"1-Nöwetlik sherqiy türkistanliqlar istratégiyilik muhakime yighini" kütülgen meqsetke yettimu?

Ixtiyariy muxbirimiz erkin tarim
2017-03-03
Élxet
Pikir
Share
Print
Siprusta "Sherqiy türkistanliqlar istratégiyilik muhakime yighini" namida ötküzülgen pa'aliyetke qatnashqan bir qisim pa'aliyetchiler yighindin kéyin xatire sürette. 2017-Yili 27-féwral, shimaliy siprus.
Siprusta "Sherqiy türkistanliqlar istratégiyilik muhakime yighini" namida ötküzülgen pa'aliyetke qatnashqan bir qisim pa'aliyetchiler yighindin kéyin xatire sürette. 2017-Yili 27-féwral, shimaliy siprus.
Photo: RFA

"1-Nöwetlik sherqiy türkistanliqlar istratégiyilik muhakime yighini" chet'ellerdiki bir qisim Uyghur tetqiqatchilar, jama'et erbabliri, siyasetchiler we pa'aliyetchilerning ishtirak qilishi bilen 25-féwraldin 27-féwralghiche shimaliy siprus türk jumhuriyitining girne shehiridiki lords palas méhmanxanisida ötküzüldi.

Türkiye istratégiyilik chüshenchiler instituti mutexessisi doktor erkin ekrem ependi yighinning échilish murasimida qilghan sözide, yighinda xelq'ara weziyetning nöwettiki yönilishi we u peyda qilidighan ijabiy-selbiy tesirlerning Uyghurlar mesilisige élip kélidighan aqiwetliri hem buninggha munasiwetlik chare-tedbirlerning muhakime qilinidighanliqini tekitligen idi. Undaqta "Yighindin kütkenler qolgha keltürüldimu?" "Erkin ekremning bezi kör qarashlirigha yighin ehli qandaq qaraydu?" dégen'ge oxshash so'allargha jawab tépish üchün doktor erkin ekrem we bu yighin'gha ishtirak qilghan bezi mutexessislerning pikrini alduq.

Doktor erkin ekrem ependi "1-Nöwetlik sherqiy türkistanliqlar istratégiyilik muhakime yighini" ni échishtin kütken meqsitige toluq yételmigen bolsimu, emma Uyghur dewasini xelq'ara sewiyide élip bérish jehette melum chüshenchilerge érishish imkaniyitige ige bolghanliqini bildürdi.

Istratégiye mutexessisi doktor erkin ekrem ependi xelq'ara weziyet toghrisida tehlil élip bérip, dunya weziyitining özgiriwatqanliqini, xitaygha paydiliq bezi weziyetler peyda bolghan bolsimu, emma Uyghurlar eqlini ishletkendila öz dewasida muweppeqiyet qazinalaydighanliqini ilgiri sürdi.

Gérmaniyedin kélip bu uchrishishqa ishtirak qilghan dunya Uyghur qurultiyi bash katipi dolqun eysa ependi doktor erkin ekrem ependining bu qarashlirining nahayiti toghra bir di'agnoz ikenlikini, xitayning iqtisadiy we siyasiy küchini ishlitip Uyghur dewasining aldini tosushqa tirishiwatqan bolsimu, emma tosalmaywatqanliqini, Uyghur dawasida ene shundaq eqil-idrak ishlitilip, körünerlik muweppeqiyetler qolgha kelgenlikini bildürdi.

Türkiyedin kélip bu yighin'gha ishtirak qilghan sherqiy türkistan ma'arip we hemkarliq jem'iyiti re'isi hidayetulla oghuzxan ependimu bu heqte öz qarashlirini otturigha qoydi.

Amérikadin kélip bu yighin'gha ishtirak qilghan amérika Uyghur birlikining re'isi ilshat hesen ependi yétishken Uyghurlarning bir yerge jem bolup, dunyaning yönilishlirini muzakire qilidighan yighinlarni dawamliq halda échish kéreklikini, buning ünümining zor bolidighanliqini ilgiri sürdi.

Bu yighin'gha amérika qoshma shtatliri, gérmaniye, yaponiye, awstraliye, türkiye qatarliq 12 dölettin 19 kishi ishtirak qilghan bolup, yighin qatnashquchiliri héchqandaq teshkilat we guruhqa wekillik qilmaydiken.

Toluq bet