Uyghur rayonida "Yighiwélish lagérliri" peyda qilghan bir qisim qoshumche aqiwetler ashkarilandi

Muxbirimiz shöhret hoshur
2018-12-05
Élxet
Pikir
Share
Print
Melum yézidiki ayallar harwida topa toshuwatqan körünüsh. 2018-Yili 21-séntebir, xoten.
Melum yézidiki ayallar harwida topa toshuwatqan körünüsh. 2018-Yili 21-séntebir, xoten.
AP

Uyghur rayonidiki yighiwélish lagérliri heqqide élip barghan éniqlashlirimiz dawamida alaqidar xadimlar xitay da'irilirining yighiwélish lagérigha ekétilgenlerning a'ile-tawabi'atlirigha qiliwatqan atalmish ghemxorluqliri heqqide melumat berdi.

Déyilishiche, lagérlar seweblik yézilarda emgek küchi qalmighanliqtin, da'iriler, tetilge kelgen aliy mektep oqughuchiliri we töwen'ge chüshken kadirlardin pida'iylar guruppisi teshkillep, ahalilerning déhqanchiliq ishlirini shulargha qildurghan. Ahaliler qerz kopiratiptin alghan qerzini töleshke amalsiz qalghachqa, ulargha bérilgen qerzning ösümini töwenletken.

Xitay da'iriliri xelq'ara sehnilerde, Uyghur rayonida tesis qilghan yighiwélish lagérlirini kespiy terbiye orni dep süpetlewatqan we uning xelqqe qulayliq yaritip bériwatqanliqini teshwiq qiliwatqan bolsimu, emma uning bir "Jaza lagérliri" ikenliki uning Uyghur jem'iyitige körsetken her xil tesirliridin ashkarilinip turmaqta.

Melum bolushiche, qeshqerning melum bir yézisida, nopusning 50% i atalmish terbiyeleshke ekétilgenliki üchün, mehellilerde emgek küchi asasen qalmighan. Alaqidar xadimlardin biri hökümetning atalmish terbiyeleshke ekétilgenlerning a'ilisini tashliwetmigenliki؛ ularning déhqanchiliq ishlirigha yardemlishiwatqanliqini tilgha aldi. Bu xadimning déyishiche, da'iriler ahalilerning türlük pesil xaraktérlik déhqanchiliq ishliridin bashqa, öy rémont qilish ishlirigha qeder jismaniy emgeklerni "Pida'iylar" guruppisigha qildurghan. Bu pida'iylar guruppisi yurtigha qaytqan aliy mektep oqughuchiliri we töwen'ge chüshken xizmet guruppa ezaliridin teshkillen'gen.

Yene alaqidar xadimlarning pash qilishiche, yighiwélish lagérliri peyda qilghan yaman aqiwetlerdin biri yézilardiki qerz kopiratipliri ilgiriki yillarda tarqatqan qerzlerni yighiwélishqa amalsiz qalghan. Kopiratiplar lagérda jan üzgenlerning qerzini sughurta shirketlirige töletküzgen, emma qalghanlirining qerzining ösümini töwenlitishke mejbur bolghan.

Yézidiki melum bir saqchi xadimi, hökümetning atalmish terbiyeleshtikilerning a'ile-tawabi'atlirigha köngül bölüp, ulargha bérilgen qerzning ösümini töwenletkenlikini ilgiri sürdi.

Ötken yili ziyaritimizni qobul qilghan bir a'ile ayali, özige partiye we hökümetning yardem qilip un we kömür bilen teminlewatqanliqini we déhqanchiliq ishlirigha qariship bériwatqanliqini bildürgen idi, emma bu ayal tewe kentning saqchisi bu ayalgha yardem qiliwatqan bu partiye we hökümetning uning yoldishi, besh oghli hem bir küy'oghlini lagérgha eketkenlikini we mezkur a'ilini pütünley emgek küchidin ayriwetkenlikini pash qilghan idi.

Toluq bet