Qeysiridiki Uyghurlar bash ministir binali yildirim bilen körüshti

D u q mu'awin re'isi séyit tümtürk ependi milletchi heriket partiyesi re'isi dölet baghcheli ependi bilen körüshti. 2017-Yili 2-aprél, türkiye.

Türkiyede 4-ayning 16-küni élip bérilidighan asasiy qanun'gha kirgüzülgen tüzitishni maqullash-maqullimasliq heqqide awaz bérish pa'aliyitining teshwiqatini qilish üchün qeyserige kelgen türkiye bash ministiri binali yildirim qeyseridiki jama'et erbabliri, tijaretchi, karxanichilar we ammiwi teshkilat mes'ullirigha ziyapet bergen bolup, ziyapetke sherqiy türkistan medeniyet we hemkarliq jem'iyiti rehberlirimu teklip bilen qatnashqan. Türkiye bash ministiri binali yildirim ependi ziyapette qilghan nutqida 4-ayning 16-küni türkiyede ötküzülidighan dölet bashliqi hökümet quridighan yéngi tüzümge ötüsh üchün, adalet we tereqqiyat partiyesi terghib qilghandek awaz bérishke chaqirghan.

Ziyapetke ishtirak qilghan séyit tümtürk ependi, ziyapet jeryanida bash ministir bilen birlikte ziyapetke ishtirak qilghan dölet ministiri, ministir we parlamént ezalirigha türkiyediki Uyghurlar duchar boluwatqan bezi qiyinchiliqlarni yetküzgen. Ziyapet axirlashqandin kéyin, séyit tümtürk ependi bash ministir binali yildirimning yénigha bérip körüshüp, türkiyege kélip panahliq tiligen musapir Uyghurlarning mesililirini hel qilip bérishini telep qilghan. Bu heqte ziyaritimizni qobul qilghan séyit tümtürk ependi 3-ayning 25-küni türkiyening eng chong öktichi partiyeliridin biri bolghan milletchi heriket partiyesi re'isi dölet baghcheli ependi bilenmu qeyseride körüshüp, Uyghurlarning éghir weziyitini anglatqandin sirt, türkiyediki musapir Uyghurlarning telepliri toghrisida doklat teyyarlap sun'ghanliqini bayan qildi.

Türkiye bash ministiri binali yildirim ependi 4-ayning 2-küni 5 ministir 20 etrapida parlamént ezasi bilen qeyserige yétip kelgen bolup, burun kelgen Uyghurlar bilen yéngi kelgen Uyghurlar ularni birlikte kütüwalghan. Séyit tümtürk ependi bu heqte melumat berdi.

Yéngi kelgen Uyghurlardin dilshat islam ependi yéngi kelgen Uyghurlar turuwatqan qoru‏-jaydin 50-60 Uyghurning qollirida türk bayriqi bilen özlirining kök bayriqini kötürüp bérip, bash ministirning chong meydandiki nutqini anglap kelgenlikini bayan qildi.

4-Ayning 2-küni aqsham sana'etchiler uyushmisida bergen ziyapetke sherqiy türkistan ammiwi teshkilati mes'ulliri teklip qilin'ghan. Bu pa'aliyetke sherqiy türkistan medeniyet we hemkarliq jem'iyiti re'isi séyit tümtürk ependi bilen teshkilatning bayanatchisi abduqadir ishtirak qilip, bash ministirgha Uyghurlarning teleplirini yetküzgen.

Türkiyediki Uyghurlarning sanining köpiyishige egiship qiyinchiliqlirimu köpeymekte. Türkiyede pa'aliyet élip bériwatqan sherqiy türkistan ammiwi teshkilat mes'ulliri bolsa, purset tapqan haman hökümettikiler bilen uchriship, Uyghur musapirlarning qiyinchiliqlirini hel qilip bérishini telep qilmaqta. Undaqta, hazirghiche néme qiyinchiliqlar hel boldi? némiler hel bolmidi? bu heqtiki so'alimizgha jawab bergen séyit tümtürk ependi qeyseridiki Uyghurlarning waqitliq turidighan öy, iqamet we qanunluq ishlesh ruxsitining hel bolghanliqini, emma, heqsiz dawalinish telipi bilen türk puqraliqigha ötüsh telipining téxi hel bolmighanliqini tekitlidi.