Кәнт секретари керийәдики «пәриштиләр мәктипи» ниң орни қурулмиси һәққидә тохталди

Мухбиримиз шөһрәт һошур
2018-08-28
Елхәт
Пикир
Share
Принт
Мәкит наһийәсидә ата-аниси «тәрбийәләш лагери» ға әкетилгән балиниң дәрядин сүзүвелинған җәсити (сизма нусхиси).
Мәкит наһийәсидә ата-аниси «тәрбийәләш лагери» ға әкетилгән балиниң дәрядин сүзүвелинған җәсити (сизма нусхиси).
RFA/Uyghur

Ашкарилинишичә, керийәдики ата-аниси тәңла йиғивелиш лагериға әкетилгән, аилидә һечқандақ игә-чақиси қалмиған балилар үчүн қурулған икки аталмиш «пәриштиләр мәктипи» дин бири наһийә базирида; йәнә бири болса керийәниң йеңиават йезисида бәрпа қилинған. Алақидар хадим мухбиримиз билән өткүзгән сөһбитиниң бүгүнки қисмида мәзкур икки мәктәпниң ениқ орни, униңға қошна болған идарә-җәмийәтләр вә мәктәпниң бина қурулмиси һәққидә мәлумат бәрди.

Биз керийә наһийәсидә ата-аниси тәңла тәрбийәләшкә әкетилгән вә аилисидә һечқандақ бир қариғучиси қалмиған балиларниң «пәриштиләр мәктипи» намидики икки ятақлиқ мәктәпкә орунлаштурулғанлиқидин хәвәр тапқандин кейин, бу мәктәпләрниң ениқ орни, муһити вә бина қурулмиси һәққидиму мәлумат игилидуқ. Мәлум болушичә, керийә наһийә базирида өткән йили қурулған аталмиш «пәриштиләр мәктипи», наһийә базиридики бир башланғуч мәктәпниң орниға тәсис қилинған; наһийәлик су идариси вә муғула шипаханиси әтрапиға җайлашқан. Бәш қәвәтлик бир бинаси болған бу мәктәп йәсли, башланғуч вә оттура мәктәп синиплирини өз ичигә алған.

2 Миң әтрапида оқуғучиси бар бу мәктәп, бу йил киргәндин кейин, сиғимчанлиқ җәһәттин еһтияҗни қамдиялмиғандин кейин, бу йил 4-айда йеңибағ йезисида «пәриштиләр мәктипи» дин йәнә бири бәрпа қилинған. Мәлум болушичә башланғуч вә йәслидин тәшкилләнгән бу мәктәпниң оқуғучилири илгирики сабиқ мәркизи башланғуч мәктәп вә сабиқ мәркизи йәслидин ибарәт икки орунға орунлаштурулған. Мәлум болушичә, йеңибағдики бу аталмиш пәриштиләр мәктипиниң башланғуч қисми 4 қәвәтлик, йәсли қисми икки қисми қәвәтлик бинадин түзүлгән. Хитай даирилири уйғур районидики йиғивелиш лагерлириниму шәһәр мәркизи яки әтрапиға тәсис қилған, йәни униң мәвҗутлуқини йәрлик аһалиләрниң нәзиридин узақ тутмиған болсиму, әмма уни егиз қоруқ тамлар билән қоршаш арқилиқ лагер ичидики иҗраатларни әл-җамаәттин йошуруп келиватқан иди. Мәлум болушичә, даириләр бу аталмиш пәриштиләр мәктипиниму наһийә вә йезиниң базар мәркизигә тәсис қилған болсиму, униң ичидики әһвалларни әл-җамаәтниң көзидин йирақ тутушқа тиришқан. Мәктәп қоруси сақчилар тәрипидин назарәт қилинғандин башқа, мәктәп тамлириға бихәтәрлик симлири йәни тикәнлик симлар орунлаштурулған.

Уйғур районида бир милйондин артуқ кишиниң йиғивелиш лагериға топланғанлиқи хәвири дуняға ашкариланғандин кейин, бу вәзийәтниң балиларниң һаятиға көрсәткән вә көрсәткүси тәсириму алақидар тәрәпләрдә җиддий әндишә пәйда қилған иди. Илгири ениқлашлиримиз давамида ата-аниси тәрбийәләшкә әкитилгәнләрдин хотәндә 8 яшлиқ әсма сәмәтниң үстигә қайнақсу төкүвалғанлиқи, мәкиттә 9 яшлиқ бир балиниң дәрядин җәсити сүзүвелинғанлиқи қатарлиқ бирқанчә вәқә ашкариланған вә уйғур районидики балилар вәзийитиниң ечинишлиқлиқ икәнликидин бешарәт берилгән иди.

Юқириқи учурлардин керийәдә 3 миңчә балиниң тикәнлик симдин қоршалған мәктәпләрдә, сақчиларниң назарити астида йетиштүрүлүватқанлиқи мәлум. Әмма мәктәп әтрапидики бу сақчиларниң вә у тикәнлик симларниң бу балиларниң роһий дунясиға қандақ тәсир көрситиватқанлиқи һазирчә мәлум әмәс.

Пикирләр (0)
Share
Толуқ бәт