“Terbiyilesh” tiki sabiq sékrétar pezilet bekri heqqide yene bir qisim uchurlar ashkarilandi

Muxbirimiz shöhret hoshur
2018.03.29
Pezilet-Bekri.JPG Xizmette aktip bolmidi dégen bahane bilen “Terbiyilesh lagéri” gha élip kétilgen qeshqer yarbagh kocha bashqarmisining sékrétari pezilet bekri.
RFA

Biz ötken hepte qeshqer sheherlik yawagh kocha bashqarmisining sabiq sékrétari pezilet bekrining özi nazaretchilik wezipisi ötewatqan “Yépiq terbiyilesh” herikitide aktip pozitsiyede bolmighanliqi üchün wezipisidin élip tashlan'ghanliqi we “Terbiyilesh” ke ekétilgenliki heqqide xewer bergen iduq. Muxbirimizning bu témida dawamliq ehwal éniqlishi dawamida pezilet bekrining qeshqer sheherlik diniy ishlar idariside ishligen mezgilide jem'iyette tonulghanliqi we inawet tapqanliqi, “Terbiyilesh” ke ekitilishtin awwal dölet bixeterlik saqchiliri teripidin tutqun qilin'ghanliqi qatarliq yene bir qisim uchurlar ashkarilandi.


Pezilet bekri heqqide radiyomizgha kelgen uchurda uning xizmet dawamida bezi échinishliq ehwallarni körgende öz héssiyatini yoshuralmighanliqi tilgha élin'ghan bolsimu, emma konkrét halda uning némilerni körgenliki we qandaq inkas qayturghanliqi yézilmighan. Biz ehwalning bu teripini éniqlash üchün qeshqerdiki alaqidar idare-organlargha dawamliq halda téléfon qilduq. Xadimlar awwalqidekla pezilet bekrining “Terbiyilesh” te ikenlikini inkar qilmisimu, emma uning kimliki we nöwettiki ehwali heqqide melumat bérishtin özlirini qachurdi. 

Biz pezilet bekrining burunqi we yéqinqi xizmet orunliridin uchur alalmighandin kéyin, uning muhajirettiki yurtdashliridin melumat soriduq. Nöwette türkiyede panahlinip turuwatqan, ilgiri qeshqerde uzun mezgil soda-tijaret bilen shughullan'ghan abduraxman hesen ependi, özining pezilet bekrini tonuydighanliqi we uning amma ichidiki tesiridinmu xewerdar ikenlikini bayan qildi.

Abduraxman hesenning bayan qilishiche, pezilet bekri sheherlik diniy ishlar idariside ishlewatqan mezgilide xitayning qanun-belgilimiliridin chetnimigen halda xizmet da'irisi ichide kishilerge yaxshiliq qilghan. Yene abduraxmanning bayan qilishiche, pezilet bekri bezi xitay kadirlirigha oxshash ishtin putaq tépip, kishilerge qesten qiyinchiliq we awarichilik tughduridighan ishlardin özini uzaq tutqan. Pezilet bekrining özi tughulup ösken yurt ehli bilen ep ötishi, yerlik ahalilerning izzet hörmitige érishishi, uning bu qétim “Terbiyilesh” ke layiq körülüshige seweb bolghan bolushi mumkin iken. Abduraxman hesen radiyomizgha kelgen uchurda déyilgen pezilet bekrining échinishliq ehwallarni körgende öz héssiyatini yoshuralmighanliqi heqqidiki uchurning eqilge uyghunluqini tekitlidi. Uning bayan qilishiche, nöwette “Yépiq terbiyilesh” dolqunida Uyghurlar uchrawatqan ehwallargha échinish we hésdashliq qilish üchün Uyghur bolush shert emes, insaniy tuyghugha sahib herqandaq bir kishi yashan'ghan bir bowayning béshigha qara xalta kiydürülüp élip méngilishi, ata-anisi teng élip kétilgen nareside balilarning öylerdiki bichare qiyapiti qatarliq menzirini körgende lewni chishleshtin, bir uh tartishtin saqlinishi tes. Shunga u pezilet bekrining peqet özidiki insaniy bir tuyghu yaki peziletni ashkarilap qoyghanliqi üchünla béshigha bu awarichilik kelgenlik éhtimalliqini perez qildi. 

Pezilet bekri heqqide Uyghur diyari bilen alaqisi hélihem dawam qiliwatqan bir qanche tijaretchidin uchur anglighanliqini bayan qilghan abduraxman hesen, uning tutulghanda dölet bixeterlik saqchiliri teripidin tutulghanliqini, shunga uning “Terbiyilesh merkizi” de emes, belki qamaqxanida bolush éhtimalliqinimu ilgiri sürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.