Yawropa sherqiy türkistan birliki teshkilatigha esqerjan re'is boldi

Yawropa sherqiy türkistan birliki teshkilati rehberlik qatlimida özgertish élip bérip, Uyghur siyasiy zatliridin esqerjan ependini teshkilat re'islikige teyinligen.

Yawropa sherqiy türkistan birliki teshkilati teshwiqat bölümining ijtima'iy taratqulardiki uchurlirigha asaslan'ghanda, gérmaniyediki Uyghur jama'itige wekillik qiliwatqan yawropa sherqiy türkistan birliki teshkilati 2016-yili 11-ayning 6-küni idare hey'iti yighini ötküzüp, gérmaniyediki siyasiy pa'aliyetchi esqerjan ependini idare hey'iti ezalirining birdek maqulluqi bilen mezkur teshkilatning re'islikige teyinligen.

Melum bolushiche, yawropa sherqiy türkistan birliki teshkilati gherb dunyasida, jümlidin yawropada qurulghan tunji Uyghur teshkilati bolup, 1991-yili gérmaniyening myunxén shehiride qurulup pa'aliyet bashlighan. Hazirgha qeder bu teshkilat Uyghur dawasini dunyagha, jümlidin yawropa ellirige tonutush jehette zor netijilerni qolgha keltürüpla qalmastin, yene sabiq “Dunya Uyghur yashliri qurultiyi”, “Sherqiy türkistan (Uyghuristan) milliy qurultiyi” we hazirqi “Dunya Uyghur qurultiyi” qatarliq teshkilatlarning qurulushidimu türtkilik rol oynighan we bu qurultaylargha sahibxaniliq qilghan.

Yawropa sherqiy türkistan birliki teshkilati teshwiqat bölümining uchurlirida: “Esqerjan ependi Uyghur milliy herikitimiz üchün köp pidakarliq körsetken munewwer siyasiy pa'aliyetchilirimizning biri bolup, hazirghiche ilgiri-kéyin, yawropa sherqiy türkistan birliki teshkilatining re'isi, 1998-yili istanbulda qurulghan sherqiy türkistan milliy merkizining mu'awin re'isi, 1999-yili gérmaniyede qurulghan sherqiy türkistan(Uyghuristan) milliy qurultiyining bash katipi, 2004-yili qurulghan hazirqi dunya Uyghur qurultiyining mu'awin re'isi … qatarliq muhim wezipilerde bolghan, shundaqla yuqiriqi pütün teshkilatlarning eng asasliq qurghuchilirining biri idi, esqerjan ependi yene 1992-yili türkiyening istanbul shehiride chaqirilghan tunji nöwetlik sherqiy türkistan milliy qurultiyigha mexsus wekil bolup qatnashqan idi” dégen ibarilerge orun bérilgen.

Biz dunyaning her yerliridiki Uyghur jama'iti hem siyasiy teshkilatlar teripidin birqanche kündin buyan ijtima'iy taratqularda we élxetlerde tebrikliniwatqan esqerjan ependining özini ziyaret qilip, uning re'islikke teyinlen'gendin kéyinki tesiratlirini igiliduq.

Yawropa sherqiy türkistan birliki teshkilatining esli re'isi “Ilham toxti guruppisi” ning mes'uli eniwerjan ependi bolup, u özining mezkur teshkilattin istépa bérishtiki sewebini izahlap ötti. D u q mu'awin re'isi, yawropa sherqiy türkistan birliki teshkilati teshwiqat bölümining mes'uli perhat yurungqash ependimu bu qétimqi teshkiliy özgirish heqqide öz qarashlirini bayan qildi.

Mezkur teshkilatning idare hey'et tarmiqida hazir 9 neper eza bolup, pa'aliyetlirini d u q bilen hemkarliship élip barmaqta.