200 Миң кадир қолға кәлтүргән “әбәдий әминлик” ниң кәйнидә немиләр бар?

Мухбиримиз қутлан
2015.09.22
Share on WhatsApp
Share on WhatsApp
asasiy-qatlam-xizmet-guruppisi.jpg Уйғур аптоном районлуқ идарә-органлардин, 5826 қетимлиқ пойизға олтуруп, хотәнгә асасий қатлам хизмити үчүн кетиватқан хизмәтчиләр. 2014-Йили 3-март, үрүмчи.
www.gov.cn

Түнүгүн “шинхуа тори”, “җуңго радио тори” қатарлиқ хитай һөкүмәт таратқулири хәвәр берип, өткән йилидин буян 200 миң кадирни төвәнгә әвәтиш арқилиқ уйғур аптоном районида “әбәдий әминлик” кә пухта асас селинғанлиқи илгири сүрүлди.

Һалбуки, радиомиз зияритини қобул қилған бир қисим шаһитларниң баянлири хитай һөкүмити һәдәп давраң селиватқан юқириқи әһвални кәскин рәт қилмақта.

Мәлум болушичә, төвәнгә әвәтилгән кадирларниң мутләқ көп қисми йеза, кәнтләрни асас қилип хизмәт елип баридикән. Уларға асасий қатламға чоңқур чөкүп, “әл райини қолға кәлтүрүш вә әлгә нәп йәткүзүш” дегәндәк чирайлиқ вәзипиләр берилгәндәк көрүнгини билән, әмәлийәттә йеза секретарлириниң мақуллуқисиз һечқандақ иш тәвритәлмәйдикән.

Дәсләптә кәнттики уйғур деһқанлири улардин зор үмид күтүп, илгири һәл қилалмиған яки йәрлик әмәлдарлар тәрипидин наһәқчиликкә учриған ишлирини әрз қилип кәлгән болсиму, лекин хизмәт гурупписидики һечбир кадир уларға буни һәл қилалайдиғанлиқи тоғрилиқ вәдә берәлмигән.

Хизмәт гурупписи тәркибидә асасий қатламға әвәтилгән шаһитларниң баянлириға қариғанда, төвәнгә әвәтилгән кадирлар иши зор дағдуға билән башлинип шәписиз ахирлишидиған, һечқандақ чоң мәсилә һәл болмайдиған сепи өзидин шәкилвазлиқ икәнлики мәлум.

Уларниң билдүрүшичә, төвәнгә чүшкән хизмәт гурупписиниң асасий хизмәтлири кәнттики диний затлар, партийә әзалири вә “төт пешқәдәмләр” васитиси арқилиқ елип берилидикән. Хизмәт гуруппилириниң асаслиқ вәзиписи вә хизмәттики муһим нуқтиси “муқимлиқ” ни сақлаш болуп, йеза,кәнтләрдики деһқанларниң җаниҗан мәнпәитигә четилидиған әмәлий ишларға биваситә арилишалмайдикән.

Әһвалдин хәвәрдар кишиләрниң билдүрүшичә, төвәнгә әвәтилгән йәрлик милләт кадирлириниң чоқум партийә әзаси болуши, хитай кадирларниң мәлум дәриҗидә уйғур тилидин билими болуши тәләп қилинидикән. Ундин башқа, төвәнгә әвәтилгән хизмәт гуруппилириниң хизмәттә чоқум йәрлик парткомларниң орунлаштурушиға бойсунуши шәрт қилинидикән. Нәқ мәйданға барған шаһитлар аталмиш “әл райини игиләш, әлгә нәп йәткүзүш вә әлни майил қилиш” дегән чирайлиқ намлар берилгән бу һәрикәтниң әмәлийәттә хитайниң “муқимлиқ” сияситини тәшвиқ қилиштики истратегийилик пилани икәнликини тәкитлимәктә.

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.