Kuchada yolgha qoyulghan "Uzun könglekni qisqartish, chong yaghliqni kichiklitish" belgilimisi

Muxbirimiz méhriban
2015-06-15
Élxet
Pikir
Share
Print
Tömür réshatkiliq hoyligha solan'ghan hijaplan'ghan Uyghur ayalliri.
Tömür réshatkiliq hoyligha solan'ghan hijaplan'ghan Uyghur ayalliri.
RFA/Ruqiye

Kucha nahiyisidin igiligen ehwallardin melum bolushiche, yéngi sékrétar yang fasing yolgha qoyghan muqimliq tedbirliri ichide, 50 yashtin töwen erler saqal qoymasliq, ayallarning yopkisi 110 santimétirdin ashmasliq, chong yaghliq artmasliq belgilimisi" seweblik nöwette kuchada, tikküchi-seypunglar ayallarning könglek, yopkilirini qisqartish bilen aldirash, kocha-restilerde uzun köyneklik, chong yaghliq artqan ayallar tamamen yoqighan, ayallarning yaghliqliri kichiklep, yopkiliri tizdin ashmaydighan, kochida saqal-burutluq Uyghur erlirini körgili bolmaydighan menzire barliqqa kelgen.

Radi'omiz ötken hepte kuchadin igiligen ehwallardin melum bolushiche, bultur 10-aydin bashlap kuchada wezipige olturghan nahiyilik partkom sékrétari yang fasing kuchani "Muqimliqta nemunichi nahiye qilip qurup chiqish" wedisini emelge ashurush üchün, bir qatar "Yerlik muqimliq tedbirliri"ni yolgha qoyghan.

Bu belgilimiler ichide bir qeder qattiq we omumyüzlük ijra qilin'ghan belgilimilerning biri, Uyghurlarning islam dini en'enisi we milliy örp-aditige xas bolghan uzun könglek kiyip, yaghliq artish, erler saqal, burut qoyush aditini islah qilish tedbiri.

Igiligen uchurlardin melum bolushiche, kuchada bulturdin buyan élip bériliwatqan "24 Sa'etlik öy tekshürüsh" tiki muhim tertiplerning biri, tekshürülgen öylerde ropash ayallar bolmasliq, eger bundaq ayallar uchrisa awwal xizmet ishlep ularni sirtlargha chiqqanda yüzini yapmasliq, uzun könglek kiymeslikke qayil qilish, eger tinch usulda élip bérilghan söhbetke naraziliq bildürgenler uchrisa, ularni qanun boyiche bir terep qilish tedbiri yolgha qoyulghan.

Yéqinda chet'ellerdin weten ziyaritige bérip qaytip kelgen bir xanimning bildürüshiche, u, bu yil jenubiy Uyghur diyaridiki qeshqer, xoten, aqsu qatarliq yurtlarda bir qanche künlük sayahette bolghinida uni heyran qaldurghan bir körünüsh, kuchada ilgiriki yillardin perqliq halda, kochida ropash ayallar yoq bolupla qalmastin, hetta ilgiri yillardikidek uzun könglek kiyip, chong romal artqan ayallarni uchritalmighanliqi, saqal-burutsiz Uyghur erliri köpeygenliki, yol-yollarni tosup kishilerning kimlikini tekshürüwatqan qoralliq saqchilarning kishilerning somkilirini xalighanche axturuwatqanliqi bolghan.

Kuchadiki melum ahaliler rayonidiki öz kimlikini ashkarilashni xalimighan bir neper xizmetchi xadimning bildürüshiche, bulturdin buyan ular élip barghan "Zaman'gha layiq, medeniy kucha ayalliridin bolush" pa'aliyitide, kuchada birqanche qétimliq "Zamaniwi moda kiyim musabiqisi" uyushturulghan.

U bayanida, musabiqiler jeryanida yene ayallargha "Yarishimliq moda kiyimlerni kiyish, oshuqni yépip turidighan ziyade uzun köngleklerni tikküchilerge apirip qisqartish, köynek-yopkilarning uzunluqi 110 santimétirdin ashmasliq, bash we boyunni biraqla orap chigidighan chong yaghliqlarni kichiklitip, yaghliqni keynidin chigish" qatarliq teshebbuslar teshwiq qilinip, sanduqlarda uzun könglek we chong romal saqlighuchilar bayqilip qalsa, qattiq chare körülidighanliqi uqturulghanliqini bildürdi.

Radi'omiz igiligen bashqa ehwallardin melum bolushiche, da'iriler Uyghurlargha qaratqan "Diniy tüs alghan kiyinishlerni cheklesh", "Yash erlerning uzun saqal qoyushini cheklesh" belgilimiliri Uyghur élining jenub, shimalida birdek yolgha qoyulghan bolsimu, emma kucha nahiyiside yolgha qoyulup, qattiq ijra qiliniwatqan "Könglek, yopkining uzunluqi 110 santimétirdin ashmasliq", "50 Yashqa kirmigen erler saqal, burut qoymasliq" tedbiri, kucha xelqi arisida yéngi partkom sékrétari yang fasingning "Muqimliqta nemunilik nahiye" chüshini emelge ashurushta öz aldigha chiqarghan alahide yerlik tedbirlirining biri dep teriplenmekte iken.

Toluq bet