Ayköl déhqanliri: “Aykölde hashar 7 kün, etigen sa'et 7din kech sa'et 6 giche”

Muxbirimiz shöhret hoshur
2015.11.02
uyghur-hashar-osteng-chepish.jpg Hashargha mejburlinip östeng chépiwatqan Uyghur déhqanlar. Aqsu.
Social Media

Bu yil 5-ayda muxbirimizning ziyaritini qobul qilghan toqsu nahiyisining yultuzbagh yézisidiki bir kent sékrétari özlirining déhqanlarni ish chiqirip qoyushtin tosush üchün hashargha séliwatqanliqini ashkarilighan idi.

Muxbirimizning ötken heptidiki éniqlishida oxshash meqsettiki hasharning aqsu ayköldimu dawam qiliwatqanliqi aydinglashti. Ikki neper déhqanning bayan qilishiche, aykölde hashar heptide 7 kün, etigen sa'et 7din kech sa'et 6 ge qeder dawam qilidu, eger kimki késel bolup qalsa, uning hashar wezipisini qérindashliri ijra qilidu. 21-Esirde dunyada peqet Uyghur rayonining jenubidila ijra qiliniwatqan bu hasharning uchurini ayköldiki ahalilerning öz éghizidin anglaysiler.

Közetküchilerning qarishiche, hashar Uyghur déhqanliri dewrlerdin buyan qutulup bolalmaywatqan bir tür jaza shekli, gerche xitay da'iriliri hashardin ibaret bu mejburiy we heqsiz emgekni, ilgiriki xewerlerde ishlepchiqirish we shara'itning éhtiyaji dep perdazlap teshwiq qilip kelgen bolsimu, yéqinqi mezgillerde buni ashkara halda muqimliq tedbiri süpitide ijra qilmaqta. Melum bolushiche, hashar xitayning emgek qanunida xéli burunla emeldin qaldurulghan. Emma yéqinqi yillardin buyan qarshiliq heriketliri kücheygendin kéyin, bolupmu bultur 22-may küni ürümchide etigenlik bazargha hujum qilish weqesi yüz bergendin kéyin, Uyghur rayonining bir qisim jaylirida, yerlik da'iriler hasharni ahalilerni kontrol qilip turushning ünümlük bir charisi süpitide ijra qilmaqta.

Aqsu ayköldiki ahaliler 2013-yili 8-ayning 8-küni yeni roza héyttin bir kün burun qara-qoyuq adem tutqan saqchilarning aldini tosup naraziliq bildürgen we bu naraziliq qanliq toqunushqa aylan'ghan, toqunushta az dégende 13 kishi ölgen we yüzlerche kishi yaridar bolghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.