Уйғур қизларни әскәрликкә елишниң суйиқәст икәнлики илгири сүрүлмәктә

Ихтиярий мухбиримиз руқийә
2013-03-06
Share
nur-bekri-wang-lechwan-pichillashmaqta.jpg Нур бәкри билән ваң ләчван пичирлашмақта. 2009-Йили 6-март, бейҗиң.
EyePress

Бир қисим уйғур қизлириниң хоңкоңда турушлуқ хитай қисимлириға әскәрликкә қобул қилиниши хитай һөкүмәт ахбаратида иҗабий қәдәм сүпитидә тәшвиқ қилған болсиму, уйғур тордашларниң наразилиқини қозғиди.

Бәзи тордашлар "исит!" дәп надамәт төксә, безиләр бу қизларниң ойғиниши керәкликини хитаб қилиду.

Бу һәқтә тохталған чәтәлләрдики уйғур зиялийларму хитайниң уйғур қизларни әскәрликкә қобул қилишида йәнә бир хил суйиқәст бар болуши мумкинликини илгири сүрди.
Уйғур тор бәтлиридики хәвәрләргә асасланғанда, бу йил шинҗаң университети филологийә факултети хәнзу тили кәспидин дилнур әхмәт қатарлиқ он нәпәр қиз оқуғучи хитайниң хоңкоңда турушлуқ һәрбий қисимлириға аял әскәрликкә қобул қилинған.

Хәвәрләргә асасланғанда, бу он нәпәр уйғур оқуғучи қиз әскәрликкә беришни өзлири арзу қилип тизимлатқан. Хәвәрдә ейтилишичә, бу нөвәт 800 дин артуқ уйғур оқуғучи қиз әскәрликкә илтимас қилған болуп, буниң ичидин 10 нәпири талливелинған.

Хитай ахбаратиға қариғанда, бу қизлар хоңкоңда турушлуқ хитай һәрбий қисимлириға аял әскәр қобул қилиш еланини көргәндин кейин "қизғинлиқ билән илтимас қилған вә наһайити хош болуп" кәткән, һәтта уларниң ичидики зулпийә турсунниң дадиси қизиниң әскәр болғанлиқидин интайин пәхирләнгәнликини билдүргән.

Әмма, уйғур тор бәллиридики инкасларда бу қизларниң "саддилиқи", "нәзәр даирисиниң тарлиқи" ға болған ечиниш билдүрүлгән. Бир инкаста мундақ дәп йезилған: "бизни ким башқуруватиду? биз кимләргә әскәр болуп бәрмәкчи.. Һәй исит...". Йәнә бир инкасқа болса: "басқан һәр бир қәдимиңгә пушайман қилисән...". Дәп йезилған. Әмма бу инкаслар дәрһал өчүрүветилгән.

Нур бәкри қатарлиқ қорчақ әмәлдарлар әскәрликкә қобул қилинған қизларниң шәрипигә зияпәт уюштуруп, дағдуға қилған. Хитай мухбирлири уларни бәс-бәс билән рәсимгә тартип чоң тәшвиқат сүпитидә хитайниң һәрбий торлирида тарқатқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт