Уйғурлар норвегийә парламентида учришиш өткүзди

Ихтиярий мухбиримиз әкрәм
2018-04-18
Share
norwegiye-uyghur-parlament.jpg Норвегийә уйғур комитети рәһбәрлири норвегийә парламентида. 2018-Йили 16-апрел.
RFA/Ekrem

Норвегийә уйғур комитети рәһбәрлири 16-апрел күни норвегийә парламент әзалириға уйғурлар мәсилисини аңлатқан.

Норвегийә уйғур комитетиниң рәиси бәхтияр әпәнди тәминлигән учурға асасланғанда, 16-апрел күни норвегийә уйғур комитети вәкиллири норвегийәниң парламент әзалири билән учришиш өткүзүп, уйғур елиниң нөвәттики вәзийитидин мәлумат бәргән.

Бәхтияр әпәндиниң билдүрүшичә, норвегийә уйғур комитетиниң тиришчанлиқи нәтиҗисидә уйғурлар мәсилиси норвегийә парламентидила әмәс, норвегийә хәлқи арисидиму барғансери кәң тонулушқа башлиған болуп, бу қетимқи учришишниң ақивити норвегийәдики уйғур җамаитигә хушаллинарлиқ нәтиҗиләрни елип келиши мумкин икән.

Норвегийәдә яшаватқан дуня уйғур қурултийи иҗраийә комитетиниң муавин рәиси сәмәт абла әпәнди бу һәқтә тохталғанда, 16 -апрел күнидики уйғур тәшкилат рәһбәрлириниң норвегийә парламенти хадимлири билән елип барған учришишлириниң мувәппәқийитигә юқири баһа бәрди.

Норвегийә уйғур комитетиниң рәиси бәхтияр әпәнди, норвегийә парламент әзалири билән болған бу қетимқи учришиш җәрянида уйғур елиниң нөвәттики реал вәзийити һәққидә уларға әтраплиқ мәлуматлар берип, норвегийә парламентиниң уйғур мәсилисигә болған һесдашлиқи вә қоллишини қолға кәлтүрүшкә тиришқанлиқ көрсәткәнликини әскәртти. Сәмәт абла әпәнди, норвегийә һөкүмити вә хәлқигә уйғурлар мәсилисини тонутушниң иҗабий әһмийити һәққидә өз қарашлирини изһар қилип өтти.

Мәлум болғинидәк, 16-март күни д у қ ниң орунлаштуруши билән норвегийәдики "нобел тинчлиқ сарийи" да уйғурлар вәзийитидин мәлумат бериш йиғини өткүзүлгән болуп, бу йиғинғиму норвегийә парламентиниң бир қисим әзалири қатнашқан иди. 17- Вә 18-март күнлири йәнә норвегийәдә уйғур рәһбәрлирини демократийә, кишилик һоқуқ вә қануний билимләр билән тәрбийәләш курси өткүзүлгән вә бу паалийәткә норвегийә уйғур комитети саһибханилиқ қилған.
Норвегийә уйғур комитети алдинқи йили өткүзгән сайлимидин кейин, уйғурлар мәсилисини норвегийә һөкүмити вә хәлқигә тонутуш йолида паал тиришчанлиқларни көрсәтмәктә икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт