Чәтәлдики “азсанлиқ милләт муһаҗирлар тәшкилати” ниң мәсуллири үрүмчидә

Ихтиярий мухбиримиз һаҗи қутлуқ қадири
2015.09.14
Share on WhatsApp
Share on WhatsApp
muhajirlar-teshkilati-yighin.JPG Чәтәлдики шинҗаңлиқ азсанлиқ милләт муһаҗирлар тәшкилатиниң вәкиллири уйғур аптоном районлуқ ташқи ишлар ишханисиниң өгиниш курсида. 2015-Йили 8-сентәбир, үрүмчи.
RFA/Qutluq

8-Авғусттин башлап хитай һөкүмитиниң тәшкиллиши билән чәтәлләрдики хитай муһаҗирлар тәшкилатлириниң мәсуллири үрүмчигә йиғилип рәсмий уйғур елини вә хитай өлкилирини екскурсийә қилиш паалийитини башлиған.

Хитайниң мәркизи бейҗиңдики дөләт муһаҗирлар ишханиси тор бетиниң бу һәқтики хәвиридә билдүрүлүшичә, уйғур аптоном районлуқ муһаҗирлар ишлири ишханиси дөләт сиртидики “шинҗаңлиқ азсанлиқ милләт муһаҗирлар тәшкилатлири” билән болған алақисини күчәйтиш үчүн австралийә, канада, пакистан, түркийә вә оттура асиядики бир қисим дөләтләрдин болуп йәттә дөләттики “шинҗаңлиқ азсанлиқ милләт муһаҗирлар тәшкилати”ниң мәсуллирини үрүмчигә йиғип рәсмий өгиниш вә екскурсийә қилиш паалийитини башлиған.

Улар үрүмчидә уйғур аптоном районниң рәиси шөһрәт закир билән учришиш елип барған. Учришишта шөһрәт закир уларға уйғур елиниң тәрәққиятини әстайидил көрүп вә өгинип бу һәқтә өзлири туруватқан әлләрдә әтраплиқ тәшвиқат елип беришниң зөрүрлүкини билдүргән. У сөзидә, һәрқайси дөләтләрдики “шинҗаңлиқ азсанлиқ милләт муһаҗирлар тәшкилати” ниң мәсуллири уйғур елиниң муқимлиқиға төһпә қошушиниң зөрүрлүкини, “чәтәлдики миллий бөлгүнчиләргә қарши турушта өзлири билән сәптә туруп, өз дөләтлиридә миллий бөлгүнчиләргә қарши қошун тәшкиллишини үмид қилидиғанлиқи”ни билдүргән.

Уйғур аптоном районлуқ муһаҗирлар ишлири ишханисиниң бу қетимқи паалийитидин толуқ хәвәрдар болған, пакистандики уйғурлардин сейит әршидин хитай муһаҗирлар тәшкилати мәсуллириниң һазир үрүмчи, қанас қатарлиқ җайларда саяһәттә болуватқанлиқини илгири сүрди.

Сейит әршидин бу қетимқи паалийәткә қатнишиватқан бир қисим пакистанлиқ уйғурларниң салаһийити вә уларниң хитай билән йеқинлишиш сәвәблири һәққидә тохталди.
У йәнә, пакистандики уйғур җамаити ичидә паалийәткә қатнишиватқан бу кишиләргә нисбәтән болуватқан түрлүк инкаслар һәққидә тохтилип өтти.

Сөһбитимиз җәрянида сейит әршидин хитайниң бу хилдики паалийәтлирини йилда икки қетим елип баридиғанлиқини ейтти.

Пакистандики мустәқил уйғур кишилик һоқуқ паалийәтчиси абдуқәйюм бу қетимқи хитайниң бу паалийитигә қатнишиватқан уйғурларниң һәргизму пакистандики уйғурларға вәкиллик қилалмайдиғанлиқини билдүрди.

Абдуқеюм сөзидә йәнә, уларниң хитайдики зияритини тамамлап қайтип кәлгәндин кейин, пакистандики бир қисим иқтисади аҗиз кишиләргә ярдәм қилиш арқилиқ өз җәмийәтлиригә әза топлашқа тиришидиғанлиқини әскәртти.

Юқириқи аваз улиништин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.