Rabiyxan anining kelme désimu kéliwalidighan “Tughqini” - xung chijang heqqidiki shikayetliri

Muxbirimiz shöhret hoshur
2017-03-06
Share
rabiyxan-musa-pasport-xoshna.jpg Rabiyxan musa ana xoshniliri bilen
RFA

Uyghur rayonining yéngi sékrétari chén chüen'goning rehberlikide élip bérilghan xenzu “Tughqan” teqsimatida, bortaladiki qeyser ana rabiyxan musa anigha xung chijang isimlik bir ayal saqchi nésip bolghan. Epsuski, rabiyxan musa anining künige birqanche qétim kélip, sa'etlep olturuwalidighan bu “Tughqan” bilen peqetla purchiqi pishmighan. U, bu “Tughqini”gha mumkin bolsa kelmeslikini, bolmighanda az kélishni yüzidin-yüzige nechche qétimlap dégen bolsimu, u yoqlashni ta bügün'giche toxtatmighan. Axiri rabiyxan ana bu qélin-qattiq “Tughqan”gha özining bu xil tughqandarchiliqtin köngli élishidighanliqini bildürgen, emma bu “Tughqan” bu söznimu har almighan.

Söhbettin melum bolushiche, xung chijang uninggha her küni türlük yémek-ichmeklerni kötürüp kirgen, rabiyxan ana özining iqtisadiy ehwalining yaxshiliqini bildürüp, bu nersilerni qobul qilmighan we yaki bashqilargha bériwetken. Xung chijang qazan béshigha ötüshke urun'ghanda rabiyxan ana, eger uning qoli tégip ketse tamaqni yémeydighanliqini bildürgen؛ xung chijang deslepte qolini yuyidighanliqini tekitlep jahilliq qilghan bolsimu, rabiyxan anining qet'iy ret qilishi bilen qazan béshigha kélelmigen. Rabiyxan anining bayan qilishiche, uning bilen bir binada olturushluq bashqa Uyghurlarningmu mushundaq teqsimlen'gen xenzu “Tughqan” liri bar iken. Rabiyxan ana qoshnilirining özige qarighanda teleylik ikenlikini, yeni ularning u “Tughqan” lirining künde kéliwalmaydighanliqini, öziningki bolsa künige az dégende ikki waq “Yoqlaydighan” liqini, bezide qarangghu kéchide, bezide tang seherde ishikini chékidighanliqini bayan qildi. Xung chijangning ret qilinsimu renjimesliki, qopal gepnimu har almasliqi qatarliq qélin-qattiq mijezi seweblik rabiyxan ana bilen xung chijang arisida bezide töwendikidek di'aloglarmu bolun'ghan:

Xung chijang: men séni yaxshi körimen, sen méni yaxshi köremsen?
Rabiyxan: men séni yaxshi körmeymen, senmu méni yaxshi körmeysen, sen yalghan sözlewatisen, sen emeliyette méni chaynap yutuwetküdek öch körisen.

Xung chijang: bundaq oylima.
Rabiyxan: yaxshi körseng, balamni körüshümni némishqa tosisen?!

Xung chijang: sen yashinip qalghan bolsangmu, mendin eqilliq ikensen, kallang bek téz ishleydiken.
Rabiyxan: elwette. Méning peqet oquyalmay qalghan yérim bar.

Yuqiridiki ulinishtin, norwégiyediki balisini körüsh arzusi tosqunluqqa uchrighan we pasporti tartiwélin'ghan 83 yashliq rabiyxan anining bu yil yanwarda özige teqsimlen'gen we bizar qiliwatqan xenzu “Tughqini” heqqidiki tesiratlirini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet