Д у қ вәкиллири японийә парламент әзаси нагашима әпәнди билән көрүшти

Ихтиярий мухбиримиз әркин тарим
2018-04-03
Share
dolqun-eysa-Nagashima-ependi-bilen-bille.jpg Д у қ рәиси долқун әйса башчилиқидики вәкилләр японийә парламент әзаси, сабиқ муавин дөләт мудапиә министири акиһиса нагашима әпәнди билән көрүшти. 2018-Йили 3-апрел, японийә.
RFA/Erkin Tarim

Дуня уйғур қурултийи уйғурларниң нөвәттики еғир вәзийитини демократийә билән башқурулуватқан дөләтләргә вә дуня җамаәтчиликигә аңлитиш үчүн дуняниң һәр қайси җайлирида һәр хил паалийәтләрни елип бармақта.

Бу мәқсәт билән японийәдә зиярәттә болуватқан дуня уйғур қурултийи рәиси долқун әйса, иҗраийә комитети мудири өмәр қанат вә баянатчи дилшат ришит әпәндиләрдин тәркиб тапқан бир һәйәт японийә зияритиниң 3-күни японийә парламент әзаси, сабиқ муавин дөләт мудапиә министири акиһиса нагашима әпәнди билән көрүшүп, уйғурларниң нөвәттики еғир вәзийити тоғрисида мәлумат бәргән.

Дуня уйғур қурултийи рәиси долқун әйса әпәнди японийә парламентидин телефон зияритимизни қобул қилди.

Дуня уйғур қурултийи рәһбәрлириниң ейтишичә, уларниң бу қетимқи японийә зияритидики мәқсәт, уйғурларниң нөвәттики еғир вәзийитини японийә җамаәтчиликигә аңлитип, уларниң уйғурларға болған һесдашлиқини қолға кәлтүрүштин ибарәт икән. Долқун әйса әпәнди 4-айниң 3-күни гезит вә радийоларни зиярәт қилип, уйғурларниң еғир вәзийитини аңлатқанлиқини баян қилди.

Долқун әйса әпәнди, мәзкур японийә парламент әзасиға дуня уйғур қурултийи тәйярлиған инсан һәқлири доклатини сунғанлиқини, униң доклатни алғандин кейин позитсийә билдүргәнликини баян қилди.

Японийә парламентида уйғур достлуқ гурупписиму бар болуп, дуня уйғур қурултийи бурундин тартип японийә һөкүмитиниң уйғурлар мәсилисигә көңүл бөлүшини тәләп қилип кәлмәктә. Дуня уйғур қурултийи иҗраийә комитети мудири өмәр қанат әпәнди парламент әзаси акиһиса нагашима әпәндигә уйғурларниң еғир вәзийити тоғрисида мәлумат бәргәндин кейин японийә һөкүмитиниң хитай һөкүмигә инкас қайтурушини тәләп қилғанлиқини баян қилди.

Ундақта парламент әзаси акиһиса нагашима әпәнди дуня уйғур қурултийиниң бу тәләплиригә қандақ инкас қайтурди? дуня уйғур қурултийиниң японийә вәкили илһам мәхмут әпәнди учришишта нагашима әпәндиниң гәрчә өзи өктичи парламент әзаси болсиму, лекин уйғур мәсилисини парламентта оттуриға қойидиғанлиқини ейтқанлиқини билдүрди.

Дуня уйғур қурултийи һәйитиниң бу қетимқи японийә зиярити 10 күн давамлишидиған болуп, улар японийәниң башқа шәһәрлиридиму бир йүрүш паалийәт елип баридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт