«Тәрбийиләш» тики сабиқ секретар пәзиләт бәкри һәққидә йәнә бир қисим учурлар ашкариланди

Мухбиримиз шөһрәт һошур
2018-03-29
Елхәт
Пикир
Share
Принт
Хизмәттә актип болмиди дегән баһанә билән «тәрбийиләш лагери» ға елип кетилгән қәшқәр ярбағ коча башқармисиниң секретари пәзиләт бәкри.
Хизмәттә актип болмиди дегән баһанә билән «тәрбийиләш лагери» ға елип кетилгән қәшқәр ярбағ коча башқармисиниң секретари пәзиләт бәкри.
RFA

Биз өткән һәптә қәшқәр шәһәрлик явағ коча башқармисиниң сабиқ секретари пәзиләт бәкриниң өзи назарәтчилик вәзиписи өтәватқан «йепиқ тәрбийиләш» һәрикитидә актип позитсийәдә болмиғанлиқи үчүн вәзиписидин елип ташланғанлиқи вә «тәрбийиләш» кә әкетилгәнлики һәққидә хәвәр бәргән идуқ. Мухбиримизниң бу темида давамлиқ әһвал ениқлиши давамида пәзиләт бәкриниң қәшқәр шәһәрлик диний ишлар идарисидә ишлигән мәзгилидә җәмийәттә тонулғанлиқи вә инавәт тапқанлиқи, «тәрбийиләш» кә әкитилиштин аввал дөләт бихәтәрлик сақчилири тәрипидин тутқун қилинғанлиқи қатарлиқ йәнә бир қисим учурлар ашкариланди.


Пәзиләт бәкри һәққидә радийомизға кәлгән учурда униң хизмәт давамида бәзи ечинишлиқ әһвалларни көргәндә өз һессиятини йошуралмиғанлиқи тилға елинған болсиму, әмма конкрет һалда униң немиләрни көргәнлики вә қандақ инкас қайтурғанлиқи йезилмиған. Биз әһвалниң бу тәрипини ениқлаш үчүн қәшқәрдики алақидар идарә-органларға давамлиқ һалда телефон қилдуқ. Хадимлар аввалқидәкла пәзиләт бәкриниң «тәрбийиләш» тә икәнликини инкар қилмисиму, әмма униң кимлики вә нөвәттики әһвали һәққидә мәлумат бериштин өзлирини қачурди. 

Биз пәзиләт бәкриниң бурунқи вә йеқинқи хизмәт орунлиридин учур алалмиғандин кейин, униң муһаҗирәттики юртдашлиридин мәлумат соридуқ. Нөвәттә түркийәдә панаһлинип туруватқан, илгири қәшқәрдә узун мәзгил сода-тиҗарәт билән шуғулланған абдурахман һәсән әпәнди, өзиниң пәзиләт бәкрини тонуйдиғанлиқи вә униң амма ичидики тәсиридинму хәвәрдар икәнликини баян қилди.

Абдурахман һәсәнниң баян қилишичә, пәзиләт бәкри шәһәрлик диний ишлар идарисидә ишләватқан мәзгилидә хитайниң қанун-бәлгилимилиридин чәтнимигән һалда хизмәт даириси ичидә кишиләргә яхшилиқ қилған. Йәнә абдурахманниң баян қилишичә, пәзиләт бәкри бәзи хитай кадирлириға охшаш иштин путақ тепип, кишиләргә қәстән қийинчилиқ вә аваричилик туғдуридиған ишлардин өзини узақ тутқан. Пәзиләт бәкриниң өзи туғулуп өскән юрт әһли билән әп өтиши, йәрлик аһалиләрниң иззәт һөрмитигә еришиши, униң бу қетим «тәрбийиләш» кә лайиқ көрүлүшигә сәвәб болған болуши мумкин икән. Абдурахман һәсән радийомизға кәлгән учурда дейилгән пәзиләт бәкриниң ечинишлиқ әһвалларни көргәндә өз һессиятини йошуралмиғанлиқи һәққидики учурниң әқилгә уйғунлуқини тәкитлиди. Униң баян қилишичә, нөвәттә «йепиқ тәрбийиләш» долқунида уйғурлар учраватқан әһвалларға ечиниш вә һесдашлиқ қилиш үчүн уйғур болуш шәрт әмәс, инсаний туйғуға саһиб һәрқандақ бир киши яшанған бир бовайниң бешиға қара халта кийдүрүлүп елип меңилиши, ата-аниси тәң елип кетилгән нарәсидә балиларниң өйләрдики бичарә қияпити қатарлиқ мәнзирини көргәндә ләвни чишләштин, бир уһ тартиштин сақлиниши тәс. Шуңа у пәзиләт бәкриниң пәқәт өзидики инсаний бир туйғу яки пәзиләтни ашкарилап қойғанлиқи үчүнла бешиға бу аваричилик кәлгәнлик еһтималлиқини пәрәз қилди. 

Пәзиләт бәкри һәққидә уйғур дияри билән алақиси һелиһәм давам қиливатқан бир қанчә тиҗарәтчидин учур аңлиғанлиқини баян қилған абдурахман һәсән, униң тутулғанда дөләт бихәтәрлик сақчилири тәрипидин тутулғанлиқини, шуңа униң «тәрбийиләш мәркизи» дә әмәс, бәлки қамақханида болуш еһтималлиқиниму илгири сүрди.

Пикирләр (0)
Share
Толуқ бәт