Пакистан билән хитай “қарамай хитабнамиси” ни елан қилди

Ихтиярий мухбиримиз һаҗи қутлуқ қадири
2015-08-17
Share
qaramay-xitabnamisi.jpg Уйғур елиниң қарамай шәһиридә пакистан билән хитай “қарамай хитабнамиси” ни елан қилди. 2015-Йили 12-авғуст, қарамай.
ts.cn

12-Авғуст уйғур елиниң қарамай шәһиридә пакистан билән хитай “қарамай хитабнамиси” ни елан қилди.

11-Авғуст уйғур елиниң нефит шәһири қарамай шәһиридә башланған пакистан-хитай иқтисадий каредорини гүлләндүрүш, кеңәйтиш хәлқаралиқ муһакимә йиғини 12-авғуст ахирлишип икки дөләт ортақ бир мәқсәткә келип “қарамай хитабнамиси” ни қарап чиқип мақуллиған.

12-Авғуст қарамайда елан қилинған пакистан-хитай “қарамай хитабнамиси” ниң мәзмунини тоғрисида икки дөләт мәтбуатлири мәзмун җәһәттин пәрқләнгән һалда хәвәр тарқатти.

Хитайниң нопузлуқ тор бәтлиридин бири болған “хәлқ тори” ниң бу хитабнамә һәққидики хәвиридә: “икки тәрәп сиясий чүшинишни чоңқурлаштуруш, актип һәмкарлиқни қанат яйдуруш,иқтидар қурулушини күчәйтиш”, дегәдәк мәзмунлар тилға елинған.

Хитай мәтбуатлириниң 12-авғусттики бу һәқтики хәвиридә пакистан вәкиллириниң 11-авғуст үрүмчидә уйғур аптоном районлуқ парткомниң секретари җаң чүншйән билән көрүшкәндә икки тәрәп ортақ һалда террорлуққа қарши туруш һәққидә сөһбәтләшкәнликини билдүргән.

Бирақ пакистандин чиқидиған инглиз тилдики “дейли таймес” гезитиниң 16-авғусттики хәвиридә пакистанниң пилан вә ислаһат тәрәққият министири еһсан иқбал “қарамай хитабнамиси” һәққидә мухбирға бәргән баянатида икки дөләт бу қетимқи сөһбәттә асаслиқи пакистанниң аләм бошлуқи техникисини тәрәққий қилдуруш мәсилиси һәққидә келишим һасил қилғанлиқини билдүргән.Әмма икки тәрәп арисидики омумий сода соммисини тилға алмиған шундақла икки дөләтниң терроризмға қарши туруш мәсилиси һәққидә сөһбәтләшкәнликини илгири сүрмигән.

Хәвәрдә,икки тәрәптин бу қетимқи муһакимә йиғиниға җәмий үч йүз кишиниң қатнашқанлиқи көрситилгән.

Хитайниң исламабадтики баш әлчиси сун вейдоң вә пакистанниң бейҗиңда турушлуқ баш әлчиси масоод халидниңму муһакимә йиғиниға иштирак қилғанлиқи әскәртилгән.

Исламабадтики пакистан-хитай тәтқиқат институти “қарамай хитабнамиси” ға: “дөләт рәиси ши җинпиңниң бу йил 4-айда пакистанда елип барған зияритидин кейинки икки дөләт арисида қолға кәлгән бүйүк нәтиҗә” дәп баһа бәргән.

Бу қетимқи йиғинни бейҗиңдики хитай иҗтимаий пәнләр академийәси билән уйғур аптоном райони бирликтә пиланлиған.

Зияритимизни қобул қилған японийәлик иқтисадшунаслардин ямада “қарамай хитабнамиси” һәққидә тохтилип мундақ деди: “‛хитай бир бәлвағ бир йол‚ истратегийәсидә гәрчә пакистандәк иқтисадий аҗиз дөләтләргә көпләп мәбләғ селип, көпрәк пайдиға еришишни ойлишиватқан болсиму, лекин уларда йәнила бир хил әндишә бар. Сәвәби ислам әллиридики ички тоқунуш болуп,вақти кәлгәндә бу хил маҗиралар хитайниң мәблиғини күлгә айландуруп қоюши мумкин”, дәп қараймән.

Биз ахирида “қарамай хитабнамиси”һәққидә бәзи бир қарашларға игә болуш үчүн пакистандики мустәқил уйғур кишилик һоқуқ паалийәтчиси абдуқеюм әпәндим билән бу һәқтә телефон сөһбити елип бардуқ.

Юқириқи аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт