmunlar bar yoqluqi melum emes., hetta ulargha ata-anisi we nöwettiki weziyet heqqide némiler déyiliwatqanliqi, buning ularning keypiyatigha qandaq tesir körsitiwatqanliqimu éniq emes. Yene mezkur xadimning bayanliridin bu mekteplerning saqchilar teripidin nazaret qiliniwatqanliqi melum emma, balilarning mektep sirtigha chiqishigha we jem'iyettiki kishiler bilen alaqe qilishigha ruxset bar yoqluqi melum emes. Yene melum bolushiche, kériyede bu "Perishtiler mektipi"din bashqa, nahiye bazar ichide bir daril'étam, yétim-yésirlar orni bar bolup, uninggha 4 yashtin kichik balilar orunlashturulghan.

Yuqiriqi uchurlardin kériyede qarighuchisiz qalghan az dégende 3 mingche balining atalmish perishtiler mektipide ikenliki melum ؛ emma ata-ana méhri, terbiyesi we a'ile muhitidin ayrilip qélishning bu balilarning oqushi we turmushigha qandaq konkrét qiyinchiliqlarni élip kelgenliki, rohiy dunyasigha qaysi derijide ziyan-zexmetlerni séliwatqanliqi hazirche melum emes.

Toluq bet