Uyghur élidiki edebiyat-sen'etchiler saheside “Üch xil küchler” ge qarshi turush herikiti élip bérildi

Ixtiyariy muxbirimiz haji qutluq qadiri
2017.06.07
imin-exmidi-305.jpg Ataqliq sha'ir, edebiy terjiman imin exmidi. 2015-Yili, qeshqer
RFA

Xitay hökümitining yéqindin buyan Uyghur élide élip bériwatqan “Üch xil küchler” ge qarshi turush herikiti Uyghur élidiki edebiyat-sen'et sahesidimu keng kölemlik halda qanat yaydurulghan bolup, xitay da'iriliri Uyghur yazghuchi we sha'irlardin “Üch xil küchler” ge bolghan qarashlirini öz eserliride ipadileshni shundaqla kompartiyige bolghan sadiqliqini bildürüp wediname élan qilishni telep qilghan.

Uyghur aptonom rayonluq edebiyat-sen'etchiler birleshmisining sabiq re'isi, sha'ir imin exmidi Uyghur rayonida tonulghan péshqedem sha'ir we edebiy terjimanlardin biri bolup, u özining nöwettiki mezkur heriketke qoshulghanliqini bildürdi.

Aptonom rayonluq edebiyat-sen'etchiler birleshmisining sabiq re'isi, sha'ir imin exmidi bügün téléfon ziyaritimizni obul qilip, Uyghur élidiki edebiyat-sen'etchiler saheside élip bériliwatqan xitay da'irilirining “Üch xil küchler” ge qarshi turush herikiti heqqide toxtaldi.

Sha'ir imin exmidi,Uyghur aptonom rayonluq partkomning mu'awin sékrétari ju xeylünning yétekchilikide chaqirilghan edebiyat sen'et sahesidikiler yighinida aptonom rayonluq partkom teshwiqat bölümi Uyghur yazghuchi we sha'irlirigha alahide chaqiriq élan qilip, “Üch xil küchler”ge qarshi turush heqqide seperwerlik élip barghanliqini bildürdi.

Ziyaritimiz jeryanida sha'ir imin exmidi, Uyghur aptonom rayonidiki bir qisim nopuzluq zhurnal bash tehrirlirining maqale élan qilip özlirining, “Üch xil küchler” ge bolghan meydanini bildürgenlikini shundaqla “Tarim” zhurnilining bu yilliq 6-sanida élan qilin'ghan “Üch xil küchler”ge qarshi bir qisim shé'ir we edebiy eserler heqqide qisqiche toxtaldi.

Biz sha'ir imin exmidining uchurigha asasen, “Tarim”zhurnilining bash muherriri yasin zilalgha téléfon qilip uning “Üch xil küchler” ge qarshi élan qilghan maqalisi heqqide uchur igileshke tirishqan bolsaqmu, biraq téléfonimiz élinmidi.

Ziyaritimizning axirida sha'ir imin exmidi,xitay hökümitining Uyghur élide yürgüzüwatqan “Üch xil küchler” ge qarshi turush herikitining yene bir qanche yil dawamlishidighanliqini ilgiri sürdi.

Ziyaritimizni qobul qilghan yaponiyedin chiqidighan “Xitaygha nezer”zhurnilining bash muherriri,manju yazghuchi méngsha xanim xitay kompartiyesining Uyghur élidiki edebiy-sen'etchiler saheside élip bériwatqan bu xil siyasiy heriketliri toghrisida toxtilip: “Shi jinping hakimiyiti maw zédong dewridiki, yeni medeniyet zor inqilabidiki siyasiy heriketlerni Uyghur élide élip bériwatidu. Shi jinpingning meqsiti bolsa idé'ologiye saheside zor tazilash élip bérish, basturush arqiliq özige tinch muhit yaritishni meqset qiliwatidu” dédi.

Ziyaritimizni qobul qilghan dunya Uyghur qurultiyining bash katipi dolqun eysa Uyghur yazghuchi we sha'irlirigha yürgüzülüwatqan bu xil siyasiy bésimlarni xitay kompartiyesining idé'ologiye saheside élip bériwatqan “Ménge yuyush” herikiti dep eyiblidi.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.