Uyghurlar norwégiye parlaméntida uchrishish ötküzdi

Ixtiyariy muxbirimiz ekrem
2018-04-18
Share
norwegiye-uyghur-parlament.jpg Norwégiye Uyghur komitéti rehberliri norwégiye parlaméntida. 2018-Yili 16-aprél.
RFA/Ekrem

Norwégiye Uyghur komitéti rehberliri 16-aprél küni norwégiye parlamént ezalirigha Uyghurlar mesilisini anglatqan.

Norwégiye Uyghur komitétining re'isi bextiyar ependi teminligen uchurgha asaslan'ghanda, 16-aprél küni norwégiye Uyghur komitéti wekilliri norwégiyening parlamént ezaliri bilen uchrishish ötküzüp, Uyghur élining nöwettiki weziyitidin melumat bergen.

Bextiyar ependining bildürüshiche, norwégiye Uyghur komitétining tirishchanliqi netijiside Uyghurlar mesilisi norwégiye parlaméntidila emes, norwégiye xelqi arisidimu barghanséri keng tonulushqa bashlighan bolup, bu qétimqi uchrishishning aqiwiti norwégiyediki Uyghur jama'itige xushallinarliq netijilerni élip kélishi mumkin iken.

Norwégiyede yashawatqan dunya Uyghur qurultiyi ijra'iye komitétining mu'awin re'isi semet abla ependi bu heqte toxtalghanda, 16 -aprél künidiki Uyghur teshkilat rehberlirining norwégiye parlaménti xadimliri bilen élip barghan uchrishishlirining muweppeqiyitige yuqiri baha berdi.

Norwégiye Uyghur komitétining re'isi bextiyar ependi, norwégiye parlamént ezaliri bilen bolghan bu qétimqi uchrishish jeryanida Uyghur élining nöwettiki ré'al weziyiti heqqide ulargha etrapliq melumatlar bérip, norwégiye parlaméntining Uyghur mesilisige bolghan hésdashliqi we qollishini qolgha keltürüshke tirishqanliq körsetkenlikini eskertti. Semet abla ependi, norwégiye hökümiti we xelqige Uyghurlar mesilisini tonutushning ijabiy ehmiyiti heqqide öz qarashlirini izhar qilip ötti.

Melum bolghinidek, 16-mart küni d u q ning orunlashturushi bilen norwégiyediki "Nobél tinchliq sariyi" da Uyghurlar weziyitidin melumat bérish yighini ötküzülgen bolup, bu yighin'ghimu norwégiye parlaméntining bir qisim ezaliri qatnashqan idi. 17- We 18-mart künliri yene norwégiyede Uyghur rehberlirini démokratiye, kishilik hoquq we qanuniy bilimler bilen terbiyelesh kursi ötküzülgen we bu pa'aliyetke norwégiye Uyghur komitéti sahibxaniliq qilghan.
Norwégiye Uyghur komitéti aldinqi yili ötküzgen saylimidin kéyin, Uyghurlar mesilisini norwégiye hökümiti we xelqige tonutush yolida pa'al tirishchanliqlarni körsetmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet