Shinjang uniwérsitétidin proféssor abdukérim raxman, arslan abdulla we rahile dawutning tutqun qilin'ghanliqi delillendi

Muxbirimiz shöhret hoshur
2018-09-13
Élxet
Pikir
Share
Print
Sh u a r xelq hökümiti meslihetchiler ishxanisining sabiq mudiri, shinjang uniwérsitéti filologiye institutining sabiq mudiri, proféssor arslan abdulla ependi(ongda). Shinjang uniwérsitéti filologiye institutining proféssori, doktor yétekchisi abdukérim raxman ependi(solda).
Sh u a r xelq hökümiti meslihetchiler ishxanisining sabiq mudiri, shinjang uniwérsitéti filologiye institutining sabiq mudiri, proféssor arslan abdulla ependi(ongda). Shinjang uniwérsitéti filologiye institutining proféssori, doktor yétekchisi abdukérim raxman ependi(solda).
RFA/Qutlan

Yéqinda anglighuchilirimizdin biri radiyomizgha inkas yollap, shinjang uniwérsitétidin az dégende 56 oqutquchi we tetqiqatchining yighiwélish lagérigha élip kétilgenlikini melum qilghan idi. Ötken hepte amérikidiki Uyghur pa'aliyetchi, shinjang uniwérsitétining sabiq oqutquchisi qutluq almas ependi ijtima'iy taratqularda guwahliq bayanati élan qilip, shinjang uniwérsitétidiki sabiq xizmetdashliridin 5 kishining lagérda ikenlikige guwahliq berdi.

Muxbirimizning shinjang uniwérsitéti uniwérsal tüzesh qomandanliq merkizidin ehwal igilishi dawamida deslepki qedemde abdukérim raxman, arslan abdulla we rahile dawut qatarliq dangliq proféssorlarning tutqun qilin'ghanliqi delillendi.

Biz uchurning toghra-xataliqini éniqlash üchün shinjang uniwérsitéti mektep memuriyiti ishxanisigha téléfon qilduq. Biz téléfonimizni alghuchidin proféssor arslan abdulla bilen abdukérim raxmanning "Terbiye" leshke ekétilgenlik ehwalini kimdin éniqlishimiz kéreklikini sorighinimizda u filologiye instituti bilen mektep qomandanliq ishxanisidin melumat sorishimizni éytti. Shinjang uniwérsitéti uniwérsal tüzesh qomandanliq ishxanisidiki bir xadim deslepte özining bu heqte melumat bérelmeydighanliqini éytti. U arqidin alaqidar rehberlerdin yolyoruq alghandin kéyin, so'allirimizning bir qismigha jawab berdi, emma köp qismigha jawab bérishni ret qildi. U bu jeryanda proféssor arslan abdulla bilen abdukérim raxmanning tutulghinigha xéli uzun bolghanliqini, emma kimler teripidin néme üchün ekétilgenliki heqqide melumat bérelmeydighanliqini éytti.

So'al: kimler teripidin tekshürülginini dep bérelmiginingizge asasen arslan abdullaning tutulushini "Dölet mexpiyetliki" dep qariliwatidu dések bolamdu?

Jawab: qandaq qarash we qandaq yézish silerning ishinglar.

So'al: abdukérim raxmanning tutulushimu "Dölet mexpiyetliki" mu?

Jawab: umu shundaq.

So'al: abdukérim raxman néme sewebtin tutuldi?

Jawab: arslanningki bilen oxshash.

So'al: rahile dawutningchu?

Jawab: arslanningmu, abdukérimningmu we rahileningmu néme üchün tutulghanliqini bilmeymen.

Hazirgha qeder shinjang uniwérsitétining sabiq mudiri tashpolat téyipningla tutqun qilin'ghanliqi delillen'gen idi. Yuqiriqi uchurlardin gerche déloning tepsilati melum bolmighan bolmisimu, emma proféssor abdukérim raxman, arslan abdulla we rahile dawutlarning ishtin toxtitilghanliqi we nöwette lagér yaki qamaqxanida tutup turuluwatqanliqi delillendi.

Toluq bet