Үрүмчи айродром сақчилири айродромда вәқә чиққанлиқини рәт қилмиди

Мухбиримиз шөһрәт һошур
2015.08.17
Share on WhatsApp
Share on WhatsApp
xoten-ayrodrom-305.jpg Хотән айродроми. 2011-Йили өктәбир.
RFA

Түнүгүн шиветсийәдики шәрқи түркистан учур мәркизи өткән айниң 30-күни үрүмчи айродромида вәқә чиққанлиқи, вәқәдә уйғур пидаийлар билән хитай сақчилириниң тоқунушқанлиқи һәққидә бир хәвәр бәрди. Хәвәрдә дейилишичә бу вәқә ахбараттин йошурулған, һәтта бу һәқтә җамаәт сорунлирида гәп қилишму чәкләнгән. Мухбиримиз бу йип учиға асасән бүгүн үрүмчи айродромиға телефон қилип сақчи хадимлиридин мәзкур вәқә һәққидә мәлумат сориди. Бир нәпәр хадим вәқә һәққидә өзиниң учур бериш һоқуқи йоқлуқини ейтса; йәнә бир нәпири бу вәқәгә алақидар һәрқандақ учурни ашкарилашқа болмайдиғанлиқини вә дөләт мәхпийәтлики икәнликини ейтти, әмма һәр иккиси өткән һәптә айродромда вәқә чиққанлиқини инкар қилмиди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Биз юқириқи йип учиға асасән үрүмчи айродроминиң сақчиханнисиға телефон қилдуқ.

Мәзкур хадим бу вәқәни аптоном районлуқ сақчи назаритидин соришимиз керәкликини, өзиниң бу һәқтә мәлумат берәлмәйдиғанлиқини ейтти.

Биз вәқәдә етиветилгән кишиләрниң санини сориғинимизда, у бу соалға телефонда җаваб берәлмәйдиғанлиқини вә бизниң әһвал игиләш үрүмчи айродромиға беришимиз керәкликини ейтти. Мәзкур сақчиханида ишләватқан уйғур хадим бундақ вәқәләрниң сир тутулидиғанлиқи вә өзигә билдүрүлмәйдиғанлиқини ашкарилиди.

Биз андин сақчи идарисиниң йәнә бир бөлүмигә телефон қилдуқ. Бөлүмдики хадимму айродромда вәқә йүз бәргәнликини инкар қилмиди. Биз униңдин вәқә йүз бәргән орунни соридуқ, у бу соалға телефонда җаваб беришниң қулайсиз икәнликини ейтти, арқидин биз вәқә йүз бәргән күн вә вақитни соридуқ, у бө соалимизғиму җаваб берәлмәйдиғанлиқини ейтти. Биз йәнә арқидин, өзиниң вәқәни билмәйдиғанлиқи яки җаваб беришкә һоқуқи йоқлуқини соридуқ. У бу ишларниң мәхпий икәнликини ашкарилашқа болмайдиғанлиқини ейтти, биз униңдин вәқәдә бигунаһ аммидин өлгән яриланғанлар болуп-болмиғанлиқини соридуқ; у бу соалимизғиму, бу учурни ашкарилашқа болмайдиғанлиқини, әгәр вәқәгә мунасивәтлик учурларни билмәкчи болсақ пәқәт үрүмчи айродромиға берип хизмәт кинишкимиз вә мунасивәтлик рәһбәрләрниң рухсәт хетини көрситишимиз керәкликини андин җаваб берәләйдиғанлиқини ейтти вә вәқәниң дөләт мәхпийәтлики икәнликини тәкрарлиди.

Хитай мәтбуатлири 2008-йили 3-айниң 7-күни гүзәлнур турди исимлик 18 яшлиқ бир қизниң айропиланға от қоюшқа урунғанда тутулғанлиқини хәвәр қилған; бултур йәнә 6 нәпәр уйғур пидаийниң хотәндин учқан хитай айропиланини елип қечишқа урунғанда бойсундурулғанлиқи хәвәр қилинған. Шуниңдин кейин айродромда вәқә чиққанлиқиға аит ғәйрий рәсмий учурлар пат-пат тарқилип турған болсиму, әмма хитайниң рәсмий ахбаратлирида бу һәқтә хәвәр берилмигән. юқириқи учурлардин үрүмчи айродромида мушу айниң бешида растинила бир вәқә чиққанлиқи ашкариланмақта, әмма вәқәниң тәпсилати йәнила сирлиқлиқини сақлимақта. Бәзи көзәткүчиләр хитай тәрәпниң җәмийәттә вәһимә вә пат-парақчилиқ пәйда болушидин әндишә қилип айродром қатарлиқ назук җайларда йүз бәргән вәқәләрни йошуруватқанлиқини илгири сүрмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт