Ürümchi ayrodrom saqchiliri ayrodromda weqe chiqqanliqini ret qilmidi

Muxbirimiz shöhret hoshur
2015-08-17
Share
xoten-ayrodrom-305.jpg Xoten ayrodromi. 2011-Yili öktebir.
RFA

Tünügün shiwétsiyediki sherqi türkistan uchur merkizi ötken ayning 30-küni ürümchi ayrodromida weqe chiqqanliqi, weqede Uyghur pida'iylar bilen xitay saqchilirining toqunushqanliqi heqqide bir xewer berdi. Xewerde déyilishiche bu weqe axbarattin yoshurulghan, hetta bu heqte jama'et sorunlirida gep qilishmu cheklen'gen. Muxbirimiz bu yip uchigha asasen bügün ürümchi ayrodromigha téléfon qilip saqchi xadimliridin mezkur weqe heqqide melumat soridi. Bir neper xadim weqe heqqide özining uchur bérish hoquqi yoqluqini éytsa؛ yene bir nepiri bu weqege alaqidar herqandaq uchurni ashkarilashqa bolmaydighanliqini we dölet mexpiyetliki ikenlikini éytti, emma her ikkisi ötken hepte ayrodromda weqe chiqqanliqini inkar qilmidi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Biz yuqiriqi yip uchigha asasen ürümchi ayrodromining saqchixannisigha téléfon qilduq.

Mezkur xadim bu weqeni aptonom rayonluq saqchi nazaritidin sorishimiz kéreklikini, özining bu heqte melumat bérelmeydighanliqini éytti.

Biz weqede étiwétilgen kishilerning sanini sorighinimizda, u bu so'algha téléfonda jawab bérelmeydighanliqini we bizning ehwal igilesh ürümchi ayrodromigha bérishimiz kéreklikini éytti. Mezkur saqchixanida ishlewatqan Uyghur xadim bundaq weqelerning sir tutulidighanliqi we özige bildürülmeydighanliqini ashkarilidi.

Biz andin saqchi idarisining yene bir bölümige téléfon qilduq. Bölümdiki xadimmu ayrodromda weqe yüz bergenlikini inkar qilmidi. Biz uningdin weqe yüz bergen orunni soriduq, u bu so'algha téléfonda jawab bérishning qulaysiz ikenlikini éytti, arqidin biz weqe yüz bergen kün we waqitni soriduq, u bö so'alimizghimu jawab bérelmeydighanliqini éytti. Biz yene arqidin, özining weqeni bilmeydighanliqi yaki jawab bérishke hoquqi yoqluqini soriduq. U bu ishlarning mexpiy ikenlikini ashkarilashqa bolmaydighanliqini éytti, biz uningdin weqede bigunah ammidin ölgen yarilan'ghanlar bolup-bolmighanliqini soriduq؛ u bu so'alimizghimu, bu uchurni ashkarilashqa bolmaydighanliqini, eger weqege munasiwetlik uchurlarni bilmekchi bolsaq peqet ürümchi ayrodromigha bérip xizmet kinishkimiz we munasiwetlik rehberlerning ruxset xétini körsitishimiz kéreklikini andin jawab béreleydighanliqini éytti we weqening dölet mexpiyetliki ikenlikini tekrarlidi.

Xitay metbu'atliri 2008-yili 3-ayning 7-küni güzelnur turdi isimlik 18 yashliq bir qizning ayropilan'gha ot qoyushqa urun'ghanda tutulghanliqini xewer qilghan؛ bultur yene 6 neper Uyghur pida'iyning xotendin uchqan xitay ayropilanini élip qéchishqa urun'ghanda boysundurulghanliqi xewer qilin'ghan. Shuningdin kéyin ayrodromda weqe chiqqanliqigha a'it gheyriy resmiy uchurlar pat-pat tarqilip turghan bolsimu, emma xitayning resmiy axbaratlirida bu heqte xewer bérilmigen. Yuqiriqi uchurlardin ürümchi ayrodromida mushu ayning béshida rastinila bir weqe chiqqanliqi ashkarilanmaqta, emma weqening tepsilati yenila sirliqliqini saqlimaqta. Bezi közetküchiler xitay terepning jem'iyette wehime we pat-paraqchiliq peyda bolushidin endishe qilip ayrodrom qatarliq nazuk jaylarda yüz bergen weqelerni yoshuruwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet