Xitay taratquliri chöchekni Uyghur élidiki milletlerning qoshulup kétishidiki "Ülge sheher" dep teshwiq qilmaqta

Muxbirimiz qutlan
2015-10-07
Share
xitay-toylishish-bashqa-millet.jpg Bubimeriyem isimlik Uyghur ayalning bir daghur bilen toy qilip, perzentlirining xitay qatarliq bashqa milletler bilen toyliship, 6 milletning qéni arilashqan shalghut ewlad hasil qilghanliqi medhiyilen'gen programmidin süretke élin'ghan.
CCYV

Xitay merkiziy téléwiziye istansisining in'glizche qanili 1-öktebir küni chöchek shehiri heqqide mexsus programma ishlep, bu jayni "Shinjangdiki her millet xelqining öz-ara toylishishi we bir-birige qoshulup kétishidiki ülgilik köznek" dep teshwiq qilghan.

Xewerde chöchek shehiride olturushluq bubimeriyem isimlik Uyghur ayalning bir daghur bilen toy qilip shalghut a'ile berpa qilghanliqi, ularning perzentlirining xitay, tunggan, qazaq, rus qatarliq milletler bilen toyliship 6 milletning qéni arilashqan shalghut ewlad hasil qilghanliqi medhiyelen'gen.

Xewerde yene, bu shalghut a'ilidiki kishilerning bir üstelde olturup xushal-xuram tamaq yeydighanliqi, özini musulman dep bilidighanlirining allagha, xristi'an dep bilidighanlirining eysagha, buddist we shaman dinlirigha ishinidighanlirining öz ilahlirigha choqunidighanliqi ilgiri sürülgen.

Junggo radi'o torimu chöchekte olturushluq jang famililik xitayning a'iliside xitay, tunggan, rus, qazaq, daghur qatarliq 6 milletning toylishishidin kélip chiqqan 27 shalghut kishining yashaydighanliqini alahide xewer qilghan.

Xitay taratquliri yene, tarbaghatay wilayitining "Milletler inaq-ittipaq, jem'iyet muqim" jay ikenliki, bu yerde "Xenzu, qazaq, Uyghur, tunggan, mongghul, rus qatarliq 29 millettin bolghan 980 ming nopus yashaydighanliqi, ikkidin artuq milletler ara toylashqan a'ililerning pütün wilayet omumiy nopusining 7.5% Ni igileydighanliqi" ni ilgiri sürgen.

Melumki, cherchen nahiyelik partkom we xelq hökümiti 2014-yili 8-ayning 21-küni "Yerlik milletler bilen xenzularning nikahlinishini righbetlendürüsh charisi" namliq qizil bashliq höjjet chiqarghan. Shuningdin bashlap xitay hökümiti Uyghur élida milletler ara nikahlinish yaki milletlerning öz-ara qoshulup kétishini ochuq-ashkara sehnige chiqarghan.

Öz dewride radi'omiz ziyaritini qobul qilghan cherchen nahiyelik milletler we din ishlirini bashqurush idarisining bashliqi tursun emet gerche bu höjjetning chiqirilghanliqini étirap qilghan bolsimu, lékin da'irilerning her sahediki kishiler bilen diniy zatlarning pikrini alghanliqini pesh qilghan idi.

Islam ilmi boyiche doktorluq ilmiy unwanigha érishken türkiyediki Uyghur ziyaliylardin alimjan boghda ependi bu heqte ziyaritimizni qobul qildi.

U, xitay hökümiti bazargha séliwatqan milletlerning qoshulup kétishi yaki milletler ara toylishish teshwiqati öz mahiyiti bilen milliy we diniy assimiliyatsiyedin bashqa nerse emes. Buni meyli diniy yaki milliy nuqtidin bolsun, qet'iy qobul qilghili bolmaydu, dep körsetti.

Amérikida yashawatqan tébbiy penler doktori jür'et obul ependimu ziyaritimizni qobul qilip, xitay teshwiqatidiki bu xil chékidin ashqan sepsetelerge qattiq reddiye qayturdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.