Норвегийә уйғур җәмийитиниң сайлими ғәлибилик өтти
2017.04.10
9-Апрел норвегийәдики уйғур җамаити сайлам өткүзүп, норвегийә уйғур җәмийитиниң рәһбәрлирини йеңидин сайлап чиқти.
Норвегийәдики сайлам мәйданидин игилигән мәлуматларға асасланғанда, норвегийә уйғур җәмийитиниң бу қетимқи сайлими наһайити җиддий вә һаяҗанлиқ елип берилған. Сайламға норвегийәдики көплигән уйғур җамаити қатнашқан, сайлам нәтиҗисидә бәхтияр әпәнди мутләқ көп қисим аваз билән ғәлибә қилип, тәшкилатниң рәиси болған.
Биз сайлам хатимисидә, бу қетим норвегийә уйғур җәмийитидин вәзипә алған тәшкилатниң идарә һәйитидики бир қисим әзаларниң йүрәк авазлирини тиңшаш пурситигә ериштуқ. Бу қетимқи сайламда рәисликкә еришкән бәхтияр әпәнди зияритимизни қобул қилғанда, сайламниң һәқиқәтәнму демократик усулда елип берилғанлиқини тәкитлиди. У сөзидә йәнә, бундин кейин немиләрни қилидиғанлиқиниму әскәртип өтти.
Бу қетимқи сайламда бәхтияр билән рәислик риқабитигә чүшкән сираҗидин әпәндиму бу сайлам һәққидики қарашлирини баян қилип өтти. Тәшкилатниң идарә һәйитигә сайланған патимә ханимму бу сайламниң нәтиҗисидин көп хурсән болғанлиқини билдүрди. Мәзкур тәшкилатниң катипи болуп сайланған адилҗанму сайламдин алған тәсиратлирини ипадә қилди.
Норвегийә уйғур җәмийити мәсуллириниң билдүрүшичә, норвегийәгә уйғурлар тунҗи қетим 1999-йилидин тартип келишкә башлиған. Һазир тәхминән 1500 әтрапида уйғур норвегийәниң һәрқайси шәһәрлиридә яшаватқан болуп, 9-апрел өткүзүлгән сайламға 100 әтрапида киши қатнашқан.