Уйғур районида қурбан һейт байрақ чиқириш билән башланди, әнсизчилик ичидә давам қилмақта

Мухбиримиз шөһрәт һошур
2017-09-01
Share
meschit-bayraq-chiqirish-1.jpg Уйғур райониниң чиңгил наһийәсидә мәсчитниң алдида байрақ чиқириватқан көрүнүш.
xjts.cn

Бүгүн мухбиримизниң телефон зиярәтлиридин мәлум болушичә, хотән вә йеңисарниң көп қисим җайлирида қурбан һейттин икки һәптә аввал аһалиләргә һейтни тинч өткүзүш қатарлиқ муқимлиққа аит мәзмунларда ирадинамә яздурулған. Намаз күни намаз башлиништин аввал мәсчиттә байрақ чиқириш мурасими өткүзүлгән; һейт намизидин кейин аһалиләр кәнткә топлинип йәнә вәзийәт һәққидә сиясий өгиниш елип барған. Йеңисардики бир нөвәтчи хадим, бүгүн кәнтләрдики сиясий паалийәтләр сәвәблик кочиларда адәм йоқлуқини баян қилса, йәнә бир деһқан мунасивәтсиз һалда партийигә миннәтдарлиқ билдүрүш арқилиқ, көңлидики әнсизчиликни ашкарилиди.

Биз уйғур районидики һейт вәзийитини ениқлаш үчүн йеңисар вә хотәндики бир қисим җайларға телефон қилдуқ. Мәлум болушичә йеңисарниң саған йезисида һейт намизидин аввал байрақ чиқириш мурасими өткүзүлгән. Җамаәт намаздин кейин кәнт аһалиләр комитетиға топлинип нөвәттики сиясий вәзийәт һәққидә мәлумат берилгән вә муқимлиқ тәдбирлиригә бойсунуш һәққидә агаһландурулған.

Телефонимизни қобул қилған бир нөвәтчи хадим, һәр һейт күни аватлишидиған йеза базирида бүгүн кочиларда адәм шалаң, һәтта қуруқ икәнликини баян қилди.

Бүгүн хотән шәһәр ичиниң илчи базири вә шорбағ йезисидиму һейт намизидин аввал байрақ чиқириш мурасими өткүзүлгән. Бәзи кәнтләрдә байрақ чиқириш мәсчит қорусида өткүзүлсә бәзилиридә кәнт аһалиләр комитетида өткүзүлгән.

Биз бүгүн бир аманлиқ хадимидин, мәсчитләрдә байрақ чиқиришниң зөрүрийити һәққидә мәлумат соридуқ.

Униң баян қилишичә, аһалиләр өзлириниң ким тәрипидин башқурулуватқанлиқи, бу аталмиш бәхтияр турмушни ким ата қилғанлиқини унтуп қалмаслиқи яки хата билип қалмаслиқи керәк. Аманлиқ хадиминиң баянлиридин қариғанда, даириләр аһалиләрдә "бизгә ризқини аллатаала әмәс, бәлки хитай компартийиси бериватиду" дегән һесни шәкилләндүрүш үчүн, мәсчиттә байрақ чиқиришни орунлаштурған.

Юқириқи аманлиқ хадими, нөвәттики җиддий вәзийәттә аһалиләрниң тоғра-хата һәққидә позитсийә билдүрүшкә чарисиз икәнликини йошурмиди.

Телефон зияритимизни қобул қилған бир деһқан, соалимизға мунасивәтсиз һалда партийигә миннәтдарлиқ билдүрүш арқилиқ, өзиниң нөвәттики хаталишип қелиш әндишиси вә әнсиз кәйпиятини ашкарилиди.

Кимликини ашкарилашни халимиған йезилардики бәзи кадир вә деһқанларниң баян қилишичә, бу йилқи қурбан һейт уйғур районида йепиқ тәрбийиләш мәркәзлири омумлашқан вә кеңәйгән вә кәнтләрдә нөвәттә көп санда киши йепиқ тәрбийиләш мәркизидә тутуп турулуватқан бир мәзгилгә тоғра кәлгәчкә, аһалиләрниң мутләқ көп қисми тутқундики аилә-әзалириниң ғәм әндишиси билән күн өткүзсә, бәзиләр өзлириниңму ойлимиған бир сәвәб билән тутқун қилинишидин қорқуп әнсизчилик ичидә өтмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт