Ikki uniwérsitétta oxshash waqitta Uyghurlar toghrisida doklat bérish yighini ötküzüldi

Ixtiyariy muxbirimiz erkin tarim
2018-05-14
Élxet
Pikir
Share
Print
Hamut köktürk ependi sözligen, nur'ela köktürk shé'ir oqughan, düzje uniwérsitétida ötküzülgen doklat bérish yighinidin kéyin xatire sürette. 2017-Yili 11-may, türkiye.
Hamut köktürk ependi sözligen, nur'ela köktürk shé'ir oqughan, düzje uniwérsitétida ötküzülgen doklat bérish yighinidin kéyin xatire sürette. 2017-Yili 11-may, türkiye.
RFA/Erkin Tarim

11-May küni oxshash bir kün ichide türkiyening sherqige jaylashqan ardahan wilayitidiki ardahan uniwérsitéti bilen türkiyening gherbiy rayonigha jaylashqan düzje shehiridiki düzje uniwérsitétida Uyghurlar toghrisida doklat bérish yighini ötküzüldi.

Ardahan uniwérsitétida uyushturulghan doklat bérish yighinida ghazi uniwérsitéti oqutquchisi, proféssor ekrem ariqoghlu bilen mughla sitqa qochman uniwérsitéti oqutquchisi proféssor isma'il doghan ependi "Qeshqerdin ürümchigiche sherqiy türkistan" témisida doklat berdi.

11-May küni proféssor ekrem ariqoghlu ependi bilen proféssor isma'il doghan ependiler ardaghan uniwérsitétida bergen "Qeshqerdin ürümchigiche sherqiy türkistan" témisidiki doklatida, nuqtiliq halda özlirining 5 yil burun birlikte Uyghur diyarini ékskursiye qilghan waqtida körgenlirini bayan qilghan.

Proféssor doktor ekrem ariqoghlu ependi ziyaritimizni qobul qilip, bergen doklatida, Uyghur diyarida körgen insan hoquqliri depsendichilikini anglatqanliqini bayan qilip mundaq dédi: "Doklat bérish yighini ardaghan uniwérsitétining zalida ötküzüldi. Doklat bérish yighinida men ekrem ariqoghlu bilen isma'il doghan sherqiy türkistan tesiratlirimizni bayan qilip öttuq. Ékskursiye jeryanida Uyghurlarning nahayiti yaxshi mu'amile qilghanliqini, körgenla Uyghurning yardem qilishqa tirishqanliqini we héchqandaq qiyinchiliqqa duchar bolmighanliqimizni anglattuq. Sherqiy türkistanliqlarning türkiyeni bek yaxshi köridighanliqini, emma rayonda insan heq we hoquqliri depsendichilikining intayin éghir ikenlikini anglattuq. Men türkiyelik bolush süpitim bilen türklerning neziridin sherqiy türkistanni anglattim. Doklatimiz ardaghan uniwérsitéti mudiri, oqutquchi we oqughuchilar we ardaghanliq ziyaliylarning alqishigha érishti".

11-May küni türkiyening gherbiy shimal rayonigha jaylashqan düzje shehiridiki düzje uniwérsitétida ötküzülgen doklat bérish yighinida sözligen hamut köktürk ependi, aldi bilen Uyghur diyarining tarixi, yer asti we yer üsti bayliqliri, istratégiyelik ehmiyiti toghrisida toxtalghandin kéyin, Uyghurlarning hazirqi weziyiti we Uyghurlarning türkiyedin némilerni kütüwatqanliqi toghrisida melumat berdi. Türk yashlirining némilerni qilishi toghrisida toxtaldi.

Yighinni düzje uniwérsitéti türk dunyasi oqughuchilar uyushmisi uyushturghan bolup, yighin'gha mezkur uniwérsitétning mes'ulliri, we oqutquchi-oqughuchilardin bolup 200 etrapida kishi qatnashqan.

Biz yighin toghrisida téximu tepsiliy melumat igilesh üchün yighinni uyushturghan kishiler we doklat bergen hamut köktürk ependi bilenmu söhbet élip barduq.

D u q ichki ishlar komitéti mudiri hamut köktürk ependi doklat bérish yighinining yaxshi ötkenlikini, doklatining témisining "Sherqiy türkistanning ötmüshi we bügüni" bolghanliqini bayan qildi.

Hamut köktürk ependi bergen doklatida nuqtiliq halda xitayning 2017-yili  1-apréldin tartip yolgha qoyghan atalmish térrorchiliqqa qarshi turush belgilimisi we buning élip kelgen tesiri toghrisida melumat bergenlikini bayan qildi.

Sha'ire nur'ela köktürk xanimmu bu doklat bérish yighinida shé'ir oqup yighin ehlining qattiq alqishigha érishken. Hamut köktürk ependi bu heqtimu toxtaldi.

11-May küni düzje uniwérsitétidiki doklat bérish yighinini uyushturghan oqughuchilar uyushmisi mes'ulliridin hilal temun Uyghur mesilisini özining yaxshi bilmeydighanliqini, bu pa'aliyetning paydiliq bolghanliqini, bundin kéyinmu ötküzüshni dawamlashturidighanliqini bayan qilip mundaq dédi: "Men shuni démekchimenki, menmu bu mesile toghrisida köp melumatqa ige emes idim. Izdendim melumat igisi bolghandin kéyin bu pa'aliyetni uyushturduq. Doklat bérish yighinidin kéyin barliq sawaqdashlirim hetta tonumaydighan kishilermu bu pa'aliyetni uyushturghanliqimizdin xursen boldi. Biz Uyghurlarning bundaq qéyin weziyette ikenlikini bilmeydikenmiz, bek xijil bolduq déyishti. Méningche, bu pa'aliyetni uyushturghanliqimiz bek yaxshi boldi."

Türkler Uyghur diyarini özlirining ata yurti dep bilgechke Uyghur mesilisige alahide köngül bölidu. Mushu ikki hepte ichide sakarya, pamuqqale we qara déngiz téxnika uniwérsitéti qatarliq 7 uniwérsitétta Uyghurlar toghrisida pa'aliyet élip bérildi. Hamut köktürk ependi bu xil pa'aliyetlerning Uyghur dewasi üchün paydiliq bolidighanliqini bayan qildi.

Toluq bet