Онсу наһийәсидә 4 лагер вә униңға 30 миңчә киши қамалғанлиқи ашкариланди

Мухбиримиз шөһрәт һошур
2018-08-21
Елхәт
Пикир
Share
Принт
Лоп наһийәсидики 4-йиғивелиш лагеридики тутқунлар сиясий өгиништә. 2017-Йили март, хотән.
Лоп наһийәсидики 4-йиғивелиш лагеридики тутқунлар сиясий өгиништә. 2017-Йили март, хотән.
bitterwinter.org

Ақсу вилайитиниң 230 миң нопуслуқ онсу наһийәсидә 4 лагер барлиқи, бу лагерларда 30 миңчә кишиниң солинип ятқанлиқи ашкариланди.

Мәлум болушичә, бу лагерлардин иккиси базар ичидә, қалған иккиси онсу базиридин 10 километир вә 40 километир узақлиқтики йезиларға тәсис қилинған.

«Бәйду» учур амбирида көрситилишичә, ақсуниң онсу наһийәси 4 базар, 5 йеза, икки деһқанчилиқ вә икки чарвичилиқ мәйданидин тәшкилләнгән. Омуми нопуси 230 миң әтрапида. Биз бу наһийәдики лагерларниң сани вә орни һәққидә мәлумат елиш үчүн, онсу наһийәсидә хизмәт қиливатқан, болупму йиғивелиш лагерлириға адәм топлашта актип хизмәт көрситиватқан сақчи хадимлиридин мәлумат игилидуқ. Хадимлардин бири өзиниң онсудики икки лагеридин хәвири барлиқини, буниң бири онсу яңақ мәйданда, йәнә бирсиниң болса қизил йезисида икәнликини ашкарилиди.

Өзиниң лагерға адәм топлашта көпләп «дело» мәлум қилинғанлиқини тилға алған йәнә бир сақчи хадими, яңақ мәйданда лагер барлиқини дәлилләш билән бирликтә, әң чоң лагерлардин бириниң онсу 2-оттура мәктәптә икәнликини ашкарилиди. У йәнә тәрбийәләшкә әкетилгән бир қисим дөләт хизмәтчилириниң наһийәлик партийә мәктәптә икәнликини ашкарилиди.

Бу икки сақчи хадиминиң баянлиридин мәлум болушичә, онсу наһийәсидә йиғивелиш лагерлириниң сани җәмий 4 болуп, булардин иккиси наһийә базар ичидә, иккиси базар сиртида. Лагерлардин нисбәтән чоңрақ вә тонулғанрақи «яңақ мәйдан» дегән җайда болуп, бу наһийә базиридин 10 километир узақлиқта. Қизил йезисида тәсис қилинған йиғивелиш лагери наһийә базиридин 40 километир, ақсу шәһәр ичидин 17 километир узақлиқта.

Хадимлар, бу лагерлардин һазирға қәдәр қоюветилгәнләрниң асасән дегүдәк болмиғанлиқини вә қачан қоюп берилидиғанлиқини өзлириниңму билмәйдиғанлиқини тәкрарлиди. Биз йәнә хадимлардин һәр йеза-мәйданлардин тәхминән қанчиликтин кишиниң лагерда икәнликини соридуқ. Хадимлардин бири 18 миң нопуслуқ җам йезисида 3 миңчә кишиниң лагерда икәнликини ейтти. Хадимлар йәнә бу 4 лагерда җәмий 30 миңчә киши барлиқини ашкарилиди.

Онсу наһийәлик һөкүмәт тор бетидә баян қилинишичә, наһийә нопусиниң 85 пирсәнтини аталмиш «аз санлиқ милләтләр» тәшкил қилиду. Мушу бойичә һесаблиғанда 230 миң нопуслуқ онсу наһийәсидә, 180 миң әтрапида уйғур барлиқи, уйғур нопусиниң аз дегәндә 15 пирсәнтиниң лагерда икәнлики мәлум болмақта.

Пикирләр (0)
Share
Толуқ бәт