Yaponiyediki bir qisim Uyghurlar xitay dölet bayrimini tebriklesh pa'aliyitige teklip qilindi

Ixtiyariy muxbirimiz haji qutluq qadiri
2013.09.17
yaponiye-xitay-elchixanisi-uyghurlargha-teklipname.jpg Tokyodiki xitay elchixanisining yétekchilikide xitayning dölet bayrimini tebriklesh pa'aliyitige qatnishish teklipnamisi.
RFA/Qutluq

9-Ayning 13-küni tokyoda ötküzülgen xitay mesililiri uchur yighinida özining nam sheripini ashkarilashni xalimighan bir xanim yaponiyediki xitay muhajirliri jem'iyiti tokyodiki xitay elchixanisining yétekchilikide xitayning dölet bayrimini tebriklesh pa'aliyitige qatnishish teklipnamisini yaponiyediki bir qisim Uyghurlarghimu ewetkenlikini ashkarilidi.

Nam sheripini ashkarilashni xalimighan bu xanim xitay muhajirliri jem'iyiti yaponiyening her qaysi jayliridiki xitay konsulxanilirining etrapliq pilanlishi bilen, xitay döliti qurulghanliqining 64 yilliqini tebriklesh merikisini daghdughiliq ötküzüshni pilanlap, barliq orunlashturush ishlirini xitay muhajirliri jem'iyitige tapshurghanliqini bildürdi.

U xanim sözide, xitay dölet bayrimini tebriklesh pa'aliyiti yaponiyening her qaysi jaylirida birdek 10-ayning 1-küni ötküzülidighanliqini, pa'aliyet sorunliri xitay elchixanisi, konsulxanisi we bashqa jaylardiki xitay réstoranlirini asas qilidighanliqini bayan qildi. U,yene bu qétimqi xitay dölet bayrimigha qatnishish teklipnamisining yaponiyediki Uyghurlarni asas qilghan halda tarqitilghanliqini alahide eskertip ötti.

U sözide, xitay dölet bayrimining 64 yilliqini tebriklesh merikisige qatnishish teklipnamisi mushu ayning 6-küni pochta arqiliq yaponiyediki bir qisim Uyghurlargha birdek tarqitilip bolghanliqini, ziyapetke qatnishish teklipnamisige a'ile bashliqliri qatnishish we yaki qatnashmasliqini shuningdek qatnashsa a'ilisidin qanche kishining qatnishidighanliqini bildürüp 9-ayning 25-künige qeder ewetilgen baghaqchigha qol qoyup xitay muhajirliri jem'iyitige tizdin yollap bérishishi kéreklikini teklipnamide alahide eskertkenlikinimu bildürdi.

U xanimning ékran arqiliq körsetken xitay muhajirliri jem'iyitining teklipnamiside “Qedirlik yaponiye puqraliqidiki we yaponiyede menggü turushluq hoquqidiki junggoluq qérindashlar, söyümlük wetinimiz jungxu'a xelq jumhuriyiti qurulghanliqining 64 yilliqini tebriklesh yüzisidin ötküzülidighan tebriklesh pa'aliyitimizge qatnishishingizni qizghin qarshi alimiz. Pa'aliyitimizge xitay elchixanisi xadimlirimu qatnishidu we muhim söz qilidu. Pa'aliyetke undin bashqa yaponiyede oquwatqan junggoluq wetensöyer oqughuchilarning wekillirimu ishtirak qilidu. Siz özingizdin bashqa bizge yéngidin eza bolushni oylishiwatqan yaponiye puqraliqidiki junggoluqlarni tonushturushingizni ümid qilimiz we qizghin qarshi alimiz. Ziyapitimiz heqsiz, a'ile boyiche köngül échip oynap kéting. Güzel jungxu'a xelq jumhuriyitining öz muhajirlirigha tutuwatqan ewzel siyasitidin behri éling. Biz bilen dostlishing, junggo elchixanisi chet'eldiki illiq yurtingiz” déyilgen.

Uzundin buyan yaponiyediki Uyghur mesilisige köngül bolup kéliwatqan nam sheripini ashkarilashni xalimighan bu xanim yighindin kéyin ziyaritimizni qobul qilip,mundaq dédi:
-Tokyodiki xitay elchixanisining bash elchisi chéng yungxu'a, osakadiki mu'awin xitay konsuli qunduz yüsüp bashchiliqidiki bir guruppa xitay diplomatliri bu yil 7-ayning 23-künidin 27-künige qeder ürümchide élip barghan ziyariti jeryanda, ürümchidiki 14 organning xadimlirigha yaponlarning Uyghur kishilik hoquq mesilisige köngül bölüshi we yaponiye hökümitining Uyghur mesilisige bolghan qiziqishi toghrisida doklat bergen. Belkim shu doklattin kéyin, béyjing hökümitining alahide tapshuruqi bilen tokyodiki xitay elchixanisi yaponiyediki Uyghurlargha bashqiche illiq siyaset yürgüzüshini pilanlighan bolushi mumkin. Bu qétimqi pa'aliyet bu pilanning bashlinishi. Xitay elchixanisi bu arqiliq Uyghurlarni kontrol qilishni oylishiwatsa kérek dep oylaymen.

Biz axirida mezkur xitay muhajirliri jem'iyitining pa'aliyitige özgiche qarashliri bilen öz naraziliqini bildürgen yaponiyede uzundin buyan yashap kéliwatqan Uyghur siyasiy aktipliridin gülistan xanim bilen bu mesile üstide téléfon söhbiti élip barduq.

Awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.